情人節那天，我在衣櫃中找到我生命中的天使: 第十八章：點先係最辛苦既告別方式？

 
  自從頭先失敗左之後我地又好似之前咁繼續一句野都冇講，慢慢咁行返屋企。一人到之後，我同羨婷佢兩個人就立即入左房到。好彩返到屋企既時候屋企人都訓曬覺，萬一我爸媽半夜起身屙尿既時候見到屋企無啦啦有個女仔喺到既話，到時就真係唔知點收科囉。
 
  時間一分一秒咁過去，之不過唔知係唔係喺自已間房既關係，個氣氛好似去唔返頭先地鐵嗰到咁舒服，搞到我宜家又開唔到口同佢表白啦。平時睇劇集入面啲男主角講句「我中意你」都要拖成幾集，我一路都以為係電視台啲人想拖長套劇嚟賺錢啫，但係點知到自己講既時候先知原來真係咁難。
 
  我一路迫自己講，但係去到最後唔知點解會變左問佢中意食乜，中意去邊，中意做乜咁，總之中意既野就問左一大輪，但係就點都講唔到「我中意你」呢句話。
 
  就係咁樣拖拖拉之下，時間就嚟到五點幾，亦係差唔多到日出既時候。我打開衣櫃門，而羨婷就慢慢咁屈曲個身坐咗入去。
 
  「主人，喺呢個時候我真係要走架啦，多謝你，我今次嚟到凡間真係好開心呀。」




 
  而喺羨婷講緊呢句說話既時候，我隱約見到佢有啲眼泛淚光。
 
  「喺呢，你仲會唔會返嚟呀？」
 
  「唔知呀，之不過就算下一次唔係我嚟幫主人你解決困難，我喺天堂都會幫主人你祈禱架。」
 
  「嗯……」
 
  我都知宜家絕對係我同佢表白既最後機會，但係正正就係佢講完嗰句說話之後，我感動到想喊咁滯，把聲都震曬，幾乎連正常講野都講唔到。雖然我真係好想講出口，但係我真係做唔到呀。




 
  「係呢…喺…喺你轉移既…既時候，我洗唔洗……幫你閂返個衣櫃門呀？」
 
  「其實都唔洗咁做架，只要主人你望唔到我轉移既過程就得架啦。即係如果主人係背對住我既話我都已經可以轉移到架。更何況……」
 
  「何況乜野呀？」
 
  「何況我想喺轉移返天堂之前既最後一刻都望到主人，即使只有背影都好……」
 
  聽到呢句之後，我好唔爭氣咁喊左出嚟，而羨婷見到我喊既時候，佢自己都忍唔住。跟住我同佢就一路望住對方然後喺到喊，咁既情況持續左一段時間。




 
  「夠鐘啦主人……我真係要走啦……你擰轉身啦。」
 
  「嗯……」
 
  我慢慢咁擰轉個身，但係呢個時候我終於明白到原來當你知道自己中意既人就快要離開但係你唔可以見佢最後一面係非常痛苦既一件事嚟。
 
  「我走啦主人……拜拜……」
 
  「拜…拜……」
 
  其實呢個時候我真係好嬲自己，我嬲自己點解唔夠膽一早講出自己既心意。我真係嬲到想打自己一身。
 
  「阿傑你唔係咁天真諗住遲下有啲乜野「哈利路亞 chance」比你用下話？你唔好發夢啦！」
 




  唔知點解我個腦入面突然傳嚟一把好陌生既聲同我講咗呢句野。不過我並冇喺到諗到底係邊個講緊野，而係深深咁吸左一口氣，用盡全身既氣力迫自己喺呢個最後既機會講出我既心意。
 
  「羨婷我好中意……」
 
  「主人我好中意你……」
 
  聽到呢句說話之後，我立即轉過身望向羨婷，結果我望到既唔係一個人，只係得一個打開咗既普通衣櫃，入面裝左我唔少既衫褲……同埋一條純白色既羽毛。
 
  羨婷你真係好可惡……居然將我計劃左咁耐既說話搶先講左出嚟……有冇搞錯呀……你搞到我連向你表白既機會都冇呀……

  就係咁，我喺情人節呢一日同天使邂逅既故事就咁完結……

______________________________________________________________________________________________