係同屋室友?定係同居密友?: (S3)14. 到達東京

小祺慢慢打開雙眼，發現好多乘客都起左身，佢睇一睇個mon，原來已經到左東京上空
 
不過因為時間仲早，加上冬天關係，個天仍然係黑漆漆一片
 
小祺望一望學翹，發現佢都係剛瞓醒，機長亦宣佈30分鐘後會降落，所以佢地爭取好時間去洗手間
 
30分鐘後，飛機降落成田機場
 
落機時，佢地上左巴士搭去客運大樓
 




一打開門時，小祺感覺到日本嘅冬天有幾凍。不過見慣大場面嘅學翹都係覺得有點涼
 
「你唔凍架咩?」  「其實都唔係太凍者」
 
果個朝早，佢地落機時，氣溫大約有3度左右
 
小祺已經著住heat tech同羽絨，相反學翹只係heat tech加底衫同衛衣再加件絨背心同軍褸
 
「點解你可以唔怕凍嘅??」小祺果刻已經凍到震
 




「小事啦」
 
佢地同其他乘客一齊去到入境櫃位，打開護照時，小祺先發現學翹本護照貼滿哂日本出入境嘅貼紙
 
「怪不得佢話唔凍，原來佢黎日本多過食飯」
 
學翹拎左部行李車，將兩個人嘅行李放好後，一齊去入境
 
佢地入境嘅程序好迅速，多得學翹識講日文，同埋佢本護照貼滿日本入境紙
 




佢地兩個比其他人快到月台等車，又係多得學翹熟路
 
上左NEX後，小祺坐低，感到非常舒服
 
因為佢係機上瞓左陣嘅關係，佢而家唔太攰，所以透過窗戶望一望日本嘅景色
 
「估唔到真係好似卡通片同埋日劇嘅景色咁樣」小祺自言自語
 
「呢到都未係東京，景色係鄉下少少」
 
「呢度唔係東京咩?但係我地係東京成田機場降落喎」
 
「成田機場係千葉，迪士尼都係，一向被視為東京近郊或者衛星城市
 
小祺望住窗邊景色，慢慢由鄉郊變成小鎮，再變到大城市，所以佢知道自己進入左東京




 
東京俾小祺感覺，係非常先進，佢見到d停車場都呆一呆
 
到左新宿，學翹同佢一齊落車
 
「我地係東京住哥斯拉酒店」
 
「好近架?」
 
「新宿東口一出，經過地標果汁店後過馬路後就到」
 
小祺一舊雲咁跟住學翹行，佢過左馬路後抬頭，真係見到隻哥斯拉係到
 
去到酒店lobby，學翹行去front desk
 




「咁早可以check in咩?」
 
「日本d洒店可以幫客人留起行李，到預定時間再拎上去」
 
「咁方便嘅」
 
佢地放低行李後，冇立即去玩，而係搵一搵野食先
 
第一日，第一餐，佢地去左東京站到搵野食。東京站，係一個可以俾人搵到衣食住行嘅車站，所有野對小祺黎講，都係非常新穎
 
係一間拉麵店，佢地一齊買左飛仔就坐低
 
「全自助式，我都係第一次見」  「係日本呢d好普通」
 
「我地似唔似係包廂食野呀?」小祺笑住咁問




 
「咁咪好囉，個食相唔會俾人睇到哂」
 
食左第一餐後，小祺覺得個身暖左d
 
「點呀導遊，我地第一站去邊呀?」
 
「去卜吉力美術館，睇宮崎駿嘅野」
 
學翹帶住小祺去到中央‧快速線到等車，不過佢唔係等一班車就上
 
心感奇怪嘅小祺，忍唔住問學翹
 
「點解我地唔上車嘅?」