那些年，我錯過了的愛情: 3.

「嘢食嚟到啦，食野先，俾返套餐具我。」我借啲依轉一轉話題，順便俾自己逃避下。
「嗰陣轉咗校之後呢，你地點發展呀，仲有冇一齊返放學呀，講嚟聽吓...」婷姐扮聽唔到，仲繼續追問落去。佢男朋友，呀俊都忍唔著叫住佢。「放過呀軒啦，食完飯去海傍散步再講都未遲。」
嗰一刻我覺得呀俊真係耶穌派個天使嚟打救我，而婷姐都冇再講起依件事。我哋一路打邊爐，一路交流下愛情觀，就咁樣食到夠鐘。
「啊~~好飽！謝招！」婷姐一出門口就好滿足噉樣伸咗個懶腰。「陣間啤酒我請你啦，不過一罐好啦，唔想再抬你返去。重到死。陣間拜託你陣間個故仔講好聽少少，如果唔係俾返罐啤酒錢我。」
「係係係...」
我哋間邊爐舖其實就係海傍隔離，好快就到，都冇乜時間俾我去整理思路嘅。
「轉咗校之後，又見得返佢喎。我哋個陣都好驚訝，邊估到咁多學校揀，都會揀到同一間學校。不過我地就唔係同班啦，可惜。」我飲咗啖，又繼續講。「咁去咗唔同班，我哋都係得番返放學先見面，其他時候都係同自己班啲人玩。我哋大家都各自識到班好朋友，無晒啲欺凌行為出現，都融入到新學校。」
「所以你就依個時候識咗其他女仔？」呀俊食咗咁耐花生，終於忍唔住問。
「係呀，咁個陣我係我個班入面好快識到其他人，佢地都幾frd嘅，幾照顧我，咪有少少上頭囉...」我越講越細聲，好似做咗虧心事咁。「咁嗰啲女仔其實都係有好感想追姐，但係無真係表白嘅。嗰陣係問呀怡啲意見，佢叫我慢慢嚟，熟咗先，到時先算啦。咁但係未熟就已經收左皮...」
「喂呀，你好廢呀，唔追呀怡都算啦，人哋幫埋你你都唔敢。抵你溝唔到女啦A0仔。」都估到婷姐咁講架啦。「咁你嘗試追過幾多個呀。唔好同我講一個都無呀。」




「咁就一定有嘅，嗰陣仲要差啲成功架啦。不過唔係今日主角就唔講啦。有機會補返俾你哋聽。」再講落去，聽朝先講完。「咁我同呀怡都仲有一齊出街食飯嗰啲嘅，有時會上佢屋企一齊溫書做功課，太夜嘅都會係佢屋企食埋先走。」
「估唔到你人仔細細，拖都未拍就見晒家長，仲要一齊食過飯添喎~~咁勁得唔得架。」依句擺到明笑我啦。
「屌，又撚。」我又飲咗啖，順便又再舉多次中指。「咪就係咁樣開始鍾意咗佢囉。」
「我嗰陣識呀俊都係咁~~你個陣好主動架，係咪呀b？」婷姐含情蜜蜜咁望住呀俊講。
「放過我唔好閃啦大佬。」我背對著佢，將罐啤酒一飲而盡。「自此，我就好期待咁見佢，等佢message。去到最近，佢覺得我怪怪地，就問我咩事。咁我咪借啲依表白囉。結果依幾日佢無搵我返放學，係學校當見我唔到，功課都冇問我，咁當然都唔會搵我出街。」我傷心得滯，將罐空啤酒罐放喺地下，一腳踢到好遠嘅空地，好彩無打中人。