情人節那天，我在衣櫃中找到我生命中的天使: 第七章：男女朋友餵對方食野係好正常架可？

 
  下一站，旺角，Next Station，MongKok ……
 
  估唔到話咁快就已經到左旺角，我地由地鐵站到一上到嚟，喺西洋菜街到行左太約十分鐘左右，去到一間叫做「樑之家」既鋪頭坐底。
 
  本來喺旺角到做放題夜市應該係好受歡迎至係，但係點解呢間鋪頭可以一個客人都冇咁恐怖架？唔單止咁，由我地入到嚟坐底之後居然可以冇一個侍應行過嚟，大佬你比杯水我地都好呀，呢間野有冇水皮成咁呀？不過呢個時候我不停同自己講應該冇事既，既然呀軒都介紹得既咁呢間野都應該有番咁上吓掛。
 
  等我睇下有咩食先吓……咦，都係嚟嚟去去嗰啲魚生呀天婦羅之類，會唔會普通左少少呢？
 
  「呀軒你今次介紹既呢間野好似唔係好得喎，横睇掂睇都係得啲好平凡既野食，同平時出面嗰啲放題都差唔多啦，洗鬼嚟呢到食咩？」




 
  聽完我一番質疑既說話之後，呀軒佢並冇立即反駁我既講法，而係懶有型咁chok個福音戰士司令官個手勢，好認真咁望住我，驟眼睇完全係一個專業既美食家。
 
  「哼，年輕人，你睇下我手上既Menu 先講野啦。」
 
  拎嚟睇下啦，有咩咁巴閉呀…… 「明昌壽司放題，彷真度99%」？！痴線架，呢間咁既樑之家居然連明昌壽司入面既野食都拎出嚟，彷真度仲要99%？！唔怪呢到咁少人啦。我要收返頭先嗰句野，呀軒你其實唔係一個美食家，係一個勇者至真。
 
  「阿傑，比我睇下得唔得呀？」
 
  之後羨婷哄個頭埋嚟我到一齊睇，可能頭先地鐵嗰到太多人所以冇為意到，原來羨婷個身到有一股花香味，聞到之後成個人都會覺得好安穏，而個心都會變得好平靜。但係當佢望左個menu一陣之後佢個表情由佢一直以嚟笑笑口咁既樣瞬間變到好似突然得知自己有左末期癌症咁，成塊面青曬之餘個身亦都開始無啦啦喺到震。




 
  「你冇野呀嘛？你成個身震曬喎，係唔係你個位太凍呀，洗唔洗調位？」
 
  之後羨婷佢哄左過嚟我耳仔邊。
 
  「係咁架主人，其實天堂嗰到都有明昌壽司，不過開業咁耐以嚟每個天使食完都肚痛一個星期，冇人有例外。我之前都試過一次，宜家諗返起我都覺得好驚呀。」
 
  連天堂都有明昌壽司？！會唔會太痴線呀？不過真係估唔到呢啲咁既野真係去到邊都一樣有咁大殺傷力。
 
  最後我地都係是但叫左啲魚生同天婦羅咁，好明顯呀軒一心想帶我地嚟食明昌壽司，不過我見羨婷震到咁我真係唔忍心叫嚟試下。




 
  「拿，我地就叫左四碟魚生，不如我地每對情侶就一碟，睇下邊對最先食曬好唔好？」
 
  呢個德仔真係中意一日到黑諗埋啲奇怪遊戲，不過咁都好，反正只係鬥快食野，我梗係冇所謂啦，食魚生可以有幾難呀？
 
  點知一上到嚟，傻的嗎你每碟都有成五十塊魚生，平時嗰啲唔係最多廿塊喳咩？呢間樑之家真係從咩角度睇都係超出左我對放題既認識。
 
  「呀，唔記得講添，呢個遊戲其實係有另外一個規則，就係要輪流餵自己另一半食，如果跌左落地下就算輸，違規既你地就知味道。冇問題既就開始啦！」
 
  唔係呀化，要互相餵對方食野？不過對一般情侶講應該係好正常掛……但係，我呢個女朋友只係扮架喎，佢到底肯唔肯架？
 
  「呀傑，擘大個口啦，呀……」
 
  唔係掛你咁踴躍既？！不過既然你都冇所謂咁我都豁出去啦。雖然講出嚟可能冇人信，明明舊魚生只不過係好平凡嗰啲貨色，但係比個咁可愛既天使餵完之後居然可以升級十倍變得超好食。老老實實，我宜家仲嫌每碟得五十件係嚴重唔夠囉。
 




  雖然我話就話我豁左出去，但係要我呢個毒男餵女仔食野始終都係有啲驚呀嘛，結果佢餵我就係正常速度，我餵佢嗰時就好似開左慢鏡咁款，而我地呢一對既速度可以話係包尾咁濟。不過其實都未必係最尾既，可能因為我餵嗰時怕怕羞羞咁，旁邊既呀芝望見之後諗返起佢同家豪初初相戀既感覺，然後又煩左家豪一大輪，所以佢地嗰邊既速度大大咁下降左，比我地追返上嚟。
 
  我地一路食一路食，最後我同家豪咁啱一齊餵緊最後一件魚生。但係呢個時候我一時心急左夾唔稳舊魚生，搞到佢由我筷子嗰到跌左落嚟。之不過我玩到呢到又點可以放棄先得呀？我諗都唔諗立即成個頭伸埋去舊魚生到，可惜我慢又半拍咬唔住。
 
  點知原來喺舊魚生跌落嚟既時候羨婷一樣伸左個頭過去，不過都係慢左半拍。但係當我地同時慢左半拍既時候，即係代表我地都同步咁伸自己個頭。
 
  最後，我地Kiss左……