那些年，我錯過了的愛情: 1.

第二朝，我因為碌落床而醒咗。我諗咗陣都醒唔起我點返嚟，我仲以為我去海邊都係發夢。我摸著我屎忽企咗起身，發現臺頭有張紙寫住「衰佬！叫我過嚟執手尾，又唔同我講你未戀先失嘅過程！仲要我call我bf嚟搬你返去！今晚要你請我打邊爐！6點你屋企樓下不見不散！你試下唔出現(\_/）」
「屌啦... 今鋪67啦，本來就得婷姐知，而家佢bf都知埋啦唉...」無計啦，佢又的確送咗我返屋企，我請佢食飯當還返個人情囉。
好彩今日唔使返學，今晚噉樣醉法都應該都醒唔到。最大鑊嘅係我表白對象係同班同學。
「呀仔，醒啦？有外賣食唔食呀？唔食我攞去餵狗啦。啊... 擘大口啦。」叫我嘅正是我老母大人，佢把口係賤咗少少，但係佢都幾錫我嘅。「拖都未拍就喊到咁，到時失戀唔好跳樓呀，葬禮啲嘢又麻煩又貴架。」更正返少少，我老母把口真係好撚賤。
由於起咗身之後瞓唔著，所以就走左去打機。正當我打到風生水起嘅時候，咁就一定係會有啲奪命追魂call架喇。「喂，死佬！係邊呀，等你請食飯呀！」
「打埋依鋪先啦，就完架啦，係咁啦，拜拜。」最後6點半先落到去。
「死佬，你今日唔一五一十講晒出嚟你咪使旨意有得走。」佢迎面以嚟咁伸咗隻中指俾我，我都禮尚往來咁俾返隻佢。