那些年，我錯過了的愛情: 6.

我琴晚都係透過通知睇佢內容，到今朝先正式覆佢，原因係因為我唔識覆。
我：「唔緊要，你到時再覆我囉」
係，我淨係覆咗一句。咁無理由同佢講，我之後有機會唔鐘意你，咁樣咩。但係我知我有機會就咁樣唔再鍾意佢。
當回覆等太耐，我就唔再想等，會直接放棄。好多時候覺得鍾意嘅人好似對我無興趣我係會直接放棄。依啲係連回覆都算唔上，係單純我嘅幻想同埋破滅。可能人哋根本唔知我鍾意佢，或者完全唔知我嘅存在。
又或者好似佢依家咁樣俾啲唔肯定嘅答覆，我都會想放棄。
可能依個真係我溝唔到女嘅原因。
晏晝嘅時候，呀怡又真係打電話嚟問我係咪去圖書館溫書，於是我就約左佢去我平時去開嘅圖書館。
我一直同自己講「溫書姐，算啦唔好諗咁多啦。」但係，依個情況好難唔諗多，都係靠洗個面俾自己冷靜下。
原本覺得只係約溫書大家都係hea著姐，估唔到佢著左黑絲短裙呀！！！！屌！！！！
你依家係想點呀，又唔係約會，你著到咁，我溫到書咩，又話唔知係咪真係鍾意我，又要著到約會規格，仲要黑絲短裙，男人嘅弱點，根本就唔打算俾我溫書。再加上佢身材好好，上身豐滿，下身瘦長，作為一個正常有性慾嘅男人，我無一眼唔係喺佢身上。




「嘩...你著到咁嘅...做咩事...」我依個時候一定係扮鎮定架啦，雖說眼神閃縮，但係都係來回望住佢上下身。
「為咗補償返當初令到你失望姐，著得今次咋，無下次。」佢紅都面晒，怕怕醜醜咁講。
「你著到咁，我好難唔會誤會你對我有意思架喎... 仲有，我好難專心到溫書...」我個腦kick實咗，已經係諗到咩就講咩，唔怕佢真係走咗去。
「咁我返屋企換衫囉~~」佢作勢掉頭走。
「咁又唔好~~難得你肯著，就咁啦，你返去再出返嚟就冇時間溫書架啦。」我下意識咁捉住咗佢隻手，下一秒覺得唔對路，即刻鬆手。「唔好意思...」
「唔緊要..」佢都冇再向後走。「我哋去圖書館囉。」