係同屋室友?定係同居密友?: (S3)51. 篤破謊言

麥大狀一向指責肖翠君講大話嘅聲音，令庭內空氣瞬間凝結起來
 
「你…你就講大話!!!我個女邊會講大話呀!!!」肖師奶首先俾反應
 
「妳連文件同簽名都可以冒簽，妳個女講大話有咩出奇?」麥大狀不屑與肖師奶一般見識
 
麥大狀拎起第一份文件
 
「呢到，係苗博士同梁小姐一齊返工嘅大學人事紀錄，而家呈上俾法官大人」
 




另一邊，係法庭monitor內，顯示出相同文件紀錄
 
「根據大學人事紀錄，苗博士同梁小姐，係去年平安夜之前，已經請假離開香港到外地旅遊!!」
 
「反對!!!法官閣下，辯方唔可以單憑大學請假紀錄去否定我當事人證供」
 
「反對有效」
 
肖師奶心中又鬆一鬆
 




麥大狀微微一笑
 
「法官閣下，呢到係香港入境處出入境紀錄，仲有兩本護照，呢為免控方或者第一申訴人話呢兩本係偽造嘅護照，現呈上相關文件，係由澳洲領事館以及英國領事館核實，呢兩本係佢地國家所簽發嘅真實護照」
 
法官睇完文件後「本席確認係澳洲及英國嘅護照」
 
「唔該法官閣下，呢到有日本政府發出嘅證明，同我當事人同梁小姐嘅出入日本紀錄，同埋香港入境處嘅出入境紀錄係完全吻合!!」
 
麥大狀飲一飲水「而且，我呢到有兩張車票飛尾以及換領文件，係日本夜行列車日出出雲號嘅車票。呢一部日出出雲號係由日本時間，晚上10點正於東京站開出，分別用8個同11個鐘通宵前往四國高松同出雲。大家睇下車票日子，係去年12月24日嘅車票，即係話平安夜當晚，苗博士同梁小姐係身處日本，乘搭該班列車前往四國高松」
 




麥大狀轉身望向已經低頭不語嘅肖翠君
 
「請問肖小姐，當晚妳同苗博士相差2786km，佢點樣同妳發生性行為?除非佢係龍珠嘅孫悟空，或者擁叮噹嘅隨意門，否則佢根本冇可能同妳係果晚有任何交接，唔好話性行為，面對面傾計嘅機會都唔會有!!!」
 
「請問妳係唔係聖母瑪利亞?」
 
肖翠君低頭不語
 
「如果妳唔係聖母瑪利亞，就唔會聖神感孕懷上一名胎兒!!如果妳係聖神感孕，請妳儘快聯絡教會，妳肚中嘅胎兒可能係繼太平天國天王洪秀全之後，造物主嘅第三子，耶穌嘅細佬」
 
麥大狀轉身對住忍笑中嘅三名法官
 
「法官閣下….我….咳咳…辯方再冇任何提問」
 
就連麥大狀自己都差d忍唔住笑。係邊聽席，一臉輕鬆微笑嘅苗學翹等人，同埋旁聽席另一邊嘅肖師奶黑哂面嘅表面成為強烈對比




 
如今已經可以肯定肖翠君講大話，肖家大勢已去，基本上DNA都已經唔洗驗
 
法官都覺得冇需要再審落去，林大狀知道呢一刻要求庭外和解同撤銷控告都已經係冇可能，因為已經肯定呢一單官司係會輸，不過佢仍然想希望和解，所以佢都走去麥大狀身邊問下client意見
 
「林大狀，我地肯，個官都未必批，都已經可以結案」
 
「鬼叫佢地玩到咁大咩」
 
「今次係鼎哥害左你啦」