不能愛上的星級女神2: 狼羊物語
「哇關語芯,今日到你想買爆卡呀?唔似你喎。」我追上正在急步走的她。
「你知唔知,開心同唔開心,女人都係咁中意買嘢?」她嘗試像平常一樣掩飾自己內心,但還是被我感覺到她有煩心事。她提起一件乾濕褸放在身上問我:「靚唔靚呀?」
「你中意嘅就靚。」
「佢-定唔會咁答我…」她喃喃自語,又在沉思。
「你今日冇野嘛?」我關心問,她一瞬間又了回復平時有點輕佻的樣子,一手牽着我:「你陪我揀份禮物送比人,我送隻錶比你?行啦。」
她掠過所有名牌店,直奔家品區和食物區。
「乜你買呢啲架咩?」
「佢…唔算好好名牌。」
「你唔好話我知,你買比萬若嵐喎…」她沒有回答,但她走開時的不自然已經回答了我。
「你同佢琴晚做咗咩啫?」我追上前八卦,她很平靜地回答:「咪同你哋傾計囉。」
「傾計會傾到你今日變曬?關語芯,你平時好瀟灑架喎。」她放下手上的名貴餐具,忽然認真地望向我:「向瑾瑜,你真係了解我咩?」第一下確實被她嚇一嚇。
「我當然唔了解!因為對你黎講我唔係你朋友,但我由頭到尾都選擇咗信你。而且,啲人對於你黎講,唔係就淨係好玩同有火花咋咩?」我確實有點兒因為她這一句而生氣,但我明白她只是在保護自己,其實沒有對錯。「對唔住…我知道你係因為以前發生嘅事,所以比較保護自己。我…」趁她未回應,我立刻作出補充。
「唔使道歉,你冇講錯。」她淡然帶過,但似乎若有所思。她又轉身去看其他用品,並告訴我:「我同Gary請咗假,我諗住留到佢哋拍完戲先返香港,你都可以留低陪朱浩婷,有需要我可以搵人幫你改機票同book酒店。」
「Hilary姐,你真係好難捉摸!」既然如此,我亦不怠慢立刻告訴Gary和程心,亦同意讓關語芯幫忙改機票。
「你估…我買嘢食好唔好?」她邊走下扶手電梯邊問我,我笑着打量她,又有點坦白地講:「你真係……喂但其實萬若嵐唔啱你架喎。你個人咁playful咁冇安全感,若嵐點可能會同你一齊啊?」她的笑容中似乎帶點自嘲、又有點神秘:「我知。」
「咁你…」
「點解送禮物一定要有原因呢?」她似乎還是在掩飾什麼,我只好半舉手投降。
我們在市中心附近行逛、看風景,Hilary最後還是買了芝士蛋糕,和我一起去接她們收工。若嵐和Candice下班看見我們也蠻驚訝,因為理論上我們明天就會走,原本今天亦未必會來看她們。但當Hilary拿著芝士蛋糕走向若嵐時,若嵐面上寫滿了複雜的表情,包括不滿和生氣。
「若嵐姐,我買咗芝士蛋糕…」從來未聽過Hilary會用這麼溫柔和客氣的語氣對女生,Candice也看呆了。
「Candice你拎去啦,我食唔落…」若嵐一眼也沒顧向Hilary,轉身走開。Hilary追了上去她跟前,一臉抱歉地想千方百計攔住若嵐:「萬若嵐!你介唔介意聽我…」
「你行開啦!」認識若嵐那麼久,她脾氣向來也很好。而且如果是平時的關語芯,肯定不會對任何人這樣紆尊降貴。Hilary仍然堅持著:「唔係咁架…」「玩夠未啊關語芯?我唔知你想點啊…」若嵐有點不耐煩。
「你都係怕我爆你大鑊姐?我咪應承咗你囉。」若嵐和Hilary之間那個非常複雜又曖味的對望,相信不止我,連Candice也似乎很好奇。
「唔係呀…」關語芯看著若嵐的背影,她回頭時我和Candice也在看著她。Candice主動對我說:「不如叫Hilary返去先,我地去問下若嵐?」我點頭,上前對Hilary說:「不如你去行下街,今晚交比我同Candice?」她輕蔑一笑:「唔洗啦。」又把蛋糕放下給我:「你同Candice食啦!」未等我反應過來,她已經離開了。
Candice走到我身邊,我把芝士蛋糕給她,問她:「點呀Candice姐?有咩高見?」「其實話就話Hilary平時淨係會同男人玩,我從來冇聽過佢會搵女人。不過,就算佢哋真係發生左關係,Hilary都應該…唔會咁?」Candice反問我。
「以關語芯之前啲行為,玩夠同未玩夠果啲,應該都…唔會咁?」我又「戴頭盔」補充:「其實我從來都唔知佢諗乜。淨係知佢想玩嘅時候就會有方法…會唔會係佢想同若嵐玩,若嵐唔想?不過Hilary咁叻睇人同揀人,理論上唔玩嘅人,佢係絕對唔會嘥時間。」
此時若嵐回來了,Candice主動上前說:「若嵐,我地今晚三個人dinner,好唔好呀?」她點點頭,我們收拾好東西便去吃晚飯。