我嘅志願係讀電影學院: 003

你以為導演只係讀導演、編劇淨係讀編劇、剪片淨係讀剪片？

錯，我哋全部都要學。

一嚟就剪片，會唔會刺激咗啲。

「粒掣喺邊，點解我搵唔到嘅？」

「呢度咪係囉。」





搵到個掣，但聽漏咗老師講嘅下一個步驟，我完全跟唔上老師教書嘅速度。

「咁簡單都唔識。」李健威忍唔住出聲。

由我同佢做室友嗰刻到而家，我都係第一次聽佢講嘢。

佢最令我欣賞嘅地方係，可以一邊打機，一邊剪片，而且仲要冇漏過到任何步驟。

學完剪片，仲要繼續編劇堂。





未入到課室門口，已經見到個課室門口俾成班人圍住晒。

「到底有咩睇？」

「我估可能有明星嚟咗掛。」

由頭先開始，柴紀邦就冇出過聲，實在唔似佢嘅作風。

「你做咩啊，面色咁沉重？」





「睇嚟佢到咗。」

「邊個佢啊？」

「我幼稚園同學、兼小學同學、兼中學同學、兼電影學院嘅同學。」

「你哋真係有緣。」

「就係因為佢，所以我一直都拎唔到全級第一名。」

坐喺課室嘅女仔，聽聞佢係出生於編劇世家，同柴紀邦家族係世交，彼此之間有好多合作，因為導演需要編劇，編劇需要導演。

「估唔到我哋又係同一班。」張依婷行過嚟打招呼。

「睇吓點，編劇呢一科，你就可以拎第一，導演嗰一科，你肯定拎包尾。」柴紀邦充滿自信地反擊。





「用成績嚟證明。」

其實佢哋兩個都幾襯啦，導演世家同編劇世家，完美演繹現代門當戶對。

「又打機？」

「你理得我啫。」

「我懷疑你入錯地方，你應該入電競學院先啱。」

「我想㗎，不過父母話我係靠樣食飯，所以先送我入嚟電影學院。」

「你係靠樣食飯，笑死我。」





「我唔靚仔咩？」

「正常樣囉。」

「我正常樣？又點會有咁多女仔睇我上堂？」李健威指向門口。

我望向門口，原來有一大班女仔偷偷地睇我哋上堂。

「唔准傾偈。」

唔知幾時，編劇王老師已經行到我哋面前，居高臨下咁望住我哋。

「唔准打機。」

李健威諗咗一陣，最後都係將遊戲機收落書包。





我哋繼續喺編劇堂學習起承轉合。