係同屋室友?定係同居密友?: (S3)31. 即將開庭

肖氏一家同阿鼎到高院時，不忘接受電視台採訪，而鼎亦擺出好有信心嘅摸樣
 
當苗學翹等人落車時，肖師奶亦不忘搏同情
 
「阿翹，你俾返層樓我地啦，我地連屋都冇得住，而家好慘呀」
 
正當肖翠君等人想上前演戲時，佢地俾游律師阻止左
 
「麻煩申訴人請勿於開庭前接觸我當事人」
 




肖氏一家俾游律師擋一擋後，口中念念有詞，講出佢地自己鄉下話，游律師將所有野聽後耳中，雖然佢聽唔明
 
係庭外，有幾間會議室，苗學翹一家同幾位律師係入邊，準備最後準備
 
「我頭先，聽到佢地用鄉下話傾計」游律師同對其他人講
 
「應該係潮州話」
 
「佢地唔係客家人咩?做咩講潮州話?」
 




苗學翹RR個頭「應該話，佢地係住係福田嘅潮州人」
 
「你肯定?」麥大狀問
 
「咁應該只有潮州人成家可以用流利嘅潮州話對答掛?」
 
麥大狀聽到後笑一笑
 
另一邊廂，阿鼎再一次問肖師奶會唔會庭外和解，因為佢都係怕麻煩上庭嘅人
 




「肖太，真係唔打算庭外和解?其實上庭真係幾麻煩下」
 
「和咩解?我地贏梗架嘛!我地仲有必勝手段!怕咩呀?」
 
鼎聽到肖師奶咁講，忍唔住問「係咩呢?」
 
肖師奶拎出一份醫生紙「哼!我地仲唔贏梗?」
 
「咁我地就同佢地打，不過呢份野最後先拎出黎啦」阿鼎見到文件後講
 
「我睇佢地點打!」肖師奶自信滿滿咁講，唯獨係肖翠君面有難色，似乎有野想講又講唔出咁
 
旁聽市民及電視台節目主持陸續入到庭內旁聽席，而黎大狀同苗氏一家人就坐係一邊，趾高氣揚嘅肖師奶就坐係另一邊，同場仲有肖翠君嘅閨密等人，自從被收樓後，肖翠君就寄住係朋友屋企
 
黎大狀同拍檔傾好計策，而對方嘅招數，佢地亦預計好，因為佢地已經開左好多次會，收集哂成個chamber嘅意見同埋case law等等，得出左對方最常用嘅手段同埋理據，由血統到生活習俗到下幾代可能性都得出




 
每一單官司，佢地都唔放過任何可能性，呢個就係佢地得勝率咁高，同埋收費收咁貴嘅原因
 
等候個官黎嘅時候，肖翠君坐立不安，肖師奶見狀就好聲安慰
 
「放心啦阿女，我地實贏。妳早d同阿媽講，阿媽一早就可以幫妳作主啦」
 
「哦…」肖翠君仍然似乎有口難言一般
 
“咚咚咚，court!!!!!”
 
全場人都企起身，以示對3位法官嘅尊重，唯獨係肖氏一家人唔識起身，當鼎俾提示佢地時，佢地先企起身
 
「乜有3個法官咁鬼多架?」肖師奶係到顯見佢嘅無知
 




眾人忍笑坐低後，法庭書記讀出是次聆訊編號
 
HC聆訊1234，申訴人肖錢鳳娥要求受控人苗學雯女士、苗學翹博士分享之物業擁有權，並於去年發律師信後並沒有執行信件之要求，故要求原頌庭進行裁決
 
「申訴人法律代表，麻煩開案陳詞」
 
肖師奶非常興奮，佢覺得層樓即將屬於佢