一覺睡醒，發現阿爸變成女人: Ch.30

「你又嚟，一唔啱聽就入房閂門，咁你想我點？不如你教我。」我聽得出，阿爸開始惱羞成怒。

 你根本沒有真正了解過我。 

當然，這句話我沒衝口而出。 

「我入房係唔想再同你嘈。」我強忍怒氣，故作鎮定邊走邊說。 

「我情願你同我嘈，都唔想靜到連隔離屋出門口都聽到。」





 我停在房門前，繼續背向他。 

「我以為，你係嬲我唔比你講阿媽嘅事，但無諗過係幾年前⋯⋯」 

「兩樣都有。」我打斷他。

 「嗯⋯⋯嬲都正常，比我都會嬲。」說罷，阿爸沉默不語。 

「你講完啦。我而家入房。」 





「咪住！」他叫停我。 

寂靜片刻，他終開口道：「其實，我成日都想揾機會同你傾。

 細個你發脾氣扭計，比支汽水、買份玩具，你就即刻笑笑口，但越大，我越唔識分，每次都唔知你諗咩，唔知你係開心定係嬲緊。 

淨係覺得你大個仔，有自己諗法、有自己生活，唔會想阿爸阿媽管，所以就算阿媽走咗，我都唔知同你講咩好，我連自己都說服唔到自己要振作，仲點樣鼓勵你？」

「但你乜都唔講，就掟低我一個。」重提舊事，我不安得握緊拳頭，連指甲陷入掌心都不覺痛。 





「我知差你好多句⋯⋯對唔住。」 

「太遲，得把口係無用。」我冷淡說。有些傷痛，非一句道歉就能癒合得到。