禁結之淚-BDSM真人真事改編: 2.那遙不可及的黑暗
朝早嘅手機鬧鐘聲嘈醒咗我，今日係難得嘅星期日，如果唔係約咗人，我絕對唔會早過12點起身。琴日睇台灣嘅blogger睇到凌晨4點，宜家先9點半，個頭仲有少少頭痛，實在唔想起身，但我知如果陣間嘅約會遲到，我一定會好麻煩。
我拖住疲倦嘅身軀梳洗之後，求其食咗幾塊餅乾就換衫出門。西九龍廣場離我住嘅地方唔遠，由我屋企去深水埗只需要20分鐘。
深水埗嘅「紅蘋果」商場不嬲係年青人嘅聚腳地，五樓同七樓嘅格仔鋪賣嘅新潮玩物吸引咗唔少年青人，而今日同樣聚集咗好多年輕人，非常熱鬧，因為「紅蘋果商場」嘅溜冰場喺朝頭早9點至12點可以平價入場。雖然呢個溜冰場嘅規模唔大，但就引嚟唔少年輕情侶嚟呢度拍拖。
而我正正係其中之一。
「你又遲到。」我行近一名企喺玻璃欄柱，戴眼鏡及肩短髮美少女隔離，佢微微抱怨咁講，仲要向我嘟起嘴仔。
「遲咗十分鐘啫。」我一邊笑笑口講，一邊輕輕抱住佢。
佢叫小蕎，係我拍咗兩年幾拖嘅女朋友，19歲，細我三年，外貌上睇唔出小蕎只有19歲，佢對於流行同時裝冇乜興趣，冇性感衫，買衫嘅時候只會考慮可唔可以出席到嚴肅同端莊嘅場合，長期保持一個Miss形象。
的確，小蕎讀社工，外貌雖然唔係美若天仙，不過勝在佢眉清目秀，戴住金色大框圓形文青眼鏡，淺啡色及肩長髮。身材高挑，係女仔嚟講算高，如果大家kiss冇去就對方嘅高度，小蕎就會錫到我個鼻，搞到佢成日向我抱怨佢着唔到最鍾意嘅高踭鞋。
啲朋友成日問我點解溝個高過自己嘅女仔。咁又點，反正我唔介意。吹咩！我有個高過我嘅女朋友係我叻仔！小蕎而家外表係平凡，不過佢箍緊牙，相信之後會更加靚。
嗯，女大十八變嘛！
「十分鐘啫，我未食早餐就出嚟啦。」
「你唔識早啲出門口同起身㗎咩？」小蕎每次都好準時。
「陣間請你食返mum mum 啦。乖，唔好嬲啦。」雖然我知道佢唔係真係嬲，但小朋友要氹呢個道理我明嘅。
我哋邊傾計邊行去溜冰場，換完租返嚟嘅溜冰鞋，我哋手拖手行入溜冰場。其實我哋兩個唔叻溜冰，嚟溜冰嘅重點只係想享受兩個人手拖手喺冰場上翱翔嘅感覺，加上見到有特價就嚟湊下熱鬧。個溜冰場細細個，橢圓形，目測同一個籃球場差唔多大細，企滿曬人，其實冇乜空間。我哋費事出醜，就一路扶住欄柱溜冰，一路傾偈。
「你知唔知原來之前嘅人會將條黑色手巾或者鎖匙放係右邊同左邊，用嚟代表佢係S (施虐者) 或者M (被虐者)㗎?」我將琴晚讀到嘅小知識向小蕎分享。
我女朋友由同我拍拖開始已經知道我係一個S，雖然佢唔係圈內人，亦唔係M，不過佢為咗我都一齊嘗試咗好多唔同嘅SM調教項目。我非常尊重佢，知道佢好討厭婚前性行為，所以我哋一直以嚟依然冇跨越嗰一條線，只係用情趣玩具嚟調教。大多數收場係佢幫我口交作結。我知道佢只係為咗配合我，因為佢本身有啲性冷感，我們試過好多辦法亦解決唔到。
我愛佢，希望同佢一齊解決呢個問題，嘗試過好多唔同嘅調情用品，試過唔同嘅氣氛。為咗令佢慢慢接受SM，我同小蕎嘗試過一啲簡單嘅輕度SM，例如蒙眼，綁手等等，都未能夠令小蕎接受。後來佢讀社工開始忙，成日嚟唔到我屋企，男女之事就慢慢減少。上一次已經係1月1號啦。
10個月前嘅事！
雖然係咁，但我依舊不斷定期向佢注入SM知識，希望可以潛移默化佢。
「你扣條鎖匙喺皮帶度就係為咗咁嘅原因?」小蕎笑住講。
「梗係唔係啦，我不嬲都有扣㗎啦。」我用手撥咗一下腰間嘅鎖匙。
「咁你洗唔洗掛條手巾喺度到啊？」
「要呀，你幫我喺淘寶搵吓。」
「好無聊呀你。」小蕎反咗我一下白眼。
「我尋晚入咗個TG group，係有關SM㗎，入面全部都係圈內人，好多野睇。」我講得有少少激動，好似一個向人哋展示新玩具嘅細路仔。
「哦。」佢嘅回應似乎冇乜興趣。
「尋晚睇咗好耐…」我有啲興奮咁講。
「所以你掛住睇就夜瞓搞到遲到！」小蕎聽到我依句，好似係真嬲。
「唔係呀，唔好嬲豬豬啦…」我扮小朋友嘅聲音講，然後打咗她屁股一下。
「我話左唔好喺條街到咁整！」小蕎性格比較內斂，所以唔想係街度畀其他人見到。我唔認為有啲咩問題，只係情侶間嘅情趣。
「我唔中意咁。」小蕎認真咁講。
我環望四周，所有人係到專心溜冰，冇一個人望我哋。而我只係輕輕拍咗一下。我真係O咗嘴。又係咁。好似我做任何親密少少嘅接觸都係錯。
不過我同小蕎拍咗拖2年，已經習慣喇。
「好啦好啦，唔整啦。」我笑住拉小蕎溜到溜冰場中央。「啊！」佢細聲驚呼。
「唔怕啦！」我拖住佢對手唔使5秒穿越成個冰場，溜到對面嘅欄柱。
「懶叻啦你。」小蕎笑一笑，用手整理亂咗嘅頭髮。
見小蕎冇再嬲我當堂鬆返啖氣。
我繼續拖住佢隻手喺溜冰場上面快步滑翔，享受當下嘅歡樂，頭先嘅對話好似冇發生過一樣。