係同屋室友?定係同居密友?: (S3)15. 情侶筆

學翹指一指塊資料牌叫小祺睇
 
「呢班車係各站停，我地等下一班車，會飛站」
 
「得架咩?」小祺對此表示難以致信
 
「妳睇睇外面，係咪有好多路軌?」
 
小祺望一望後，發現同香港地鐵火車完全唔同
 




「係日本，地鐵就要站站停，但係JR就唔洗」
 
「咁方便嘅」  「除左JR，仲有京王線、小田原線，大把鐵路搭」
 
「你搭過哂啦?」
 
「大部份啦，我鍾意搭鐵路」
 
下一班車準時到達，佢地兩個上左車後坐低。日本嘅鐵路都有暖氣提供，所以小祺唔覺得太凍
 




列車好快去到三鷹站，落車後佢地就去搭接駁巴士，三鷹市已經離開東京都23區，係東京近郊衛星地市，好多人都係東京23區返工，放工就返呢D衛星城市
 
雖然係衛星城市，但所有野應有盡有，由幼稚園到大學分部都有，有幾間百貨公司等等
 
接駁巴士一睇就知道係去美術館，因為成架車嘅顏色已經話左俾你知佢嘅目的地
 
一入美術館，小祺就見到隻好肥嘅龍貓係售票處歡迎佢地，仲有貓巴士個車站
 
抬頭一睇，仲有天空之城個機械人
 




學翹拎出一早預訂嘅入場券，帶住小祺入去
 
一開始佢地睇左宮崎駿嘅迷你劇場，係講煤炭屎鬼
 
小祺睇得好開心，散場後佢地就去探下貓巴士同埋魔女宅急便嘅場景
 
去到精品店，小祺揀左一套龍貓嘅鎖匙扣
 
「係日本買，同係香港買，意義完全唔同」
 
學翹拎起黎睇「都係嘅，證明我地曾經黎過呢到」
 
袋好戰利品，佢地搭返果一部可愛巴士出去市中心嘅百貨公司食午餐後，小祺望到街外有間文具舖，身為文具控嘅小祺，忍唔住捉左學翹入去睇文具
 
三鷹市雖然係東京多摩地區嘅一個小城市，但係佢地理位置好好，所以佢完全唔似一個郊外城市，佢係類似香港嘅新市鎮




 
小祺係舖內揀左一D文具，而當佢去俾錢果時，佢俾一對鋼筆吸引住
 
果對鋼筆唔係最新款，不過筆身似係用木造，係香港買的話至少要$3000，而呢度，一枝都只係兩萬円，老闆見小祺好似呆左咁，就用佢有限嘅英文同小祺講
 
「U，look pen?」老闆指住枝筆
 
「呀…YES YES」
 
「two?」老闆見到學翹陪小祺入黎，所以就斷定佢地係一對
 
「yes yes」平時英文唔差嘅小祺，而家都有d食螺絲
 
老闆拎出黎俾小祺睇，佢一摸上手就好鍾意，用木黎製造嘅筆，同一般材料造嘅唔同，每一枝筆都會有佢自己獨特嘅紋理，摸上手嘅感覺係獨一無二
 




老闆用佢有限嘅英文招呼小祺時候，學翹終於出口了
 
「筆是用木全製造的嗎?是3776呢」(日文)
 
老闆見到學翹用日文查詢後，立時放心好多，而且仲好細緻咁講解枝筆
 
不過係白金3776的話，學翹就非常熟悉，因為一直以黎，佢都係用住同一枝3776鋼筆
 
「很少機會找到3776全木製筆，而且價格不高」(日文)
 
「啊!你也是用慣鋼筆的啊」(日文)
 
「是啊，亦是3776」學翹拎出佢自己果枝俾老闆睇
 
「保養得很好啊，是SF尖吧」(日文)




 
「是呢」(日文)
 
「那你們要一對筆嗎?」(日文)
 
「係!麻煩老闆了!」(日文)
 
老問俾張紙出黎，叫佢地寫上自己個名，因為老闆會送埋刻字，不過佢只有日本漢字同埋英文
 
所以學翹就將佢地兩個人嘅英文名，連同日文片假名寫低俾老闆
 
老闆親自為佢地刻名，再送埋墨膽俾佢地用住先
 
佢地兩個，係日本就買左第一對情侶筆