情人節那天，我在衣櫃中找到我生命中的天使: 第八章：明昌壽司居然咁好食？！

 
  Kiss呀！係Kiss 呀！你明唔明對於一個毒男嚟講一個Kiss係幾難先做得到既事嚟呀！就算你要我好似英國舞會啲紳士咁錫落女仔隻手到，我都可能要準備三兩個月先得啦，更何況要嘴對嘴？！而且Kiss既對象仲要係一個咁正既天使……
 
  本來以為Kiss只不過係好單純咁一片嘴唇掂住另一片嘴唇，但真係估唔到原來Kiss 既感覺係咁舒服……
 
  「喂呀傑，呀傑，醒啦好嗎？淨係一個Kiss都搞到你成個人呆左，你有冇咁細膽呀。」
 
  聽到德仔咁講一講之後我個人先回一回神。我望一望眼前既羨婷，佢又望一望我，我地兩個塊面都紅曬，除左望住個地下之外我真係唔知做乜野至好。呢個時候我地兩個都冇出聲，全場都靜曬，靜到幾乎連心跳聲都可以清清楚楚咁聽到。
 
  「都唔知你地喺到做乜？Kiss呢啲野你地唔係第一次試下話？唉，頭先嗰盤唔算，我地都係轉玩第二個遊戲算。」




 
  唔係呀嘛？仲有第二個遊戲？頭先第一個遊戲已經搞到我呆左啦喎，第二個遊戲會唔會仲亂嚟架？
 
  然之後個侍應好似夾定時間咁立即放左四碟明昌壽司喺枱面到。羨婷佢見到之後幾乎嚇到尖叫，對眼碌行曬之餘仲用手遮住個嘴。
 
  「乜我地有叫到明昌壽司咩？喂侍應你係咪比錯枱呀？」
 
  「你唔好生人唔生膽先得架呀傑，你嚟左又點可以唔試下就走呀？我地又唔係未去過破地獄，洗唔洗咁驚先？」
 
  照我估德仔一定收左呢間野既錢，或者其實佢既真正身分係一個好嚴重既S，如果唔係又點會迫我地食先得架。




 
  「不過今次我地要用手餵，費時你地又乘機扮整跌之後喺到Kiss放閃光彈……至於今次輸左既話呢，就要負責比曬我地咁多個人既貼士，OK？」
 
  「咪住先，今次我地可唔以唔係輪流食而係一個人食曬？」
 
  見到羨婷嚇到咁既樣仲點叫佢食呀？都係等我一個人搞掂曬佢啦，係就係難搞啲，唉。
 
  「想威比你女朋友睇下話，是但你囉。冇問題既話就立即…開始！」
 
  好彩今次個碟到得十件壽司喳，如果好似頭咁有五十件既話真係死得人。個碟到由最基本既沙律醬壽司到紅豆軍艦一共有十款，不過其實啲人成日話紅豆軍艦係大佬大佬，佢都只不過係視覺係既大佬，正真既味蕾殺手其實係希靈魚壽司。望見眼前呢碟我都唔知仲可唔可以叫壽司既野，我真係默默咁吞左一淡口水。唉，呢鋪真係掉哪媽，頂硬上！




 
  「對唔住呀阿傑，你唔得真係要同我講喎，雖然我已經諗辦法令到佢地冇咁難入口……嗱，擘大口啦，呀……」
 
  雖然頭先食魚生嗰時我都知比個咁可愛既天使餵係可以好味啲，之不過明昌壽司既威力係魚生冇得比架喎，就算係點可愛法都唔會改變到啦，你唔洗安慰架啦。
 
  先嚟第一件就係三文魚壽司，羨婷餵我食之前好似口噏噏咁，我諗應該都係幫我祈禱掛。我一咬入口，嘩，好壽司呀！魚肉既肉質同佢表面上嗰一層薄薄既油脂互相配合，可以話將三文魚壽司嗰種細膩既感覺完完全全帶到出嚟。真係一件好好食既壽司，萬一我第日食唔返點算呀？！呢個時候我真係好想大叫一句「就這樣被你征服！」呀。估唔到一間咁平平無奇既餐廳都可以造到咁好味既壽司，真係令我大開眼界。
 
  真當我諗住讚呀軒好介紹既時候居然發現除左我同羨婷之外全部人都食到痛不欲生咁款，成塊面扭埋一舊。
 
  唔通係我頭先嗰舊咁啱整得好食？之後我食多一件玉子壽司，唔係喎，都係一樣超乎水準咁好食喎，你地到底發生咩事呀？點解啲壽司咁好食都要扮到咁痛苦呀？