情人節那天，我在衣櫃中找到我生命中的天使: 第八章：做人應該時時刻刻都要小心

 
  羨婷佢睥完我之後又繼續打：
 
  『咁趁佢扶住個扶手咪扮唔覺得意掂到佢隻手囉。』
 
  你條友有冇第二招呀？嚟嚟去去咪又係扮唔覺意掂到佢隻手？呢招係唔係真係咁有效呀？
 
  『但係佢冇扶住個扶手喎。』
 
  『咁你直接錫佢一啖啦！』




 
  我喺旁邊望向羨婷，見到佢成面紅曬咁，好明顯佢已經好唔耐煩。
 
  「不過咁做真係好咩？用啲咁強硬既方法唔會唔係咁好呀？」
 
  「唔係咁做又應該點做呀？食爆谷又唔得，扶手又唔得……」
 
  「咁咪慢慢嚟囉，離倒數仲有大把時間，唔洗咁快要阿敬佢咁主動掛。」
 
  「你唔好阻住我呀……」




 
  「唔得呀……」
 
  我伸手捉住羨婷隻手唔比佢向阿敬發出呢個指示，但係佢同時不停咁避開我隻手，結果我地之間好似演變成用手喺到玩緊捉逐遊戲咁……點知最後部手機比我地搞到跌咗落地下。
 
  羨婷佢即刻去執部電話，而我就好唔好意思咁坐喺到。
 
  「大佬你靜啲得唔得呀？」
 
  突然間耳邊傳嚟一把男人既聲音，聽起嚟有種好陌生既感覺，係一把我從未聽過既男人聲音。我立即擰轉頭望過去，原來係去死去死團既其中一員。




 
  「對…對唔住。」
 
  「你同你女朋友要搞野就去第二到啦，都唔知你地係唔係特登喺我地面前曬命呀！」
 
  「乜野我女…女……女朋友呀，你唔好亂咁講野喎。」
 
  雖然我係中意羨婷佢，而且成日都同佢埋一齊，但係我地都未係正式拍緊拖，總之我地既關係就…呀…呀……咁…即係………唉，連我自己都搞唔清楚呀！
 
  「我理得佢係咪你女朋友呀，總之我就睇唔過眼你同個女仔一齊啦。」
 
  對住呢啲無理取鬧既說話，我諗唔反駁佢先係最好既應對方法，亂講野既話只會搞到佢愈嚟愈煩。但係點都估唔到，身邊突然傳嚟既一把女仔聲將我呢個完美既部署破壞曬。
 
  「係又點呀？我地先唔似得你要一個人嚟睇電影咁可憐呀。」
 




  爆咗seed果然係唔同啲，唔單止愛情方面變到成個專家咁，而家就連講句說話都霸氣過人。
 
  「乜…乜野可憐呀？你…你條友唔好咁串…串嘴喎。」
 
  之後羨婷用佢最利害既睥人技巧，不過有趣既係，當羨婷佢睥住個男人嗰刻，套戲剛剛好完咗，放映室既燈光著返，令到呢到好似變咗佢主埸咁。
 
  「我都費…費時同你講落去，我睇完戲而家要去搵囡囡啦，哈…哈…哈哈。」
 
  聽佢笑到好似用緊摩斯密碼咁，好明顯佢驚到就快瀨屎。唉，不過我都好同情你既，因為比羨婷佢睥住真係一啲都唔好受。當呢個男人走咗之後，羨婷佢呼咗一口氣，然後擰過頭嚟望住我。
 
  「主…主人你冇野呀嘛？」
 
  主人？呀…原來羨婷佢又變返本來咁。
 
  「冇…冇野，都係比人話兩句啫，冇事既。」




 
  「咁都好啲……」
 
  「但係點解你變返本來咁仲可以睥到咁有霸氣既？」
 
  羨婷佢聽完之後成塊面變得好紅，然後好快就耷低頭，好似唔係好想比我見到佢個樣。
 
  「主人你唔…唔好笑我啦………我只係接受唔到主人繼續喺到比人話啫……」
 
  「原來你…………」
 
  接住落嚟既係一陣子既沉默。
 
  「不過主人你頭先話我唔係主人你…你…你既……算…算啦，冇野啦。」
 




  「我既？你講乜野呀？不過話時話，你冇send嗰句野出去下話？」
 
  「冇，好彩主人你及時阻止我喳，如果唔係我真係send咗架啦。真係估唔到只要一接觸到愛情既事就會衝動到控制唔到自己……」
 
  「你比部電話我等我幫你delete咗句野啦。」
 
  「嗯。」
                                                     
  從羨婷佢手上慢慢接過手機，我打開咗WhatsApp嗰頁諗住delete咗句野，不過唔知係唔係個人放鬆咗既關係，我好順手咁…………send咗出去。
 
  「大件事啦，我唔少心send咗出去呀？！」
 
  「唔係掛，點算呀主人？」
 
  「冇…冇事既，而家send返句『打錯』咁咪得囉。」




 
  「主人你快啲打啦。」
 
  「『Sorry，頭先打錯野，唔好咁做。』，好打完啦，快啲send過去先。」
 
  嗚……天氣不似如期，而電話既訊號都一樣，點會而家先至話冇訊號架？！
 
  我同羨婷呆咗咁望住電話上面既對話，腦入面完全係一片空白，完全諗唔到應該點做好。
 
  阿敬呢個時候擰轉頭望住我地，我地當然把握呢個機會瘋狂擰頭叫佢唔好理頭先我地send出去既野。點知阿敬好似Get錯咗咁，好有自信咁向我地點頭之後做出咗一個OK既手勢。
 
  唉，今次真係若果食屎可以將我拯救，我怕我食幾多都唔夠……

-----------------------------------------------------------------------------------------------------------------------
本來仲諗住喺電影到寫多啲, 點知寫嗰刻先知睇戲其實真係冇咩好寫
SOSAD :(
btw 高登嗰邊好似愈嚟愈多人睇, 真係好開心呀
睇嚟真係要再認真少少寫啦

大家中意個故記住要追稿同share 比朋友睇呀