係同屋室友?定係同居密友?: (S3)52. 和解會議

係庭內會議室，苗學翹對面坐住肖師奶等人
 
「點呀肖太?就快結案啦喎，仲有咩要傾咁呀?」苗學翹對住肖氏一家講
 
「而家咁啦，你娶左我個女，之後間屋當係新房，我地搬黎同你地湊細佬，一於係咁話啦，快快手搞埋d野佢，之後我地撤控，你俾返錢我地就講和」
 
 肖師奶仍然獅子開大口，完全唔知道自己已經冇任何同苗學翹付價還價嘅餘地。當然深知肖氏一家性格嘅苗學翹，知道呢一家人唔會咁易放棄錢呢個字
 
「點解我要同妳地庭外和解，仲要賠錢俾妳地呀?咁咪即係我輸?仲有，妳個女個肚關我咩事呀?點解我要同佢結婚呀?」
 




「咁你俾返D錢我地都好應該者，而家我地冇屋住，我個女又大肚，咁大家一向都當你係一家人，而家咪快d將件事變成合法囉」
 
苗學翹真係對呢家人非常反感
 
「呀肖太，妳想搶我父母遺產不特止，仲要去騷擾我租客，咁都算啦，一開始妳要上庭解決，我都冇問題啦。喂妳地搵埋電視台，播哂我D野出街，仲係墳場郁手打人，我咁都要同妳和解，係唔係講得過先?而且妳個女大肚關我咩事呀?」
 
「好歹我個女都跟過你幾年丫!佢都照顧左你幾年呀!而家俾返D錢我地都唔得咩!?」
 
「照顧?我中左流感發高燒果時佢有照顧過我呀?妳個女打黎鬧我放病假做咩唔出去接佢放工咋」
 




「咁即係點呀?你係一蚊都唔俾我地呀?」
 
「燒俾妳就得」
 
「得饒人處且饒人呀細佬!而家伯母教精你呀!做人留一線日後好相見呀!咁你都唔識!」
 
苗學翹真係苦笑咁答「之前我話過和解，我幫妳地俾律師費。喂果時係妳地唔肯，覺得自己贏梗架喎，我個律師問過妳地幾次都係話唔肯，而家知道要輸啦，就求我和解呀?妳地咪好著數?」
 
「咁我地而家肯，你咪可以和解囉」
 




「點解我而家要同妳地和解呀?妳地之前咁過份，又用埋假文件假簽名黎想呃我屋企層樓。嘩，妳地講到間屋係妳地咁樣，上親黎都準備黎長住咁，我仲點解要幫妳地呀?」
 
「而家俾哂機會你，你都唔要呀?」
 
「妳地損害我人身名譽，我仲點解要同妳地和解?」
 
「而家教精你點做人呀細佬!!!我食鹽多過你食米呀!!!」一直都要其他人遷就佢嘅肖師奶一臉不滿
 
「哦，係呀?咁不如睇下個官點判囉，妳地屋企咁樣求人地架?」
 
苗學翹覺得同呢家人傾落去都係冇咩進展，所以就起身將所有事交俾游律師處理
 
佢一出會議室，見到嘅係一臉低頭不語嘅肖翠君
 
面對呢一個前女友，苗學翹對佢一D同情心都冇




 
「點呀?冇野講呀?」
 
「你…放過我屋企得唔得?」
 
「呵~妳平時D氣勢去哂邊?妳唔係好囂架咩?自己公主一樣架嘛」
 
「你…你仲提」肖翠君手握拳頭
 
「一開始我已經叫妳地唔好上庭，係妳地唔聽，堅持要法庭解決，好囉，咪俾個官決定囉」
 
「你真係唔顧舊情?點解你會變成咁，你以前好聽我話架」
 
「我點解要顧?妳呢幾年點對我，我屋企有事妳地一句慰問都冇，只係識講錢，妳仲出埋軌，妳叫我點幫妳。如果妳地唔係咁貪心，仲搵埋電視台搞到咁大，又屈我搞大妳個肚，我仲可以考慮庭外和解，幫妳顧及下肚入邊果個。不過頭先妳阿媽同家姐咁嘅態度，我仲點可以放過佢地」
 




「不過…」
 
「妳自己諗下將來點仲好啦，妳肚入邊有一個，妳快d聯絡佢爸爸比較好」
 
說罷，苗學翹行去走廊盡頭，梁小祺身邊，而走廊只剩下肖翠君一個人係到
 
梁小祺望住苗學翹「你唔打算放過佢地?」
 
「佢地太過份」
 
「但係佢肚中個bb係無辜架喎，一陣佢生左落黎，送佢去保良局嘅話，或者….」
 
「肚入邊果個，可能會幫下佢，但係佢阿媽家姐果d，一個都唔可以放過」