那些年，我錯過了的愛情: 2.

「喂呀，你快啲講你點解又俾人拒絕先啦，唔講唔比你食呀！」佢講都未講完就已經搶走咗我套餐具唔打算俾我拒絕。
「得啦得啦，我講我講...」搞到咁我都冇得拒絕，唯有死死氣講囉。
「你咪想知邊個嘅，就係你嗰晚講嗰三個入面最靚嗰個。」賣個關子先。
「喔...呀怡~~咁都仲係唔得？條友中央空調嚟架。」婷姐瞪大隻眼覺得好唔合理咁望住我。「又去迪迪尼，又睇愛情動作片，連攬都攬過添喎！咁都唔得？佢對其他人係咪都係咁架？」
「解答你問題之前，唔係愛情動作，係校園戀愛。如果真係愛情動作我就已經得米啦。」如是者我又送多隻中指畀佢。「講真之前同你講過話去迪迪尼同埋睇戲我都真係以為得，佢平時都唔會約人去玩加po埋ig嘅。而且佢都唔會攬其他男仔，佢好抗拒同男仔接觸架。」
阿怡係我一個小學同學兼中學同學。喺小學嘅時候我地都係羽毛球校隊，由於住附近所以我地練完波都會一齊行返去，有時候會我哋都會買糖share食，我哋有個不成文嘅規定，就係會輪流俾錢買糖，並唔存在AA制。佢平時功課唔識都會打過嚟問，不過個陣小學，純粹都係frd姐。
升咗中學，發現原來得佢一個同我同校，咁好自然就有咩事都搵對方先。我哋一開頭都只會一齊放學，到後來會一齊返學同埋食lunch。再之後我地更加會放假一齊玩，一齊溫書，一齊傾心事。婷姐個陣問過我點解我冇追佢，咁我又對佢無好感，反而去追其他女仔，仲要犯咗大錯，就係問呀怡點追其他女仔。咁佢又大方咁幫我，仲要嘗試少啲嚟搵我，同我保持距離，希望我得米，你哋話啦，咁好嘅女仔可以係邊度搵喎，而且佢又靚女，又身材好，比起我追嘅好過幾條街。
講到身材好，咁攬過又真係幾好攬嘅。佢身材因為打羽毛球所以都keep得幾好，加上佢早發育，又發育得唔錯，所以佢係中學係俾成級人欺凌嘅。冇錯，佢係俾全級人欺凌。男嘅對佢眼𥄫𥄫，女嘅對佢眼超超，嗰個都係佢背後討論佢，話佢生咁靚出面一定好多男朋友。其實佢地講咁多都係因為妒忌佢樣靚身材好。咁我係佢唯一識嘅人，唯一熟嘅人，唯一frd嘅人，咁自自然然就係我安慰佢。同時間，我因為同佢玩得咁埋，所以我都俾人杯葛埋一份。不過依啲野對我嚟講唔算得啲咩，我唔會為咗埋堆而杯葛一個無做錯野嘅人，何況佢係我朋友。如是者，初中嘅時候我哋都係相依為命，佢有時頂唔到個壓力都會放咗學捉住我係公園攬住我喊。依個情況持續發生到我哋轉校。

-----分隔線------




我開左ig啦 叫zhihin_ching，歡迎add我搵我傾計呀