不能愛上的星級女神2: 命定論
「我飲。」Hilary把剩餘的酒喝先。「咁你要講一個truth！」我笑說。她深呼吸一口：「點啊？你想知啲咩？」「當然係你同若嵐啦！你對佢同對其他人咁大分別，你到底同若嵐發生過啲咩啊？」她斟滿－杯酒，望向若嵐的眼神有些曖昧。
「其實…」Hilary有點欲言又止，若嵐輕輕拉開她的酒杯，代她回答：「好喇，我代佢講。其實我岩岩出道果陣，同關語芯傾過一段短時間。果陣…」Hilary把話接過來：「嗰陣我啱啱報咗仇…」她苦笑：「但係就算報咗仇，個人都冇開心返，直至識咗若嵐。」我和Candice也很驚訝，沒想到她們原來很年輕時已經聊過天。「咁你哋…」Candice好奇問。「其實我哋都係見咗兩三個禮拜。我feel到Hilary好似有啲猶豫，之後就不了了知。」若嵐苦笑。「所以，其實關語芯唔係對你冇興趣，只係佢受咗重傷。我有冇講錯？」我望向Hilary，她只是默默地喝著酒，臉頰有點紅。若嵐低下頭沒說什麼，也默默呷了幾口酒。
「咁而家呢？」Candice問Hilary：「你仲係唔敢同人認真啊？」
Hilary沒有再掩飾表情，只是輕輕問若嵐：「其實…你大把選擇…」她欲把自己的酒從若嵐那邊拿回來，若嵐一手按在她手上，她們對望之間有點火花。「你睇我好好係咪？但其實我都係想有個女朋友可以喺身邊，錫我、對我好。」若嵐回應。Hilary說：「Janet無論乜嘢條件，都應該係你杯茶。」「係呀，佢好好。但係佢嘅工作始終喺台灣，而我喺香港，我唔係唔想同佢發展，但係遠距離真係唔容易。」若嵐剖白心聲，我和Candice也在細心聆聽。若嵐和Hilary再次曖昧對望，平時獵食者眼神、氣場強大的Hilary，仿佛又再次卸下防火牆，感覺很溫柔。
Candice把若嵐拉過去交換位置，Hilary卻表現得有點卻步。我把Hilary推近若嵐，讓她們坐近了對方。若嵐主動拿起Hilary的酒杯喝下去，唇印深深印了在杯沿。這個動作讓我想起重遇若嵐的那杯咖啡，看來這個萬若嵐是真的很會撩女仔。Hilary望著唇印有點猶豫，但還是對準唇印便喝下去。對，沒記錯，這個關語芯對著我的第一杯濃綠茶，也是一個唇印深印下去。她們兩個…看來真的蠻登對。
「關語芯，你以後仲敢周圍獵食嘅話，仲有個Janet唔會放過你！」我取笑Hilary。Hilary什麼也沒有反駁，默默地在唇印上喝酒。「你比d時間佢啦～」若嵐仿佛也有點沉思，偷偷望向這個暗地在皺眉的Hilary。若嵐又對我說：「你氹返Candice未呀？」又望向Candice：「拿朱浩婷，以後我同你之間嘅見面，我會盡量同埋瑾瑜講。比足信任你男朋友，我做好自己果part架啦！差你炸！」Candice與我對望著，從雙方的眼神中，也感覺到我們心底裏還有不少問題想問對方。「得啦！我同瑾瑜返香港會再傾下。」看見Candice呷著酒，我也低頭喝酒。「不過我建議你地要處理下章樂言。」Candice 在這些愛與不愛之間的決定，還是－貫地愛恨分明，補充說：「我唔知佢同你地咩關係，但我睇到佢呢段時間望住瑾瑜同Hilary個感覺都好複雜、好唔一般。向瑾瑜，人係你帶過嚟嘅，你都要同人地傾下。」「嗯我知道啦。」我點頭。若嵐望向Hilary，Hilary便對Candice坦白：「其實章樂言系我個ex。」Candice奸笑，烘近Hilary：「估你唔到喎關語芯！睇嚟佢都hurt得你好深。」不過之後Candice也認真地補充一句：「不過Hilary，多謝你信我。」Hilary聽到這句，由心而發的微笑：「你同向瑾瑜果然好似。」Candice耳朵也紅了。若嵐再靠近Hilary，含情脈脈又溫柔地望向她：「你以後有我哋喺身邊，我哋以後都係你好朋友。你趕我，我都唔會走架。」Hilary有點驚訝、耳朵紅紅望向若嵐，溫柔地為她撥開擋住她眼睛的瀏海，二人非常曖昧。
我們再聊了好一會，大家臉蛋也紅紅，特別是關語芯，這次是醉倒在若嵐懷中。若嵐將她放在床上，一直貼在她身邊坐著睡，握緊她手讓Hilary伏在她肩上睡。這麼溫柔又會照顧人的萬若嵐，我和Candice也不禁多看幾眼。
「估唔到關語芯份人同我嘅認知係差咁遠。」我和Candice把桌上剩餘的芝士蛋糕吃清光，Candice似乎還有些驚訝能發現到這個像洋蔥一樣一層層的Hilary。「其實佢已經封閉咗自己差唔多十年，心入面一定係好矛盾。一方面想搵一個自己可以相信嘅人，一方面又唔夠膽再放個心比人，佢個心一定好攰。其實佢真係唔係人地以為佢嘅咁樣，我覺得佢其實係好想同人建立可靠嘅關係。」我喝了一口酒，心中感慨著。「十年…女人青春有限，其實2字頭嘅青春真係好珍貴。」Candice也呷了口酒。
「你信唔信命中注定？」我問她。Candice思考了一會，皺著眉頭說：「緣份有時真係命中注定，不過我都覺得自己係可以掌握之後嘅發展。可能因為如果完全相信所有嘢都係整定，會覺得好無力。」「我都係咁諗。」我再望向似乎已經睡著的若嵐和Hilary，補充：「啱嘅人，可能兜兜轉轉，都係會返返去你身邊。冇緣份嘅人，就算一直係你身邊，都係唔會一齊。」Candice再次和我對望，但眼中感情比剛才複雜了。