情人節那天，我在衣櫃中找到我生命中的天使: 第七章：去得睇戲就同我專心睇戲

 
  『我 - 好 - 中 - 意 - 你。』
 
  吓？！點解羨婷你要打埋啲咁既野呀？不過羨婷佢又繼續打……
 
  『我好中意你，呢啲說話要留返一陣先講……』
 
  點解你要咁對我呀！而家就同我坐埋一齊，但係轉頭就要同第二個男仔表白？！你幾時識咗個咁既男仔架？
 
  但係當我睇清楚到底佢同緊邊個WhatsApp緊既時候……唔係掛，居然係……阿敬……




 
  「羨…羨婷你做…做…做乜同阿敬佢WhatsApp呀？」
 
  「…………」
 
  羨婷佢理都冇理下我，只係一味好專心咁望住自己部手機。
 
  「羨婷……」
 
  「你咪嘈啦。」




 
  唉，呢次真係少年我太年輕了，原來剛才講嗰一句說話就已經搞到佢爆咗seed ，好似無能遊戲咁召喚咗另咗一個我。雖然我知道只要我掂一掂佢就可以令到佢變返原狀，不過相比起呢樣，我心入面只係想知點解佢要喺呢個時候打埋啲咁既說話。
 
  「你做乜喺到WhatsApp呀？仲要同阿敬佢講…講埋啲咁既野……」
 
  講完之後，羨婷佢睥咗我一下，然後深深嘆咗一口氣，好似又想鬧我咁，之不過最後都冇咁做到。
 
  「算，你唔知係咩都唔出奇既。」
 
  咪又係WhatsApp，有幾巴閉呀？你估全世界得你用咩？你未落嚟人間既時候我都已經用緊啦！




 
  「其實我頭先拎比阿敬佢既耳塞係比我施咗魔法，我喺電話到打既野都會轉化為聲音傳入佢既腦到，咁既話就算我地唔喺阿敬身邊，我地都可以教佢點樣去追到小櫻啦。」
 
  「洗唔洗咁做呀，其實你直接比個藍芽耳機佢咪得囉。」
 
  「藍芽耳機咁大部，咁咪好容易比小櫻佢知道係我地喺後面教緊阿敬佢囉，唉……咁都要講出嚟既。」
 
  有冇咁計算得咁清楚呀？！而家玩攻心計咩？
 
  「咁你同阿敬佢打埋啲咁既野……」
 
  「咩叫打埋啲咁既野呀，我只係同阿敬講表白呢啲野千祈唔可以心急，今日一連串既行動都係為咗令到小櫻對阿敬既好感上升，然後一口氣喺倒數嗰時表白，咁做既話成功既機會大好多既。我個計劃咁完美，萬一佢而家講錯野咁咪前功盡廢？！」
 
  好彩羨婷佢唔係要同阿敬佢表白……咪…咪住先，點…點…點解我咁緊張，其實我都未正式同羨婷佢表白，佢都未算係我女朋友嚟，咁既話，就算佢真係有其他中意既人都唔出奇既，唉，不過呢…………
 




  羨婷解釋完之後又繼續對阿敬傳送指示。
 
  『你同我全程望住小櫻佢既表情，如果佢既表情有咩特別起伏既話要立即記下劇情係講乜，遲啲傾劇情唔好冇野好傾呀嘛……』
 
  「但係咁喎，如果比小櫻見到阿敬成日望住佢既話，佢唔會起疑心咩？」
 
  「冇事既。」
 
  「你又會知冇事？」
 
  「小櫻份人咁認真，佢一定會好專心咁睇電影，唔會留意第二到既，好似你咁咩……」
 
  爆咗seed既羨婷有冇咁中意串人呀？連呢少少既位都唔放過我？！哼，不過正所謂最完美既計劃都有失敗既一日，等我扮到成個成步堂龍二咁反駁你啦。
 
  「唔比你計算錯誤既？佢望一望其他地方又幾出奇呀？」




 
  「你以為我真係咁天真咩？你留意下自己對眼戴住啲乜？」
 
  我摸摸自己塊面，除咗摸到平時帶開既眼鏡之外，仲有睇3D電影專用嗰副黑嘛嘛既眼鏡，咪住先……
 
  「咪係囉，副眼鏡黑到咁，你唔留心睇都唔知我對眼望緊啲乜野啦。」
 
  「你唔係連呢點都計算埋掛……」
 
  羨婷對住我冷笑咗一下，然後又繼續諗緊打咩比阿敬好。呢個時候既我都幾佩服佢，估唔到佢連呢啲野都計埋。雖然呢個羨婷比我既感覺係好恐怖，之不過如果想幫阿敬佢成功追到小櫻既話，睇嚟真係要靠佢既計劃。
 
  「我都係咁啱諗到啫，邊有可能計得咁清楚呀？」
 
  食屎啦你！枉我頭先仲真係有一刻真心覺得你好利害，原來一切都係假既，你居然喺到玩弄一個天真無邪既毒男？！我收返！我要收返頭先讚你既說話呀！
 




  時間一分一秒咁過去，而部電影既劇情亦變得愈嚟愈有趣……但係…但係我真係集中唔到囉，羨婷佢一直喺到比指示，搞到我不時都忍唔住望下佢寫咗啲咩。
 
  『趁佢拎爆谷食既時候你都伸手去食，之後扮到唔覺意掂到佢隻手啦。』
 
  吓，咁老套既橋都得？ 不過我講出嚟既話羨婷佢一定會話「呢啲叫橋唔怕舊，最緊要受，你識啲乜呀。」，所以我都係一句聲都唔好出會比較好。
 
  喺羨婷佢打完呢句之後冇幾耐，阿敬就回咗一句：
 
  『但係我冇買爆谷喎。』
 
  見到呢句之後羨婷對住部手機O曬嘴，個感覺就好似無啦無身邊有個人大叫「睇緊住呀！」咁，嚇到成個人定曬型。望到佢咁既樣嗰刻我都忍唔住細細聲喺到笑，明明之前仲話自己個計劃係好完美，點知一句說話就將你KO。
 
  唔知羨婷佢係咪讀到我心聲，呢個時候佢睥一睥我……Sor…Sor…Sorry囉，我唔笑咁得未呀……