情人節那天，我在衣櫃中找到我生命中的天使: 第十五章：男人睇AV其實有咩出奇呀？

  「冇……其…其實我係想問你有冇睇過Animal Video啫，呢個笑話係咪好好笑呢……哈…哈哈……」
 
  估唔到會發生啲咁既意外，事到如今唯有盡量去解釋啦，希望唔好令小櫻對阿敬既印象跌得太多啦。
 
  「……………」
 
  小櫻佢一聲都唔出，唉，睇嚟解釋失敗咗，又係既，就算要喺女仔面前講笑都唔會講啲同AV有關既野啦下話。
 
  「哈…哈……係咪唔係幾好笑呀，對唔住呀…………」




 
  阿敬耷低頭唔敢望小櫻，而小櫻佢就對住阿敬搖一搖頭。
 
  「唔係呀，其實都幾好呀。」
 
  阿敬聽完之後尷尬咁微笑一下。
 
  「其實呢，我覺得阿敬你今晚好似有少少唔同呀。」
 
  小櫻佢唔係發現咗我同羨婷一直都係喺阿敬後面幫緊佢下話？！作為一個女仔，呀，應該話作為一個人，你會唔會太利害呀？




 
  「點…點唔同呀？」
 
  「點講好呢？我覺得你今晚好似比平時更加呢……」
 
  「更加……」
 
  「更加可靠呀，以前你同親我講野都係窒下窒下咁既，之不過今晚食飯開始你講野就變得好流暢，直情好似變到第二個人咁呀。」
 
  梗係啦，佢只不過係照讀我地send比佢既說話啫，咁又邊會有可能窒下窒下先得喎。如果冇我地喺到？阿敬佢講野一定會窒過打機達卡關呀。




 
  聽到小櫻咁樣講佢之後，阿敬佢既表情睇落又變得尷尬起嚟，不過同之前唔同既係佢雖然睇落好尷尬但係呢一種尷尬應該係因為佢開心到唔知點反應好。
 
  「係…係咩……呀，不如我地都係快啲食囉，雖然話就話有好多時間啫，之不過保險啲都係食快啲啦。」
 
  「嗯，好啦，我地都要加油，唔好輸比呢一盤焗飯呀！」
 
  阿敬同小櫻兩個又開始食野，而我同羨婷終於都鬆咗一口氣。
 
  「呼……仲以為因為今次會因為講錯一句野搞到小櫻對阿敬既好感度會大大下降添，好彩過到骨啫。既然佢地而家既氣氛都變得唔錯啦，咁我地都唔洗擔心太多啦，快啲食野啦，啲野食都凍曬啦。」
 
  「…………」
 
  「羨…羨婷……？你冇野嘛？」
 




  「好彩？咁叫做好彩？點解你可以咁唔醒目架？要你做少少野都搞成咁？唉，我真係對你好失望呀。」
 
  咁既語氣唔通係……
 
  「如果阿敬佢今日表白失敗既話我話你知我點都唔會放過你呀！」
 
  我望一望羨婷對眼，從佢嗰對好似獵豹咁既眼神當中我可以好肯定佢又已經爆咗seed。
 
  「由頭先開始呀………@$%&#$(*@#&(*@#)) 」
 
  羨婷佢一味喺到話我，老實講真係好鬼煩呀，講啲野仲煩過一個五歲小朋友喺到講佢第時有冇地方住。
 
  不過點都估唔到喺羨婷既連珠炮發之下，潛藏喺我心入面既怒火終於都要爆發，我真係頂唔順呢個羨婷對住我喺到話我呢樣唔好嗰樣唔好。我而家咩都唔想理，我唯一想做既就係令到羨婷佢唔好再嘈。
 
  雖然要羨婷佢唔好出聲應該有好多方法，只要我多些思考多發問就會諗到，之不過情急之下，我直覺伸手喺枱面拎起一件PIZZA 塞入去羨婷既口入面，而家諗返起，呢個動作用「快狠準」嚟形容一啲都唔過分。




 
  「唔好再嘈啦！」
 
  我唔記得自己對上一次咁大聲同羨婷講野係幾時，因為一直我都唔會亦都唔洗咁樣做。
 
  可能就係因為我平時都冇咁做，所以羨婷佢都知自己過咗火位，當我塞完塊PIZZA入佢口之後羨婷就一句聲都冇出，好專心咁食野…………就奇呀！
 
  羨婷佢一路咬件PIZZA，咬下咬下最後咬埋落我隻手指到，嗰下真係痛到我飛起。
 
  「BB你睇下啦，人地男朋友細心到會餵佢女朋友食野呀，我唔制，我又要呀………」
 
  呢個時候坐我隔離枱既一個女仔對住坐佢對面既男朋友講。
 
  你冇野下話，我頭先坐喺到比羨婷佢鬧到成個傻仔咁你唔係見唔到掛，仲有呀，我呢啲叫塞入佢個口到，而唔係叫做餵囉！唉，坐佢對面既嗰個男仔，估唔到你會同個咁既港女一齊，真係辛苦你囉……
 




  就喺我比羨婷咬到痛濟，縮返隻手之後，羨婷用曬兩隻手黯住佢個嘴，眼神由獵豹慢慢變返做一隻可憐既貓仔望住我。
 
  「我…我……唔係有心咬…咬………」
 
  羨婷佢講野既時候成把聲震曬，好明顯佢對爆咗seed既自己所做既事感到好驚訝。
 
  講到一半既時候，羨婷佢已經成個人趴咗喺張枱到細細聲咁喺到喊。
 
  「嘩……我真係唔知應該點道歉至好呀，嗚………嗚嗚………」
 
  喊？！唔好喊啦………雖然我對羨婷嘟嘴扮可愛係一啲都唔受啫，但係我對佢喊就真係一啲辦法都冇。
 
  「你…你唔好喊啦……錯既都…都唔你………」
 
  我嘗試去講啲唔同既野去令到佢唔好喊，但係可能我比佢喊既樣嚇到成個腦實曬，最後都諗嚟諗去都諗唔到要講啲乜野好。




 
  如果比我再遇到爆咗seed既羨婷既話一定會盡我全力去鬧佢呀，一日都係佢先至會搞到咁可愛既羨婷喺到喊既！
 
  「之不過……我頭…頭先…………」
 
  「唔好理頭先啦，我知道你唔係有心架啦。」
 
  「咁……」
 
  羨婷佢終於都冇再喊，之不過佢睇落依然唔係好開心。
 
  「都係繼續食野啦，如果你一直都好似個苦瓜干咁都冇用架啦，睇到你唔開心既樣，反而我會食得唔安樂呀，你快啲笑返啦好唔好？」
 
  「嗯，我知道啦。」
 
  羨婷講完之後就對住我笑，不過我睇得出佢只係因為唔想我擔心而笑，並唔係發自內心笑出嚟。雖然我隻手指仲係痛緊，而且手指既牙印都仲未散，不過見到羨婷佢為咗我咁做，我決定扮到咩事都冇，費事搞到佢更加唔開心。
 
  好彩接住落嚟都再冇乜野奇怪既事發生，冇幾耐之後我地全部人都食飽曬，準備離開餐廳。


--------------------------------------------------------------------------------------------------------------
我諗個故呢個月就會完架啦
而且應該會隔日更新, 希望大家會中意啦 :)
希望大家會share個故比朋友睇, 等呢個故多啲人識啦
大家記住like個Facebook Page同埋上紙言到禁「追稿」呀！