不能愛上的星級女神2: 情迷巴黎(上)
和Candice享受完早餐,便和若嵐和Hilary一起去享受最後旅行日子的風景。
「呢度睇Paris嘅感覺都好唔一樣啊…」若嵐靠在欄上躬前身子欣賞美景的可愛,和身邊無時無刻保持氣質的Hilary形成對比。在這邊山丘看下去的風景,確實和在巴黎鐵塔有著不同的角度。
「咦?你哋都喺度啊?」李思晴和貓仔忽然的出現,打斷了若嵐和Hilary那種浪漫帶點曖昧的氛圍。「你哋又嚟睇風景呢~」我笑說。「向瑾瑜你都好意思喎~帶咗我過嚟咁多日,自己就掛住拍拖抌低我!」貓仔盯着我吐嘈道,她亦似乎不忘暗地留意着Hilary和若嵐的互動。「咁你唔介意嘅,今日可以跟埋我地玩。」「當然!」「我又要!」李思晴也匆忙上前說。「得~不過你嘅相機、錄音筆同電話就…」「得啦,我識做~」「咁行啦~」
我們在商場吃完午飯之後,若嵐看到一個無限時溜冰場,亦不太多人,便拉住Hilary走了過去。
「我記得你好似唔識溜冰㗎喎萬小姐…」Hilary穿好鞋,坐到我和若嵐中間,看著不太會穿鞋的我和她。「你識呀嘛~」若嵐無害地笑眼望向Hilary。「咁耐以前嘅嘢你都記得?」Hilary低頭,嘴角偷偷上揚,跪到若嵐跟前替她重新綁好鞋帶,舉動曖昧又甜蜜。正好貓仔和Candice從洗手間回來,看見這個版本的Hilary,貓仔的面上似乎有一堆很複雜的表情,彷彿連腳步也放慢了。
「哇係~咁曖昧嘅你兩個?」李思晴剛走回來便把若嵐和Hilary的氣氛打斷,Hilary聽到之後明顯有些退縮和避忌,匆匆平淡地轉移到我跟前替我綁鞋帶,若無其事地說:「呢兩個人唔識綁鞋帶,你哋又去咗洗手間。」「喔~係咩?」Candice仿佛有點故意捉弄她的語氣,坐到我身旁,直勾勾盯著耳朵紅了但表現得若無其事的關語芯。「點啊着好未啊你?」「得啦!」「咁去玩囉~」李思晴急不及待將我和貓仔推出去,差點把我直接推倒。「喂我唔識…」我差點失平衡,Candice剛好雙手扶在我面前,取笑我:「你越驚跌,就越會跌~放鬆啲啦!」
另一邊若嵐那種又害怕又撒嬌的聲音在附近傳來:「啊……唔要啊~~」Hilary在她面前扶住她,一邊倒後溜著:「放膽啲啦~我睇住你,唔會跌架。」「我…扶住先…」「若嵐,你比隻手我…」
我和Candice只是分了分神八卦一下,巧合貓仔和李思晴也溜到附近。「向瑾瑜!」被李思晴喊一喊,我失平衡推了貓仔一下,貓仔剛好倒了在Hilary身上。Hilary後背倒在冰上,和倒在她身上的貓仔硬碰硬地親上了嘴唇。「Wow…」我、Candice和李思晴看著凝望著彼此呆了的她倆,不禁在倒在一口涼氣。相反地,在旁邊的若嵐面色不多好,亦似乎在思考什麼。貓仔和Hilary重新站了起來,貓仔細心地邊關心她邊為她拍拍背上的冰:「Sorry啊阿芯,你痛唔痛啊?」Hilary搖搖頭,強顏歡笑:「冇事。其實都好耐冇聽過人咁叫我…」她們相望了一眼,貓仔只是默默拍走Hilary身上的冰,Hilary似乎亦若有所思。「Candice朱,你教我溜?」若嵐居然走到Candice旁,打破了她們之間尷尬的氣氛。Hilary聽到這句方才回過神來,但若嵐已經急急拖走Candice,那怕Candice回望我。我慢慢碎碎步地走向Hilary,她沒有管我們,只是默默走回場外在儲物櫃附近找了張長椅坐下,我便慢慢跟在她身後走並坐到她旁邊。
「點啊你?係咪整親?」我問候她,她搖搖頭,但面色不算很好地輕撫著胸口。「仲話冇?」她似乎真的有點痛,但還是若有所思似的。捂住了一會,她才開口:「向瑾瑜我冇事啊,少少痛咋。你去玩住先,我想自己坐多陣。」我對她說:「睇得出你煩緊女人啊~你同萬若嵐都咁啦,點解仲咁愁啊你?」她睨了我一眼,冷冷地回答:「你真係好八卦啊向瑾瑜!」「關心你咋!乜我唔係你朋友咩?」我反問。她望了我一眼,偷偷笑了笑:「得啦~有心。」