係同屋室友?定係同居密友?: (S3)53. 案件宣判

「Court!!!」法庭再次開庭
 
「請問控辯雙方有否最新進程?」
 
林大狀起身「法官閣下，控辯雙方未能就庭外和解取得任何共識」
 
「明白，請控方準備結案陳詞」
 
「回法官閣下，控方….並沒有結案陳詞」
 




呢個結果，三名法官一早就知道，控方所有證供證據都被列為不可靠之下，佢地仲點同人打官司
 
「辯方麻煩結果陳詞」循例上都要問一問辯方嘅陳詞
 
麥大狀起身「三位法官閣下，就申訴人向我當事人要求其父母遺下物業加上自己名下一事，相信大家心中早已有答案。申訴人一開始就以同我當事人為同鄉、同其女兒為情侶時，認為就係我當事人嘅自家人、自己人、長輩等等，其實佢目的只有一個，就係侵佔我當事人嘅物業。為左達成目的，佢地不惜用傳媒壓力、甚至用武力去令我當事人屈服，更甚者仲拎出一份假文件去達成佢地嘅目的。佢地將自己包裝成非常關心我當事人，認為只有佢地，先係真正對我當事人好，為佢著想，唔想佢俾佢其他屋企人呃走財產。實際上，就係對我當事人嘅財產虎視眈眈，甚至!!!將自己被趕離公屋包裝成自願交回公屋、包裝到自己係受害者一樣!!更甚者仲將自己屋企人肚中胎兒作為籌碼!!!可見申訴人嘅人格係有幾低劣，佢嘅心腸有幾咁壞!!!
 
一個咁壞心腸、而且又自私貪財嘅人，會唔會真誠為其他人著想?會唔會無私咁幫人看管唔屬於佢自己嘅財產?答案係否定。所以我要求法官閣下，對申訴人對我當事人財產上嘅要求予以否決，多謝法官閣下」
 
「申訴人有否陳詞或者向辯方表達?」
 




肖氏一家已經低頭靜而不語
 
「辯方?」苗學翹對麥大狀擰擰頭
 
法官見雙方都冇任何意見，就立即宣判並頒下判詞
 
「基於申訴人自己嘅貪婪，為獲得其他人嘅財產而不惜作假證供，利用傳媒以及網上壓力去攻擊被告人，目的只係為左財產。更甚者將自己嘅過失及貪婪慾望將自己包裝成受害者，其目的以及行為址令人覺得嘔心，希望申訴人會接受是次官司之教訓，好好教育即將出世嘅小朋友，灌輸正確嘅價值觀。
 
本席宣佈，申訴人肖錢鳳娥女士、肖翠君小姐向被告人苗學翹博士及苗學雯女士之物業擁有權申訴敗訴。申訴人可於本庭頒下判詞後二十八天內，向高等法院上訴庭上訴。申訴人需支付堂費以及被告人之律師費。另外因為申訴人於本案使用虛假文書以及冒簽。本席將要求警務處進行調查。本案聆訊完畢」
 




係庭外，當肖氏一家人出黎時，電視台以及記者都圍上去
 
「肖太，對於法庭判決妳有咩意見呀?」
 
「會唔會考慮上訴呀?」
 
「請問肖小姐下一步會點呀?」
 
肖師奶今次真係求仁得仁，終於俾佢恨到有好多記者圍佢以及訪問佢，係重重記者之中，有執法部門行近肖師奶
 
「肖錢鳳娥女士，妳涉嫌行使虛假文書以及企圖以不法手段獲取財產，我地而家正式拘捕妳，妳有權保持緘默，除非妳自己想講，但妳所講嘅一切，我地會用紙筆寫低，並成為呈堂證供。」
 
咔嚓一聲下…肖師奶被落了孖葉
 
係高院門口嘅苗學翹，目睹一切