情人節那天，我在衣櫃中找到我生命中的天使: 第十二章：清潔劑永遠都唔會話自己100%殺菌

 
  「哼，而家咪有囉……」
 
  唉，乜你咁鬼中意用魔法架，講極都唔聽既……
 
  就喺冇幾耐之後，餐廳入面響起咗一段廣播。
 
  『各位顧客，為咗慶祝呢一年就快過去，我地特別喺今日推出一個二人套餐，如果你地可以喺限時之內食得曬我地整既特大焗飯既話，今餐唔單止免費之餘，我地仲會送出一份特別既記念品添。』
 
  我再次用一個無奈既眼光望住羨婷。




 
  「你唔係要變出一個情侶套餐既咩？你做咩喺變個咁既套餐出嚟呀……」
 
  「咁…咁……」
 
  羨婷合埋眼之後就耷底頭唔望我，嘴好不自覺咁喺到磨牙，比到人一種好唔奮氣既感覺。
 
  「係就係兩個人既套餐啫，但係唔係比情侶套餐嚟架喎。」
 
  「咁……」




 
  「定係你又諗咗啲唔知乜野計劃呀？」
 
  「呀………！！！」
 
  羨婷似乎聽到好唔耐煩，叫咗一聲之後開始不斷用拳頭打我。不過唔知係唔係佢頭先瘀得滯搞到佢用唔到力，雖然佢係就係打我，之不過個力度都只係輕輕掂到我就收手，感覺上一啲都唔痛，只係有少少煩啫。
 
  「哎…哎呀……唔…唔好打我得唔得呀。」
 
  打咗我都唔知幾耐之後，羨婷佢終於冇再打我，我望住佢，見到佢表情變得好驚慌，然後呆咗咁望住自己對手。




 
  「我…我……我冇心打主人架………嗚嗚……」
 
  講完之後，羨婷佢就細細聲咁喺到喊。
 
  死啦，發生咗啲乜野事呀，旁邊啲人好似聽到喊聲之後一個二個都慢慢擰個頭嚟望住我，以為我搞喊你啦，唔…唔係比我話一話就搞到喊掛………
 
  「你…你唔好喊住先啦，咁…咁……」
 
  「我真係冇心打主人你架，只係我頭先衝動得滯先會咁做，主人你唔好誤會我呀……嗚嗚……」
 
  呀……叫得我做主人即係話佢又變返本來咁啦，不過佢幾時掂過我呢？唉，原來佢出拳打我打到自己變返本來咁………咪住先，而家唔係理呢樣野既時候呀，羨婷佢繼續喊既話，我一定唔洗走出呢間餐廳門口都似啦。
 
  「我梗係知道你唔係有心打我啦，你都係玩 – 下 – 既 – 啫，係唔係呀？」
 




  我努力去強調『玩下既啫』呢四個字，讀到有咁慢就得咁慢，希望咁做既話其他人唔好再用奇怪既眼光望住我啦。
 
  「即…即係話主人你唔會嬲我呀。」
 
  「哈…哈哈，梗係唔會啦，你都唔好喊啦，比其他人見到就唔係幾好睇啦。」
 
  可惜，其實全間餐廳啲人都已經睇曬。
 
  「唔…我…我知道啦……」
 
  講完之後羨婷佢既情緒慢慢開始平復落嚟。不過既然佢情緒平復返，咁我就可以問返清楚到底頭先發生咩事啦。
 
  「係…係啦，羨婷你頭先係咪用咗魔法呀？」
 
  「唔……」




 
  羨婷佢有啲落莫咁點咗一下頭。
 
 
  「我知道主人你好擔心我既天使點數，但係我仲用魔法……我真係好…對…對……主人唔住呀……」
 
  羨婷對眼又再次開始變得水汪汪。
 
  「唔…唔好咁啦，我都冇怪你，我知道你唔係有心架啦，你都係一時衝先會咁做啫，反正唔用都用咗，你都唔好再咁唔開心啦。之但係你唔係要變出一個情侶套餐既咩？點解最後會變到個咁既雙人套餐出嚟架？」
 
  羨婷聽完之後嘴角微微地咁向下彎，雖然唔似要喊，但係感覺上變得更加失落，而且仲覺得有啲唔係幾好意思。
 
  「其實呢……」
 
  「其實？」




 
  「其實我頭先魔法出現失誤。」
 
  「失誤？」
 
  「主人你都知我都仲係一個見習天使嚟架啦，其實我用魔法都唔係好成熟架喳，有時都會出現少少失誤既。」
 
  「唔係掛……」
 
  「我開頭真係諗住變個情侶套餐出嚟架，之不過唔知點解最後出嚟會係咁既……」
 
  「唔係掛……」
 
  「不過情侶套餐都係兩個人食既啫，我諗而家咁應該唔會太大問題既。」
 




  「唔係掛……」
 
  「哎呀，主人你唔好成日都『唔係掛，唔係掛』咁啦，人地真係盡咗力架啦，你都唔知道人地用魔法用得幾辛苦……」
 
  講完之後羨婷佢又出番佢既招牌嘟嘴。
 
  「對唔住囉，咁我真係唔知呀嘛。」
 
  「講對唔住都冇用呀，主人你一定要陪我搵返多啲天使點數返嚟先原諒你呀。」
 
  「好啦……」
 
  「好野，嘻嘻……」
 
  見到羨婷佢既心情好似好返好多咁，我自己都放心曬。
 
  就喺我地傾得興起既時候，羨婷部電話響起一聲提示聲，打開一睇，原來係阿敬喺到求救。
 
  『冇情侶餐喎，咁我地點乜野食好呀？』
 
  唉，頭先發生既一連串事件搞到我都唔記得阿敬佢地既存在添。
 
  「到咗最後都係冇情侶套餐，咁樣阿敬佢地應該叫乜野食呀？」
 
  「……」
 
  羨婷佢冇理到我，然後佢又再次耷低頭。
 
  經過今日發生過咁多既事，我已經有曬經驗架啦，咁做就即係代表羨婷佢又開始爆seed啦。我知道一有愛情方面既難題，就算幾棘手都好啦，爆咗seed既佢一定會搞得掂既。
 
  但係冇幾耐之後，羨婷佢抬起頭，嘟長咗個嘴望住我。
 
  「我…我都唔知點做喎………」
 
-----------------------------------------------------------------------------------------------------------
雖然學校既野開始忙, 但係我都會盡力keep住而家咁兩, 三日更新既
不過真係估唔原來高登到個POST只要過咗一個月就推唔到
所以而家要去過一個新既POST啦, 咁麻煩真係好對唔住
http://forum3.hkgolden.com/view.aspx?type=SY&message=5647707

大家記住要叫朋友一齊睇 同埋 喺紙言呢到追稿呀:)