情人節那天，我在衣櫃中找到我生命中的天使: 第十四章：我都諗唔到今章改咩標題

 
  「我都幾中意飛虎架，由其係佢地首<登陸地球>真係好正呀。」
 
  「你記錯啦，<登陸地球>係天堂雀架，呀，不過原來阿敬你中意天堂雀架？真係估唔到喎。」
 
  「係咩，唔好意思呀，一時記錯添。」
 
  「哈哈，又會咁大頭蝦既……」
 
  阿敬同小櫻既對話聽落好似好和諧，但係喺佢地冇幾遠既旁邊就有兩個人忙到好似打緊仗咁。




 
  「乜<登陸地球>唔係飛虎架咩？」
 
  「主人你查清楚先好打啦！」
 
  「我都唔想架，急得濟打錯野啫。」
 
  「點算呀，如果繼續講錯野既話會唔會搞到佢地既關係差咗，最後令到阿敬佢追唔到小櫻架？」
 
  「我都唔知架，不過冇辦法啦，我地都洗濕咗個頭，唯有頂硬上架喳。」




 
  老實講，今次真係我用WhatsApp咁耐以嚟用得最辛苦既一次，仲痛苦過藍剔初初出現嗰時。
 
  「不過話時話呀，其實點解阿敬你會中意天堂雀既？我仲以為得女仔先會中意佢地既添，男仔唔係一向都中意啲可愛既女明星架咩？好似係ABC48之類呢……」
 
  唔係掛，今次要諗原因？咪就係因為見你中意MK POP 我先要阿敬話自己都中意MK POP嚟迎合你口咪囉！不過呢啲野又點可以要阿敬講出口先得架，惟有諗過第二個借口啦，哎呀，真係好難諗呀。
 
  「因為佢地跳舞好勁呀，又chok得有型喎，搞到我都想自己變到佢地咁有型囉。」
 
  好野呀羨婷，估唔到你會諗到點樣接落去喎，好彩今次有你喳。




 
  「其實你本來都夠型啦。」
 
  「咩…咩話？」
 
  「噢…我…我既意思係阿敬你平時都已經好有型架啦。」
 
  阿敬即刻變得好怕羞，塊面變得好紅，唔敢望住小櫻之餘佢食野既速度明顯提升咗好多。
 
  「阿敬，不如我地一齊……」
 
  阿敬聽到呢到既時候嚇到飯都噴埋出嚟，小櫻見到之後好快就拎張紙巾出嚟幫阿敬出抺嘴同埋拍下佢背脊等佢舒服啲。
 
  「阿敬你冇事呀嘛？都唔明你點解食飯點解要食得咁急既，我地有兩個鐘喎，慢慢食都得啦，雖然我唔係食好多野啫，但係我陪得你食呢個套餐就當然會全力幫你啦。」
 




  「唔…唔係呀，你頭…頭先話乜野一…一…一齊呀？」
 
  到底小櫻佢唔係諗住咁快就喺到表白下話？唔係掛，女仔居然會做到咁主動？不過咁都好既，咁既話我同羨婷就唔洗再諗點樣去幫阿敬佢追人啦。
 
  「一齊？哦，我係想講有冇興趣遲啲一齊去唱卡啦OK，既然我同你都咁中意MK POP，一於去唱曬佢地啲歌啦，我諗到時一定會好爽架！」
 
  唉，空歡喜一場。
 
  「係啦主人，如果我食野噎親既話你會唔會……」
 
  「吓，你講咩呀？」
 
  「算啦冇野啦……」
 
  都唔知佢無啦無喺到講啲咁既野做乜？明明而家就好忙架啦，仲喺到講埋啲咁奇奇怪怪既野。




 
  「好…好呀，遲啲得閒我地一齊去啦。」
 
  小櫻做出一個好滿意既表情之後，佢地兩個又繼續食野。見到阿敬佢食野既時候嘴角微微上揚，睇嚟佢知道遲啲可以同小櫻佢兩個人單獨去唱卡啦OK，而家覺得非常興奮。
 
  但係講完呢件事之後個氣氛又好似平靜返落嚟添，點算呀，仲有乜野好講呢？
 
  我望住羨婷，而羨婷佢又望住我，我地真係點諗都諗唔到喎。
 
  「係啦，唔知你有冇睇過AV呢？」
 
  「…………」
 
  小櫻佢聽到之後成個人呆咗。
 




  阿敬你發乜野神經呀，我地冇比指示你既話就唔好亂講野啦，仲要…仲要講埋啲咁既話題！
 
  「弊啦主人！」
 
  「我都知弊啦，明明我地乜指示都冇send，點會估得到阿敬會無啦啦講啲咁既野先得架。」
 
  「唔係呀主人，唔知點解我比人拉咗入個咸濕WhatsApp Group到呀，入面啲人打既野都會自動轉發到阿敬到架！」
 
  「點解會咁架？」
 
  「咪話咗唔知點解囉！」
 
  「快啲Quit咗個Group佢啦！」
 
  「係…係……Quit咗啦。」




 
   比著係平時既話我一定會打返句『我要真選舉』落去，不過今次情況真係太過緊急，所以都係求其Quit咗佢算。
 
  「但係咁喎主人，阿敬佢地嗰邊應該點樣傾落去呀？」
 
  「咁呀……」
 
  救命呀，點樣解決呢個問題真係煩過梵蒂岡呀。
 
  「阿敬你都曳曳啦，居然同我講埋啲咁既野，仲以為你係一個好純品既人嚟添，點知呢……」
 
  小櫻點解呢個時候會咁答架？死啦，佢實對阿敬既印象愈嚟愈差啦，點算呀…………