禁結之淚-BDSM真人真事改編: 3.發現大門
到夜晚，我送咗小蕎返調景嶺之後搭地鐵返屋企。路途幾遠，不過自從同小蕎拍拖之後，我每一次都會送佢返屋企。
翻到屋企沖完涼瞓喺床上面，望住床上嘅手提電腦，心思思打開咗有關BDSM嘅網址睇人哋嘅文章。因為我知道要成為一個出色嘅S同主人，一定要學習大量相關嘅知識，了解每一個調教項目點進行，有乜安全要注意、主奴之間嘅健康相處、點處理奴隸嘅情緒、調教完結後點做有效嘅事後照顧... 總之有海量知識要學。
我主要會瀏覽嘅網址有兩個，第一個係香港調教討論區，一個為BDSM同主奴而建立嘅本地討論區，入面有唔少學術性文章，我每篇都睇過唔止一次，最重要係討論區設有尋主尋奴區，唔少主奴係喺呢度搵partner。不過我冇試過，一嚟女M女奴嘅數量少，好難找到，二嚟自問功夫未到家，唔敢貿然去搵。
第二個就係Tumblr，其實Twitter都有，但Tumblr對用戶嘅限制比較少，可以post 18+嘅post，所以唔少嚟自世界各地嘅主奴都會喺Tumblr post佢哋嘅調教內容。當然仲有嚟自香港嘅主奴，我成日都會去「偷師」。望住佢哋嘅分享，我好想可以好似佢哋咁，擁有一個對自己千依百順嘅女奴，向大家分享自己嘅調教。我衰在唔知道由邊度開始入手。
奴，可以話係可遇不可求。
最吸引我嘅湯主（Tumblr用戶我哋會叫做湯主），係擁有萬幾follower嘅「野狼隻奴」，主人狼主同女奴小灰，佢哋嘅調教唔算重口味，但就十分浪漫，成日放閃講有幾愛佢主人，幾想畀佢主人玩弄。小灰更加係千嬌百柔，對狼主嘅忠誠令我睇到入神，心諗呢位狼主認真幸福。
我睇咗大量文章同post，總係唔知道應該點樣入手第一個奴我。要知道圈內人士係唔會教你點樣搵partner，問咗只係自討沒趣，現實更加唔會好似《格雷》一樣，有個女仔從天而降。況且呢套電影根本稱不上一齣BDSM題材嘅電影，更唔好講我冇《格雷》男主角家財萬貫，又高大靚仔，求其行出街都可以搵到女嗰種。真係知自己咩料啦。
我唯一途徑係一個內地專門畀BDSM交友嘅交友app，其實我心知係唔會搵到人，只係守株待兔，撞下彩。點都好過冇，起碼叫做有一絲希望。可能係自我安慰。我努力去學習同研究BDSM，一嚟我知道我冇錢冇樣，唯有用知識去搭救，二嚟就算搵唔到奴，研究吓令我感覺自己入咗圈都開心。
依種興趣只有自己知，冇辦法實現，好似一個好鍾意去旅行嘅人，冇得去旅行，只可以喺網上面不斷睇YouTube自high一樣。
搵唔到適合partner嘅感覺，好似全世界得返自己，好似52Hz鯨魚（佢叫聲嘅頻率比起一般鯨魚高，冇人聽到）一樣咁孤獨，冇人傾訴。
搵唔到奴隸嘅感覺，同少咗身體一部分一樣。
轉眼已經凌晨，深夜入面，孤獨嘅感覺顯得特別強烈。百無聊賴，我上咗App Store睇吓除咗嗰個內地app之外，仲有冇其他新嘅選擇。
手指不停喺手機上掃，冇一個App係適合，突然，「𠵱？」我目光停咗喺一個叫 "Maychat" 嘅本地匿名交友app上面。
呢個交友app聲稱係匿名交友，只需要輸入你自訂嘅標題，就可以等待其他人睇到你嘅標題邀請你傾偈。當然，如果你認為對方嘅標題合適，你亦可以撳入人哋嘅標題，對方一旦接受邀請，就入去聊天室PM。
我好似見到一絲光芒咁，反正我依幾年試過無數嘅方法， download過無數嘅app，唔爭在試埋呢一個啦！
我抱住話唔定會有意外驚喜嘅心情下載咗呢個交友app。
Maychat嘅世界入面果然存在住五花八門嘅怪奇標題，大部份係尋SP (Sex Partner)，「30歲小鮮肉」、「15 cm長肉棒」、「一個月破了10個處女，你會是下一個嗎？」，當然亦都有一啲正常嘅標題，例如結識朋友或者傾心事。
「有人真係會覺得有女會為咗你寫15 cm肉棒嘅標題撳入去咩？」我心諗。
可能因為係匿名嘅關係，大家變得大膽，打破現實社會嘅道德枷鎖，盡情追求自己嘅慾望。當然有冇腦嗰啲就見仁見智啦，咩「15 cm長肉棒」就唔多加評論。
我繼續掃視唔同標題，突然，我嘅眼光停咗喺一個標題上「乖母狗找成熟主」。
我即刻雙眼發光！
呢個好明顯係女奴求主嘅標題，我再掃，冇幾耐又見到「經驗主尋狗母」，我就知道有圈內人用呢個交友app搵partner。
太好啦！終於有啲曙光！雖然唔知依個交友app最終可唔可以幫我搵到適合嘅奴隸，但至少係個新希望，新地方。加上匿名交友，代表我有無限次試柒對方又唔知我乜水嘅機會。
既然係匿名，我冇顧慮太多，立刻改咗一個標題 ——「男主尋女M or 女奴」。
當然，我唔會守株待兔，我知道好多女仔可能係女M，只係喺現實中唔為意，佢哋唔會承認，身邊人亦都睇唔出，但可能其實佢哋心底裡可能係想搵翻個男S或男主。
所以我冇諗太多，我唔理對方個標題同BDSM或主奴有無關，只要係女仔開，我一一我撳哂落去，個app每次只限可以撳一個，對方會有15秒去考慮你嘅邀請。
當然冇可能一擊即中，我明白呢個道理，所以不斷咁發出邀請，好多拒絕，有啲就接受咗傾咗幾句就走。
我都唔係泛泛之輩，每一次對方離開聊天室，我就會分析透視對話嘅內容有咩地方出錯，邊一句可能令人反感，邊一點需要改善，慢慢修正我嘅對話內容。