係同屋室友?定係同居密友?: (S3)42. 擔心

再上庭前幾日，梁小祺係位上睇網上新聞，係非常出名嘅baby condom forum上，有好多人討論苗學翹嘅爭產案
 
有大量嘅師奶，特別係打簡體字嘅網民都十分、絕對支持肖師奶，而一d本身支持苗學翹嘅網友，經過西張閪望報導「搞大」肖翠君個肚後，亦一面倒稱佢為渣男，全部師奶都認為，電視台，特別係大台報得出黎，一定唔會係假，再加上肖家有鼎嘅鼎力支持，就令到大家認為肖家有十足十嘅理據
 
如果話梁小祺唔擔心就係呃你嘅，佢嘅心不在焉、心神彷彿等等形容詞或者成語，完全寫哂係佢塊面上
 
坐係佢身邊嘅同事，都不免為佢而擔心
 
「Suki….Suki!!」Connie係小祺身邊叫佢
 




「呀….係!」經過幾聲，梁小祺嘅魂魄終於由唔知邊度而飛返到佢軀殼之中
 
「我想要上次果份Report睇睇呀」
 
「呀….係…..」梁小祺兵荒馬亂咁係佢果個好整潔嘅位到不停搵
 
其實果份report就係放左係佢面前
 
「喂喂喂，份野係妳檯面呀，我拎左啦」
 




「呀…唔好意思」
 
Connie走到去小祺身邊，將果d forum bowser完全熄哂
 
「妳自己知道聰明仔為人，妳仲擔心d咩?」
 
「始終……都怕佢承受太大壓力」
 
「妳定啦，如果佢咁易就輸嘅話就唔會係聰明仔啦」
 




「冇錯啦，我肯定佢今次又會贏到唔少賠償」穎雯係小祺身邊講
 
「佢贏唔少賠償?」
 
「佢以前綽號，係獎金獵人，只要有獎金，就有佢嘅出現，佢從來都唔打冇把握嘅仗」
 
「唔好擔心咁多啦Suki，妳咁樣會俾到壓力聰明仔」
 
同一時間，係樓下供應部嘅學翹，就瞓得非常舒服，正如穎雯所講，佢唔會打冇把握嘅仗
 
臨上庭前一晚，佢地仲一大班同事出去打邊爐，完完全全唔將單官司放係眼中，同苗學翹一樣放鬆慶祝嘅，仲有肖氏一家
 
肖氏一家亦都不停咁訂定慶功宴，再訂貴價傢俬之類，更甚者仲踩上苗學翹嘅單位叫租客搬走，揚言單位已經係屬於佢地一家
 
結果租客不堪受騷擾下又要報警處理




 
「報咩警呀!!!間屋已經係我地架啦!!!仲唔開門俾我地返入去!!!你地而家佔領左我間屋喎」肖師奶係門口大吵大鬧
 
「咩呀!!而定判左啦咩!!!一日未判間屋一日都係苗生嘅!!!佢唔係到，我而家就幫佢守住!!!」
 
最後都係要驚動警方到場
 
「你地唔拉佢?佢而家霸左我間屋喎!!!」
 
「肖太!法庭一日未判，間屋都唔係妳嘅!!呢個係法律，妳再唔走我就送妳去差館架啦!!!我地留左個飯俾妳呀」
 
肖師奶一家人嘅舉動，亦傳到去游律師等人耳中
 
距離開庭不足48小時，肖氏一家又搞咁麻煩嘅野出黎
 




「我真係服左呢一家人，乜都可以搞到出黎」游律師執好文件再同兩個學師仔講
 
「準備好聽日未?」
 
「一切都ready哂」  「ok，聽日好好打埋場仗佢」
 
熄左office嘅燈，離開firm，已經係晚上10點半
 
就算係必勝嘅仗，一流嘅律師同大狀都會做好萬全嘅準備，絕對唔會放過任何可以致勝嘅可能