情人節那天，我在衣櫃中找到我生命中的天使: 第九章：明昌壽司真係好難食！！

 
  唔係喎，佢地睇落又唔似扮野喎。明明話左係鬥快食壽司架嘛，點解仲要係到扮到好痛苦咁慢慢喺到食呢……？根本冇咁既必要啦。
 
  「嘩阿傑你係唔係冇味蕾架？點…點解你可以咁快食完之後一啲事都冇不特止仲要好似食到好似好好味咁款架。」
 
  「咁……」
 
  但係我真係覺得好食喎。不過我諗宜家都唔係靜靜咁坐喺到諗發生咩事啦，如果要我比曬咁多個人既加一真係同殺左我都冇咩分別，都係快快手食埋其餘嗰幾件先。
 
  不過真係估唔到我咁好彩揀左碟一啲伏都冇既壽司，我由玉子壽司食到希靈魚壽司期間完全冇任何一刻係覺得難頂，基本上呢個遊戲對我嚟講根本就唔係一個挑戰，反而係一個享受。




 
  不過羨婷餵我既時候隻手真係震曬咁滯，對眼幾乎合埋曬咁同頭先係地鐵到差唔多，好明顯佢心底入面真係好唔中意明昌壽司。不過其實佢都唔洗咁驚啦，反正碟壽司咁好食，三兩下都比我食曬啦。
 
  過左冇幾耐，呀軒同德仔嗰兩對都陸續用好痛苦既表情食曬碟上面既壽司，淨返家豪仲有半碟淨底喺到，呆呆咁望住我地。
 
  「哎呀家豪乜你咁冇用架，人地都食曬啦，得番我地仲有半碟喺到。」
 
  「我都唔想架，咁真係好難食呀嘛。你咪一樣係食得咁慢，仲好意思嚟話我。」
 
  你個家豪平時食開好野，要佢一時間放低一向高貴既身份去食啲平民壽司又點會頂得順呢？不過講時講，真係有咁差咩？




 
  「都唔知你喺到扮曬野做乜，其實我覺得到都唔係咁難入口啫。」
 
  「你唔好以為自己最快食完就係到咁得戚喎，咁串嘴，夠膽你就食一件我呢碟既壽司。」
 
  「食咪食，我成碟都食得落，會怕你嗰到區區既一件？」
 
  「呀……」
 
  羨婷似乎諗住阻止我做呢種有啲似鬥氣既行為，只不過喺佢淨係講得切個「呀」字既時候我已經擺左舊壽司入口。不過呢，唉，原來一切都太遲啦……




 
  我一放入口，嘩，我少你老味，點解可以難食到呢個程度，同我頭先食嗰啲根本就係兩世界既壽司嚟。我真係完完全全感受到乜野叫做99%相似既威力，唔係，我諗應該已經跨越左明昌壽司既威力，唔可以再用「難食」去形容啦。
 
  「你冇事呀嘛阿傑？如果我頭先阻止到你既話就好啦……嗚嗚……」
 
  「冇…冇事，都唔關你事既，唔好喊啦。」
 
  我唔知呢啲係唔係我呢個毒男僅有既尊嚴，只不過我真係唔希望羨婷會因為我一時咁衝動所做既事覺得唔開心而係到喊，所以我就算死忍都唔希望比佢見到我覺得難食既樣。
 
  不過講就講冇事，但係真係好鬼難食，難食到一個地步真係想嘔出嚟囉……
 
  自從我地玩左呢個咁瘋癲既遊戲之後，我地全部人既心情都可以話差到極點，幾乎連講野都唔想講。我地坐左多一陣之後都準備要走，淨底嗰幾件壽司我地冇人迫自己食落去，好彩既係間餐廳冇因為我地食淨野而要我地比額外既錢。不過咁又係既，整得啲咁難食既野仲要我地比額外既錢既話咁呢間野根本就係奸商嚟。
 
  聽講本來我地有人準備左下場，但係因為頭先啲食物既衝擊力實在太強，所以冇人想繼續玩落去，個個都希望返屋企休息一下。不過咁都好既，反正我一開始都唔想嚟呢個聚會，而家快啲完對我嚟講真係仲好。之後家豪﹑呀軒同德仔佢地都好灰咁一一離開左，最後得番我同羨婷喺到。而呢個時候既羨婷好似之前一樣咁蹺住我隻手，個頭挨係我個膀頭，對眼合埋好似想訓咁。
 




  「主人，佢地都走曬，咁我地點算好呀？」
 
  「其實我既難題就已經解決左，你都唔洗再幫我架啦。今次都係全靠你，我先唔洗比佢地笑喳。我諗你今次幫我應該都賺到唔少天使點數啦，你幫左咁多真係好多謝你。其實你都可以返天堂架啦。」
 
  「但係…我仲未想…返…上去。」
 
  「唔想返，咁…不如一齊去行下海邊好唔好？我見你咁樣，吹下風個人應該會舒服啲架。」
 
  「嗯！」
 
  就係咁，呢個咁既聚會就用咁怪誕既方式完左，而我宜家就去同天使一齊去行海邊。