係同屋室友?定係同居密友?: (S3)32. 原訟庭開庭

「法官閣下，我代表我嘅當事人，肖錢鳳娥女士向被告人苗學雯女士以及苗學翹先生追討其物業擁有權。苗先生去年曾承諾，將肖女士三女兒肖翠君小姐嘅名加入其名下之物業，當時苗先生曾承諾物業係屬於自己人，即係肖翠君小姐，而肖女士亦盡良好市民責任，將所居住嘅公屋交還政府。但當佢地到達律師樓準備更新樓契時，苗先生以業權不止佢一人嘅原因下拒絕更新樓契，令肖女士一家人突然無家可歸，每日都要往返內地家人屋企暫住。故希望法官閣下能頒令，令肖女士一家人能重新有一個居住地方」
 
三名法官然後各人拎起文件過目後，開始傳召證人
 
「辯方有否開案陳詞」
 
麥大狀企起身「法官閣下，辯方並不需要開案陳詞」
 
言下之意，我地可以完全反駁控方
 




「控方請傳召第一位證人，本案件申訴人，肖錢鳳娥女士」
 
林大狀起身，自信滿滿咁行過去肖師奶身邊，開始作出問題，當然所有控方問題佢地已經預先準備好，肖師奶只係需要答返佢地嘅答案出黎就得
 
「肖太太，依妳申訴嘅說法，係唔係話苗先生原來承諾將物業加上令嬡肖翠君小姐嘅名上樓契，不過最後反口?」
 
「係呀!!佢正衰仔黎架!!!」
 
「法官閣下!反對控方證人妄下定論!!!」麥大狀都預左肖師奶會咁講
 




「反對有效。證人，請勿對被告妄下定論」
 
「麻煩妳講一次當時情況俾各人知道」
 
「哦!當時我地食緊飯，我就問佢幾時先肯加我個女個名去佢層樓到」
 
「然後呢?」
 
「然後佢話信自已人丫嘛!我咪立即搵律師同埋交返間屋出黎囉!丫!點知佢又反口!」肖師奶以一貫市井之徒嘅口吻指責苗學翹，而且仲附上手勢
 




「咁即係依苗先生所講，自己人就係令嬡同埋妳地屋企?」
 
「咁當然啦」
 
「苗先生反口嘅原因係咩呢?」
 
「佢話層樓有佢堂家姐份，佢家姐唔肯加我個女名上去呀」
 
「依妳所講，即係苗先生同意，但係苗女士就唔同意」
 
「係呀」
 
「法官閣下，控方再冇問題」
 
林大狀返埋位後，麥大狀起身對三名法官鞠躬，再行去對麥大狀一面不屑嘅肖師奶面前




 
其實d大狀每一庭鞠咁多次躬，佢地條腰會唔會有問題呢?
 
「肖女士，剛才妳話我當事人即係苗博士話信自己人，俾佢地管理自己父母遺產係唔係?」
 
「係呀!」肖師奶好唔情原咁答，正常嘅，因為係辯方嘅盤問，而控方果邊嘅策略，佢地打算一律唔清楚、唔知等等
 
「但係佢有冇明確講佢口中嘅自己人係指令嬡同妳?定係另有其人?」
 
「佢話想俾佢姐夫看管住丫嘛」
 
麥大狀微微一笑，因為肖師奶已經跌落陷阱
 
肖師奶係屬於果一種聲大大，又覺得自己啱哂，咩都要出聲講嘅師奶
 




「咁苗博士果一刻話俾佢姐夫看管層物業，請問妳同唔同意，苗博士嘅姐夫係屬於妳地所講嘅自己人呢?」
 
「佢點會係呀!佢都唔係姓苗!!」
 
「但係妳都唔係姓苗，但係妳又屬於自己人?點解呢?」
 
「咁我係幫佢果邊架嘛!!當然係信我好啦!!我可以無時無刻睇住層樓」肖師奶好大聲反駁麥大狀
 
「照妳意思，可以無時無刻都睇住層樓就係屬於自己人的話，咁即係樓下保安員都可以係苗博士嘅自己人，甚至比妳更加自己人?」
 
肖師奶俾麥大狀咁問一問，就口啞啞唔識點答
 
麥大狀企係到等左一陣後轉身對三名法官講
 
「法官閣下，辯方再冇問題詢問」