我嘅志願係讀電影學院: 002

就係咁，我憑住張電影學院入學券，成功混入咗最top嘅學府。

無知嘅我，入到嚟先發現，我啲同學全部都來頭唔細。

我啲同學有星二代、出生於導演世家或者編劇世家，如果以上三樣都唔係，咁就一定係個富二代。

電影學院位於山上，面積十分之大，無論去邊度，都係要等校巴。

我依家就係等緊校巴去宿舍。





「喂，你哋就係year one ？」背後傳來一把男人聲。

「係呀，你哋喺？」

「我哋係你哋師兄，啱啱畢業。」

「原來係咁，幾位師兄有咩指點？」

「指點就冇，校服就有。」





電影學院嘅傳統，就係畢業生將自己嘅校服賣俾新生，代表一種傳承，交棒接力嘅意思，所以越舊嘅校服，炒價越高。

「我舊年以第一名嘅成績畢業，所以我呢件校服邊個想要？」

「我要我要。」

排隊等車嘅同學開始起哄，頓時變成拍賣會現場。

我就冇咁高抱負，所以我搵咗個師兄，用返正常嘅價錢買咗套校服。





「你好，請多多指教。」

宿舍四個人一間房，其中一個同學主動同我打招呼。

「你好，點稱呼？」

「我叫柴紀邦，我出生於導演世家，我爺爺嫲嫲、公公婆婆，同埋我阿哥，佢哋全部都喺導演，所以我都要跟隨佢哋嘅腳步，成為一個出色嘅導演。」

全家都係導演，真係好勁。

「喂，你叫咩名啊，由頭先開始你就一直打機。」柴紀邦問。

「唔好嘈住我打機。」

真係好有性格嘅室友。





間房仲有一張床空住，睇嚟嗰位室友仲未入住。