係同屋室友?定係同居密友?: (S3)38. 生物科技追蹤

麥大狀拎住一大搭文件，係法庭內發表內容
 
「呢一份，係苗博士以前博士及碩士學位時，受到美國生物科技公司所做嘅其中一個服務，佢地利用人體嘅基因，去追尋起源，苗博士係男性，所以佢會用Y染色體去追尋同佢有相關關係嘅男性，而會用mitochondrial DNA去追查母系DNA基因，而我手上呢份結果，同埋各人士嘅照片就係到。我地得到美國政府、透過美國駐港總領事館嘅批准，去發表呢一份報告。而報告上所有人，均同苗博士都有類似基因」
 
法庭特別SET好嘅monitor，播出左唔同result，仲係非常學術性
 
「因為肖小姐對英文嘅認識有限，而且呢份報告非常學術性，所以我會為大家解釋。呢一份報告指出，世界各地都有同苗博士帶有相似Y 染色體基因嘅男士，同埋mitochondrial DNA基因嘅女士，我地睇睇佢地同苗博士嘅樣。」
 
Monitor中，有大量唔同國藉嘅男士同女士，佢地同苗學翹個樣都有幾分相似。當中有西方白人、日本人、越南人等等
 




「黑人都有?」就連麥大狀都忍唔住講，旁聽席嘅梁小祺同苗學嬛亦極力忍住，可惜佢地兩人嘅膊頭已經出賣左佢地，不停震緊
 
「如果肖太太話自己同苗博士係自己人，咁世界各地上呢一班唔同種族嘅地球村居民，會唔會比佢地更加係苗博士嘅自己人呢?咁所以苗博士應該將自己物業分哂俾佢地保管而唔係俾肖太太一家人所保管呢?」
 
麥大狀行過再飲一飲水
 
「肖太太口中所講嘅所謂自己人，有機會只係基於佢對物質上嘅渴求而編製出黎嘅藉口」
 
「控方有否覆問?」 「法官閣下，控方沒有覆問」
 




「辯方可以繼續傳召證人」
 
「辯方傳召當事人，苗學翹博士」
 
苗學翹坐係證人席中，依稀感覺到肖氏一家應該仲有招數未出，而女方爭家產都應該係剩低一招，不過在心中嘅苗學翹同麥大狀等人，都冇打算咁快反擊
 
「苗博士，雖然之前控方提問已經問過，咁我都會再問多一次問題，請問你清楚嗎?」
 
「清楚」
 




「我想問問你，同肖小姐係點樣認識?」
 
「我地係舊同事，我大學畢業後去左間公證行到做助理化驗員」
 
「當時肖小姐係咩職位呢?」
 
「佢係樣辦分拆員，即係sample preparation」
 
「工作時間?」
 
「我同佢都係屬於中班，所以比較熟絡」
 
「咁當時你揀中班原因係咩呢?」

「當時我係同時間修讀碩士同博士學位，所以利用上午同星期六日時間返大學做研究，而下午就返工」




 
「咁你同肖小姐用左幾耐就變為情侶關係?」
 
「大約半年，因為佢住得比較遠，我會送佢去到車站，然後先返屋企」
 
「咁當時你同肖小姐關係如何?」
 
「初時都會出街睇戲之類，佢會間唔中去我屋企食飯」
 
「咁大約幾耐，你第一次去肖小姐屋企見佢屋企人呢?」
 
「大約三個月後」「咁當時氣氛如何?」
 
「一開始，頭幾次仍然幾好」
 




「點解係頭幾次仍然幾好呢?之後發生咩事?」