情人節那天，我在衣櫃中找到我生命中的天使: 第十三章：聽多啲歌就唔洗怕冇話題啦
第十三章：聽多啲歌就唔洗怕冇話題啦
「唔係掛？！」
咁耐以嚟都係你喺到指揮架喎，點解你會問返我轉頭架？我又點可能知道先得呀？
「我…我真係唔知喎……」
你係扮野定係點呀？你唔知，唔通我會知咩？我知既話一早就話咗比你知啦。你係唔係拍緊「搞野王」呀，唔好整估我啦，我好細膽架喳。
「主人你唔好睇落咁驚青啦，我地一齊諗下點答佢仲好啦。」
「你…你唔係話自己一遇到啲愛情既事嗰陣就會變到第二個人咁架咩？點解你……」
聽到之後羨婷佢呆咗一下。
「咁係因為……」
「因為乜野呀，快啲講啦。」
「其實嗰個型態唔會連續維持好耐架，只要我中途變返本來咁既話，咁我就要一段時間之後先會變返做嗰陣時咁。」
乜爆seed原來係有限時架？搞到好似打機咁……
「我都知自己一去到嗰種型態既話，面對愛情問題既時候頭腦就會轉得好快，但係我暫時都變唔返，所以而家唯有靠我地兩個幫阿敬架啦。」
「但係愛情呢啲野我都只係識得一條鐵喳喎。」
「咁…咁…咁頂硬上啦……」
真係點都估唔到事情會發展到而家咁，本來仲以為羨婷佢會搞得掂架嘛，唉，而家唯有見步行步啦。
「咁叫咩食好呀主人？」
「既然唔變都變咗，不如叫佢地食嗰個雙人餐啦。」
「係咪真係得架……」
「唔知呀，不過反正諗嚟都無謂，死就死啦。」
雖然羨婷佢個樣望落好似充滿問號，
『一於食嗰個雙人套餐啦。』
我同羨婷帶住滿腦子既疑問send咗出去，禁制既時候隻手指仲有少少震震下。
「主…主人，咁做係咪真係得架？」
「我都唔知架，希望得啦……」
阿敬佢聽到之後就同個侍應講要一份雙人套餐，雖然講野既時候同頭先一樣有啲尷尬，但係程度就冇之前咁嚴重，封閉空間亦都慢慢消失。
「阿敬，萬一我地食唔曬點算呀？」
「冇事既，我平時食好多野架，幾大份都好有我喺到既話一定會食得曬既。就算你食唔曬我都會幫你食埋！」
「咁…好啦……」
大約五分鐘之後，侍應送嚟一份好鬼大既白汁雞皇焗飯，咁當然好例牌咁上面係有啲白汁，有啲雞皇。雖然感覺上吃落應該同一般既雞皇飯唔會有太大分別，但係呢盤飯真係好大份，好似大快樂嗰啲餐盤咁大，真係見到都飽曬。
阿敬同小櫻兩個人都呆咗咁望住盤焗飯，然後好用力咁吞咗一啖口水，然後眼都唔眨咁望住盤飯，個身就好似僵硬咗咁。
「嘩，乜個焗飯咁大既，阿敬我地係咪真係食得曬架？我怕我地吃唔夠一半就飽曬，到時浪費食物就唔好啦。」
「冇…冇事既，我地一齊食啦。」
阿敬佢震抖既聲線好明顯將佢出賣咗，仲要係好徹徹底底咁出賣咗。
呢個時候，侍應放咗一個鐘喺枱上面。
「兩位準備好啦嘛？係咁既話限時兩個鐘，而家開始！」
兩個鐘？我唔係聽錯下話，咁多時間我慢慢食一個人都食得曬啦，早知我都叫呢個焗飯，咁既話今餐咪可以免費囉……
冇幾耐之後，我地張枱點既食物都送到嚟。
「既然佢地既食物都嚟到啦，我地唔洗咁膽心佢地架喎。」
「咁又係…………」
「我地都係食咗野先啦。」
「好啦……」
不過講就係咁講，羨婷佢食野既時候只係掛住望部手機同埋阿敬佢地，完全冇理過坐佢面前既我。「情難自禁我是其實屬於極度容易毒丁一個人」，唉，真係好悶呀。
「羨婷你都係專心食野啦，阿敬佢應該識點做架啦……」
「之……之不過我真係好膽心阿敬佢喎，雖然唔係平時既我應承阿敬幫佢去表白啫，但係始終都係我應承咗佢，好應該盡力幫佢架嘛。」
「咁你諗住點幫佢呀？」
「呀，不如叫阿敬佢諗啲話題同小櫻佢講下啦，咁會唔會好啲呀？」
「都得既，但係要佢講乜野好呀？」
「不如叫佢地傾下自己既興趣好唔好呀？」
「都得既……試下囉。」
就係咁，我地又再次向阿敬佢傳送指令。
『阿敬你一陣聽到我地有咩指令就照讀得啦。』
阿敬僵硬既身體終於回復正常，然後佢就向我地點一點頭。
『係呢，小櫻你有冇話中意聽咩歌架？』
「係呢，小櫻你有冇話中意聽咩歌架？」
阿敬佢真係照住我地send比佢既野講，仲要係一字不漏咁讀出嚟，好似諗都冇諗過到底我地send比佢既野到底有冇問題，不過咁都好既，起碼唔會比小櫻佢覺得阿敬講野好生硬。
「聽咩呀？諗下先，歌就冇乜話特別中意既，不過呢我就好中意一對叫『飛虎』既年青人組合，只要係佢地既歌我都中意架？」
聽到之後我同羨婷佢互相對望。
「羨…羨婷呀，乜野係飛虎呀？」
「飛虎咪係MK POP既其中一隊組合囉。」
「MK POP？但係我只係識天堂雀喳喎。」
「吓？但係主人我都唔係好識飛虎既事架喎。」
「咁…咁我地點樣接好呀？」
唉，仲以為諗話題係好容易既事，結果搞到自己咁麻煩添。