係同屋室友?定係同居密友?: (S3)29. 開庭前夕

係紙巾Chamber內，麥大狀、姐夫同埋游律師係到不斷翻睇大台時事話題節目，明顯地，肖氏一家想用電視台資訊壓力，為自己上庭做大個勢，或者想要學翹果方知難而退
 
「用呢d下三流嘅招數，佢地果邊應該冇咩料可以打」姐夫睇完條片後講
 
「個節目一面倒幫對方講說話，明示暗示我地Client講大話欺騙佢地，我地會唔會反將佢地一軍?」麥大狀係到詢問
 
「呢層當然啦，唔通空門都唔射佢咩?」
 
節目一播出街後，民意冇肖氏一家想像中幫哂佢地，反而有聲音係支持學翹
 




當日節目內容…..
 
「今集我地節目收到申訴，肖小姐未婚夫原本承諾會係物業上加上肖小姐名，將物業贈予肖氏一家，但當佢地盡市民責任交還公屋後，肖小姐未婚夫就反口，引致佢地一家人而家無家可歸。我地嘗試過到物業地址了解成件事內容，發現物業已經租出，我地而家訪問下肖太先，其實成件事係點呢?」
 
「佢之前父母過身，咁我地怕佢俾人呃，所以就話加埋我個女名上去，為保安全，仲有佢d錢都落聯名戶口，信自己人好過信外人，自已人唔會呃佢嘛，佢當時話好架，咁我地咪交返間屋出黎囉。丫!點知到加名果日，佢先講層根唔係佢一個人，仲有佢堂家姐有份，我地心諗大家遲早都係一家人，叫佢地簽名好易冇問題，點知佢地反口話唔肯加我地名喎!即係有心呃我地囉」
 
「咁妳地有冇嘗試聯絡過對方呀?」
 
「當然有啦!!!佢地仲拒絕對話」
 




「咁而家妳地有咩計畫咁呀?」
 
「我地搵左律師解決，要佢加名同埋賠償返俾我地」
 
同時間，電視播出學翹嘅電話訪問
 
「苗先生，我地係電視台打黎，係關於你同肖小姐嘅….」
 
「呢件事我已經全權交俾律師處理，事件進入法律程序，我唔會有任何意見」
 




「但係苗生，會唔會係溝通上或者雙方理解上有問題?」
 
「呢d野貴台可以問我代表律師」
………….
係大學內，有唔少同事都擔心緊學翹同小祺，怕佢地情緒上因為呢單官司而有所影響。對小祺，係擔心學翹，不過對學翹黎講，問題唔細，因為肖氏一家曾經聯同電視台上去間屋到採訪，騷擾到租客，甚至要報警處理
 
更甚者，電視台仲間接將學翹起底，佢之前工作地方同埋同事都受到採訪，所幸舊公司同事同上司都知道事件來龍去脈，佢地口供一致，唔接受採訪
 
今日，係學翹同小祺去拜父母果時，電視台同肖家突然走出黎訪問，一時間，小祺不知所措
 
「苗博士，想請問下會唔會履行你同肖小姐嘅協議，將物業加上佢名?」
 
學翹一貫答案
 
不過，今次肖家係到，場面點會咁輕鬆?




 
「你個衰仔!!!呃我個女不特止仲呃埋未來外母!!!原來收埋個女人係到!!!!」
 
肖太咁講，video立即捕捉小祺。學翹立即用身擋住小祺
 
肖師奶同佢d女點會咁易放棄，佢地仲用手袋追打小祺，而學翹為小祺擋左無數咁多下
 
如果唔係職員報警，肖氏一家會繼續打落去
 
學翹被送去醫院驗傷
 
幾晚後，呢次衝突係電視台左cut右cut下播出，而學翹同小祺個樣都曝光
 
「呵!!!個衰女原來跟左個男人一齊，仲要好有錢咁!!!」
 




「嘿!!!係機會叫佢再俾多d錢供養我地!!個死女包唔聲唔聲搬走丫拿」
 
小祺父母睇到自己個女出現係電視中，唔係第一時間關心小祺，而係想辦法係小祺身上再拎多d錢
 
係多番壓力下，呢一場收到好多師奶八掛嘅官司即將開始
 
有人支持肖氏一家，認為學翹應該加埋肖小姐個名上物業
有人支持學翹，層樓係屬於苗家，佢地有權決定加唔加名
 
所有事，將係高院內解決