情人節那天，我在衣櫃中找到我生命中的天使: 第十七章：點解有啲說話咁難講出口架？

 
  「中…中…依…」
 
  我到底喺到做乜野呀！點解咁簡單既一句說話都講唔出口架！
 
  「雖然我唔知主人到底想講咩，之不過我諗主人你可以試下深呼吸之後再講，咁做應該會好啲架。」
 
  「咁好啦……呼。其實我中…中…仲…仲想你陪多我一陣。」
 
  點解我最後會講成咁架？！我真係要掌自己嘴先得啦。




 
  「咁…咁冇辦法啦，雖然主人你都開到口，我就唯有陪埋你今晚啦，但係聽日日出之前我就一定要走架啦。」
 
  「嗯……」
 
  既然係咁，我一陣一定要把握時機講比佢知我既心意先至得呀。
 
  「不過時候都唔早啦，不如我地都係返左屋企先啦。」
 
  「返屋企先？其實我一定會返架喎，返正我幾夜返去屋企人都唔理我既。」




 
  「唔係咁架，因為我地天使轉移返上天堂既地方一定要係我地最初嚟到凡間既地方，咁所以我一定要返去嗰個衣櫃入面先可以返到去天堂架。」
 
  既然係咁都無辦法，唯有返到屋企先同佢講清楚啦。不過話時話宜家幾點呢，睇下個電話先…… 00:45 唔係呀化，咁即係話地鐵尾班車都就嚟開啦？！
 
  「喂羨婷冇時間啦，要返屋企就要快啲去地鐵站，快啲同我一齊行啦！」
 
  「知道啦主人。呀！主人你隻手……」
 
  就係咁我就拖住羨婷佢一齊衝左去地鐵站到，我諗今次應該係我咁大個仔以嚟最趕地鐵既一次。不過無論如何都要趕到呀，如果唔係真係唔知點先可以番到屋企啦。




 
  「請小心車門，Please mind the ……」
 
  「快啲啦，就嚟走啦」
 
  「我知道啦。」
 
  真係後悔自己好日都唔跑下步，睇嚟我地真係趕唔切喺道門閂曬之前入到去，不過我都唔理啦，直接成個身衝過去頂住道門，頂到佢開番之後我地再行入去。雖然比道門夾住係唔太舒服，之不過我諗點都好過入唔到部地鐵掛。
 
  「呼…呼…其實…其實主人，我…我可以用魔法令到道門閂得慢啲架喎。」
 
  「唔洗啦，其實你今日幫左我咁多已經用左唔少天使點數架啦，今次就算啦。講起上嚟，你喘氣喘得好嚴重喎，不如我地揾個位坐先啦。」
 
  「嗯……」
 




  我地坐底左之後我依然拖住佢隻手，而羨婷就一真挨住喺我個膀頭，不過同之前唔同既就係佢唔再係因為眼訓而挨住我，只不過佢話咁做會帶比佢一種安心既感覺。可能因為太夜既關係，結果成個車卡都只係得我地兩個人，而我地雖然坐埋一齊，但係一句野都冇講過，只係靜靜咁望住個幅車站地圖，不過成個氣氛令人覺得好舒服，好自在。
 
  我諗喺呢個咁舒服既氣氛之下我應該講得出我對佢既感覺掛，時間都唔係得返好多，我一定要把握機會講出嚟呀！
 
  「羨婷，其實我呢……」
 
  「咩話？」
 
  「我好中…中意……」
 
  「咩話？」
 
  「中意你呀！」
 
  「咩話？地鐵好嘈我聽唔到你講乜野呀。」




 
  喺呢個時候我真係想喊出嚟，咁辛苦先講得出口既說話佢居然聽唔到，有冇搞錯呀？！你個死人地鐵一日到黑淨係識收多啲錢，收多左錢之後又唔見你有乜野進步喎，有冇再過分啲呀！如果我之後有咩事講唔番頭先嗰句說話既我一定唔會放過你。
 
  「算啦，都係返到屋企先講啦。」
 
  「嗯……」
 
  阿傑呀，你一定要鼓起勇氣講到出嚟呀，你要知道羨婷佢好快就要走，你唔可以再曬時間架啦。