情人節那天，我在衣櫃中找到我生命中的天使: 第五章︰為咗睇戲，你可以去到幾盡？

 
  話咁快就到咗第二日，亦即係除夕倒數嗰一日，我地約咗喺銅鑼灣一間好大既戲院門口等。我，羨婷同埋阿敬三個比預定時間早咗到，咁係因為我地諗住襯住小櫻未到再講多次個計劃內容……雖然又係行街睇戲食飯之類既例牌野。
 
不過講就係咁講，其實個計劃幾乎全部都係羨婷佢諗曬，而我都只係負責…負責……負責啲乜野呢？唉，而家連我自己都唔係好明今日嚟係為乜……
 
  「聽住啦阿敬，一陣呢你就係要……」
 
  聽到個咁既語氣，唔洗講都知羨婷佢已經爆咗seed啦；阿敬方面就係咁點頭，不停記住羨婷所講既每一個指示；而我呢……就周圍望下打發時間，十足十嗰啲得閒就落公園hea既阿伯咁。
 
  但係點知呢個時候，冇幾遠既地方居然比我見到一個著住一件啡色羊絨外套既女仔，外套入面就著住一件綠色既連身裙，再配上一條淡黃色既頸巾，佢行起路上嚟，頸巾隨風飄揚，同佢短短既頭髮型成一個好大既對比，就咁望落就同我平時喺大學見到既小櫻簡直係一模一樣。




 
  咪…咪住先，原來真係小櫻嚟架喎！乜…乜唔係所有女仔都中意遲到架咩？點解佢會提早到咁痴線架？！
 
  「喂…喂羨婷呀，小櫻佢到咗啦。」
 
  「知道……」
 
  估唔到羨婷佢會表現得咁平靜，但係喺佢旁邊既阿敬就驚到好似比屋企人發現上ThisTV咁，塊面都變曬形。
 
  就喺呢個時候，羨婷喺衫袋到拎咗一個耳塞出嚟，放咗喺阿敬既手上面。




 
  「你一陣同我全程帶住佢，咁就可以聽到我既指示，知唔知？」
 
  「知…知道。」
 
  講完之後，阿敬滿臉疑惑咁戴上個身塞，而當佢戴完之後，小櫻佢亦都嚟到。到底佢諗住做咩呢？好地地點解要比個耳塞佢呀？呢個羨婷真係好難觸摸。
 
  「咦，點解你地三個會咁早到既？我仲諗住費時遲到所以先早咗嚟添。」
 
  「係…係咩，我…我地都係啱…啱到啫。」




 
  野生的……呀，唔係，害羞的阿敬出現了！！！老實講，佢而家咁既樣真係好難頂呀，好地地怕乜醜呀。
 
  「咁，不如我地去買飛囉？」
 
  「好…好呀……」
 
  就係咁，我地四個就走咗去買飛。
 
  不過講開又講，我都好耐冇睇過電影，唔知而家有咩電影上畫呢？睇下先……翻生科學館，英雄大聯盟，救火96小時……嘩，乜而家啲電影咁悶架，仲以為有啲 千與X尋 或者 哈爾移動肥佬 呢啲高質素既作品添。
 
  呢個時候，羨婷雙眼發曬光，好興奮咁用手指住播電影預告塊版。
 
  「翻生科學館，我地一於去睇翻生科學館啦！仲要睇3D版！」
 




  點解羨婷佢要咁執著要睇呢套既？呀…我記得啦，佢好似話過咩要睇啲驚嚇既作品，然後等阿敬展示下佢勇敢既一面喎，唉，又係啲老套既橋。不過呢，我無論點都唔會講出口，如果比而家既羨婷聽到既話，真係殺咗我都有份。
 
  「哈哈，原來羨婷你係咁中意呢啲題材既作品架，不過呢我好細膽架，如果我一陣比佢嚇親既話你地唔好笑我呀。」
 
  小櫻講完之後，我見到羨婷佢擰轉頭喺到奸笑，好似係因為一切都依佢計劃進行而感到興奮。救命，呢個羨婷真係好鬼恐怖。
 
  「冇……冇事既，我地去買飛啦。」
 
  作為一個同路人冇分別既人嚟講，我完全想像唔到而家既阿敬可以點樣展示下佢勇敢既一面，明明講句野都窒下窒下咁……不過是但啦，呢啲野我都理唔到咁多既，反正表白嗰個又唔係我。
 
  我地決定好睇咩之後就去櫃檯到買飛，喺我地面前既，係一個普通到冇得再普通既女職員。
 
  「你地好，請問你地想睇邊套電影呢？」
 
  「我…我地想睇… <翻生科學館3D>。」




 
  「好既，麻煩你地等一等先……咦，嚟緊嗰一場得返單丁位喳喎，你地係唔係仲要睇呢一場？」
 
  我見到個戲院職員講完之後好無奈咁倒抽咗一口涼氣，唔知發生咗啲咩事呢？
 
  我望咗落去個職員部電腦，見到入座率有50%, 但係全部都係單丁位，唉，估唔到班去死去死團又再次出動，仲要全部隔住隔住咁買，係都唔比啲人一對一對咁去睇電影。我開頭仲以為你地班友只係會喺情人節嗰日出動啫，估唔到你地連除夕都要出動咁忙，咁又真係難怪個職員要嘆氣既……
 
  「可惡……@#^@$&@#*$」
 
  羨婷佢對眼充滿怒火，個嘴細細聲咁唸唸有詞。咁又難怪既，本來自己定好曬既計劃因為呢班去死去死團搞到凍過水，而家咪覺得咁火囉。
 
  突然之間，我地面前既電腦屏幕閃咗一下。
 
  「咦……唔…唔好意思呀，原來呢場唔係得返單丁位，中間同後面都有兩個連住既住，你地要唔要呢？」
 




  雖然我感覺到呢個職員頭上面好似出現咗好大既問號，不過我諗我大約都估到發生咗啲咩事。
 
  唉，睇嚟爆咗seed既羨婷就好似成部失控既跑車咁，想阻止都阻止唔到佢……

------------------------------------------------------------------------------------------------------------------------
明明完咗sem,  點解仲覺得好忙既呢？
最近有位高登巴打畫咗副羨婷既圖畫，真係非常之靚，好多謝佢，如果大家想睇可以去我facebook page到睇
不過其實寫到呢到我真係好想知大家對爆咗seed既羨婷有咩感覺呢？雖然佢啲態度係差少少，但係希望大家唔好唔中意佢 :)