我嘅志願係讀電影學院: 001

今日係畢業聚餐嘅日子，我啲同學個個都打扮得好靚，個個都盛裝出席，唔講唔知，我仲以為邊個大明星要去行紅地氈。

對我嚟講，畢業聚餐咪就係食餐飯、傾吓偈、曬吓命，我真係好唔鍾意出席呢啲咁表面嘅應酬。

「係呢，你入咗邊間大學呀？」

「人生有好多選擇，唔一定要入大學。」

我雖然咁樣講，但心入面多多少少都有啲失落，因為佢哋個個都入到大學，雖然有啲人入到嘅大學，我連名都未聽過，但至少都可以話自己係大學生。





餐飯越食越失落，佢哋之間嘅話題都係圍繞大學生活，住唔住宿舍、去唔去迎新營，而我作為全場唯一一個入唔到大學嘅人，我根本冇嘢好講。

我可以做嘅，就只有搵一個理由提早走。

「咁快走，餸都未上齊。」

「我有啲嘢要做。」

「咁唔送啦。」





「得啦，你哋繼續食啦。」

越喺呢啲時候，越需要扮瀟灑。

離開咗餐廳之後，心情冇再咁壓抑。

「要唔要支煙啊？」一個着住着住制服嘅男人問我。

「唔使啦，唔該。」





「十年前嘅今日，我同你一樣，所以我明你嘅心情。」

佢個樣，我好似喺校刊上見過，應該就係某一屆嘅畢業生。

雖然佢想同我繼續傾落去，講佢當年嘅故事俾我聽，但係我邊有心情理佢，所以三十六計走為上計。

心情唔好嘅時候，行下海邊或者有用。

夜幕降臨，四周環境都好安靜，我焦慮不安嘅心情總算平復落嚟。

我抬頭望向天空，發現今晚個月亮好圓、好靚，可能今晚係滿月。

趁呢個機會，我問老天爺，有咁後嘅人生應該要點樣行落去？

有時，真係會越諗越灰，灰到我真係想跳海。





正當我想跳海嗰陣，我發現遠處燈光暗處，地上有一個神秘嘅黑色信封，我確認過前後左右都冇人，然後就走上去執起身。

呢個信封到底裝咗啲咩？

錢？

信用卡？

支票？

使唔使許返個願先打開？

算啦，我都係快啲揭曉。





電影學院入學券。

憑此券即可入讀電影學院。

我記得小學作文，曾經寫我的志願，而我當時寫嘅志願，就係讀電影學院。

冇錯。

我嘅志願就係入電影學院。