情人節那天，我在衣櫃中找到我生命中的天使: 第六章：硬係覺得最近啲戲好似冇咁好睇

 
  呢個羨婷真係呀……為咗達成目的居然隨便用魔法，明明啲天使點數都唔係好夠架，萬一用曬點算呀，唉，真係成日都要人膽心既。
 
  「不如我地分開坐啦好唔好呀？但係點分好呢……」
 
  小櫻講完之後，羨婷佢行埋嚟蹺住我隻手，然後個頭就挨落我個膀頭到，而佢個心口直情貼落我隻手臂到。羨婷佢無啦啦咁做，真係搞到我呢個毒男一時之間唔知點反應好。
 
  「我就當然係同阿傑一齊坐啦，小櫻你就同阿敬坐啦。」
 
  「吓……」




 
  「唔 - 好 - 咩？」
 
  「好…好……」
 
  我只係唔少心講咗句「吓」啫，洗唔洗即刻睥住我呀？你無啦啦蹺住我，我緊張都講錯野都好正常啫，或者你比份稿我啦，稿呀…稿呀…我冇稿呀！唉，我而家咁樣比你蹺住真係同比人用把刀挾持住一啲分別都冇，我真係驚到想喊出嚟囉。
 
  「你地兩個真係唔理幾時都係咁好感情喎。不過話時話，點解我覺得羨婷你今日好似好興奮咁既？簡直好似第二個人咁呀。不過算啦，我睇都係自己諗多咗啫，嘻嘻。」
 
  點解小櫻你既觀察力可以咁利害架？呀……不過你唔好搞錯喎，同我感情好既係平時既羨婷，而唔係爆咗seed既佢囉。




 
  就係咁，我地就一齊入咗間放映室到睇電影。
 
  一入到去放映室，我地就見到成班男人好有規舉咁隔住一個一個位咁坐。喺呢個環境之下，羨婷用魔法強行分出嚟既相連位變得特別顯眼。小櫻同埋阿敬就坐咗喺中間既連位，而我同羨婷就坐咗喺後面嗰個。
 
  行入自己個位既時候，我感覺到自己好似比一大班人望住，不過呢一種望既感覺唔係望到大明星出現，而係見到殺人犯逃離監獄，好想佢快啲離開自己身邊。不過咁又難怪既，同個女仔喺班去死去死團面前行嚟行去就同挑釁佢地一啲分別都冇，不過咁多位唔好怪我呀，我都係被迫跟嚟架喳。
 
  但係比呢班男人既眼光更奇怪既係，自從羨婷佢頭先蹺住我隻手之後到而家都仲唔放開，唔止仲…仲好似比剛才蹺得更緊。
 
  「你…你冇事下話？」




 
  雖然我係有啲驚爆咗seed既羨婷，之不過佢居然會蹺得咁實，搞到我有啲膽心佢會唔會發生咗啲乜野事。
 
  「主…主人，其實我頭先唔係有心睥住主人你架……」
 
  主…主人？呀…原來羨婷佢頭先蹺住我隻手既時候唔覺意令到佢變返做平時咁添。
 
  「算數啦，我都知你都唔係特登既，因為頭先嗰個都唔係平時既你。」
 
  「即…即係話主人你唔好嬲…嬲我？」
 
  「唔嬲啦，我地都係一齊睇電影啦。」
 
  「嗯！嘻嘻。」
 




  講完之後，羨婷佢依然蹺住我隻手，不過同之前唔同，而家既佢蹺得好舒服，完全唔會感覺到有任何壓力，更加唔好講話似唔似比人挾持緊咁。羨婷佢一直蹺住我隻手，直到電影開始播既時候先至鬆返開。老實講我寧願比佢一直咁蹺住，就算唔睇電影都冇問題。
 
  但係講返轉頭，呢套戲真係好鬼悶呀，播極都播啲無聊野，仲要一啲特技畫面都冇，如果要睇啲咁既野，我洗乜睇3D版呀，可惡……
 
  「唉，好悶呀，早知就唔睇呢套啦。」
 
  「唔怕啦，有得同主人一齊睇戲，無論睇咩都咁好睇。」
 
  「但係套戲既劇情又真係……」
 
  「可能佢地將啲高潮位放咗喺好後呢，主人你唔好咁心急啦。」
 
  「唉，望就咁望啦……」
 
  「如果唔好睇既話咪等我用魔法令到佢好睇啲囉……嘻嘻。」




 
  「呀……你仲喺到笑喎，我都未話你呀，你啲天使點數都已經唔多架啦，頭先仲用魔法喎，睇唔到呢場咪睇下一場囉，有咩所謂？萬一真係用曬啲天使點數咁點算呀。」
 
  「對唔住囉，我頭先真係控制唔到自己呀嘛。不過冇事既，就算用完魔法會有副作用我都唔怕，因為主人喺我身邊呀嘛。」
 
  「早知我就唔嚟，睇下你點算。」
 
  「吓……」
 
  講完之後，羨婷又好例牌咁嘟長個嘴。
 
  「唉，都唔知點話你好……不過話時話唔知阿敬佢地而家點呢？呀……」
 
  大件事！一時口快快提咗阿敬佢地添，死啦，羨婷唔係又爆seed下話？！
 




  我即刻擰轉頭望向羨婷，只係見到佢好安靜咁耷低頭望住自己部手機，完全睇唔到有任何激動既舉動或者反應。
 
  好彩，仲以為佢只係聽到我講既呢句說話又會爆seed添。不過話時話，睇緊戲又點可以玩手機架，我覺得悶都冇咁做啦，咁係對套電影既制作人員好唔尊重架嘛。
 
  「喂，不如一陣先玩電話啦。」
 
  「…………」
 
  玩得咁過癮連睬都唔睬我啦下話，一於等我睇下你玩乜先。
 
  正當我以為佢係玩緊啲唔知乜野<拼圖&恐龍> 定 <神經之塔>既時候，原來佢係喺到同人地WhatsApp緊。之但係睇睇下戲又點會無啦啦玩WhatsApp架？喺呢個moment，我覺得眼前既羨婷相當有嫌疑，所以我決定做一樣應該係幾cheap既事，就係睇下佢WhatsApp講緊啲乜野，點知……
 
  『我 - 好 - 中 - 意 - 你。』
 
  唔係掛？！你居然同第二個人WhatsApp講啲咁既野？！






--------------------------------------------------------------------------------------------------------------
今次打得比之前長啲
最近終於做完要做既野，之但係諗劇情方面去到樽頸位，點算好呀:(