我嘅志願係讀電影學院: 004

讀電影學院最大嘅好處就係電影免費任睇，喺學校嘅戲院，每日都有最新上映嘅電影可以睇，除咗本地電影，仲有來自世界各地嘅電影，簡直係包羅萬有。

「一齊去睇電影？」我問。

「又睇？」柴紀邦拖着疲累嘅身軀瞓落張床度。

「你去睇過啦咩？」

「我啱啱先係戲院返嚟，我尋晚去睇電影，然後唔小心瞓着咗，結果依家先返嚟。」





可能係我尋晚太早瞓，所以唔知道佢成晚無返過嚟宿舍。

「你哋唔去，咁我自己去。」

一個人睇電影，其實都可以好開心嘅。

便利店二十四小時運作我就聽過，但戲院廿四小時運作，我都係第一次見，我諗，電影學院嘅戲院係全國唯一一間廿四小時運作嘅戲院，廿四小時無間斷電影播放。

由於呢個時間上緊堂，所以戲院唔算多人，但唯一有一個同學引起我注意，由電影播放開始到結束，我見證住佢攞啲衫褲出去，應該去附近更衣室沖涼，佢返嚟嗰陣頭髮仲係濕嘅，應該就係洗完頭，後來佢又出咗去買嘢食，食完之後佢就瞓咗覺，佢真係當戲院係佢屋企喎。





「有咩好睇過電影呀？」

當我分心嘅時候，張依婷突然出現問我嘢，真係嚇我一跳。

「嗰個邊個嚟㗎，你識唔識佢？」

「佢？佢咪就係金氏影城老闆個仔囉。」

「咁佢點解會喺度？」





「應該嚟讀書，不過聽講佢唔習慣同人哋一間房，所以到而家都應該仲未返過宿舍。」

「我哋間房仲有一個空位，唔通嗰個空位就係佢？」

「咁可能就係啦。」

我以為結束咗中學生活之後，就唔會再有班主任呢樣嘢，但係結果都係仲有，班主任由開學到而家都冇露面過，只係成日喺班群入面發送訊息，所以我哋大家都稱佢為AI班主任。

由於冇人自願肯做班長，所以AI班主任聲稱會進行抽籤，係真係假，就無從探究，但係班長名單就公布咗。

男班長係柴紀邦，女班長係張依婷。

總之唔係自己就得啦，邊個係班長都冇所謂，班長只不過係一個名銜，負責收集同學嘅意見，然後向校方反映，仲要間唔中出席吓會議，聽吓啲無謂嘅講座，唔夠人嘅時候，就可以湊人頭。