係同屋室友?定係同居密友?: (S3)13. 搭飛機

大家開心抽完獎，繼續坐低食野，唔同嘅係，小祺同學翹兩個人都公開咁坐埋一齊
 
不過其實全個部門都知道哂，所以佢地收收埋埋都冇咩意思，倒不如大大方方咁樣仲好
 
學翹好似平時一樣，好細微咁照顧小祺，經過上半晚，所有同事都見怪不怪
 
而有同事對佢地下星期嘅旅行有點興趣
 
「下星期旅行?」小祺俾人問道
 




「係呀，通常都係女仔Plan行程架啦，乜妳地唔係架?」
 
小祺一臉唔好意思嘅樣回覆「我地比較特別……」
 
「聰明仔你負責呀?」
 
學翹點一點頭「我自己去過幾次，唔難」
 
「有冇d我地好少可會去嘅地方呀?」
 




「唔……通宵夜行列車算唔算?」
 
「你邊到搭呀?」
 
「由東京站去高松，夜晚10點上車，朝早8點左右落車，再去高松食烏冬後行栗林公園之類」
 
同事們聽到學翹安排嘅行程，都有d 1999
 
「你唔係玩東京咋?」
 




「唔係呀，東京之後落四國廣島，大阪就下次先去」
 
「似乎行程好豐富咁喎」
 
「唔會太趕嘅，太多景點反而玩唔得多，而且太趕嘅話，小祺會好攰」
 
大家飲飽食醉後，係時間散場。學翹同小祺兩個人自然係一對人咁返宿舍
 
係佢地梳洗完之後，就開始執行李
 
由於酒店有洗衣乾衣服務，所以佢地唔需要帶太多衫去，保暖衣物唔夠的話可以去到果邊先買
 
小祺係到檢查自己有冇帶漏野
 
「我地係夜機去嘛」




 
「係呀，red eye flight，一落機大約5點半，然後坐NEX去新宿放低行李食早餐再去玩」
 
「你會唔會太攰呀?」
 
「係NEX上邊瞓陣就得」
 
小祺對學翹Plan嘅行程絕對有信心，所以佢都冇咩問題
 
係出發前，佢地安排好哂所有野，熄哂屋企嘅燈同電掣後，學翹就叫車出發去機場
 
老老實實，今次係小祺第一次搭飛機，所以佢難免有d緊張
 
佢地9點半左右去到機場check in，然後坐低飲杯野休息一下
 




「前往東京嘅航班召集…..」飛機開始召集乘客上機，學翹就同小祺拎住boarding pass去登機口
 
上到飛機，去到佢地嘅座位，學翹俾小祺坐窗邊
 
雖然係凌晨機，但係都有唔少乘客。乘客們魚貫登機，小祺頭頂嘅手提提行李倉反而好少人打開
 
身邊嘅學翹教佢點樣使用機上嘅娛樂，遊戲機、電影、紀錄片等等，不過學翹好鍾意睇架飛機嘅飛行路線圖
 
大約30分鐘後，機倉門關上，飛機慢慢離開登機橋，滑行去跑道
 
「咚」安全帶訊號燈充起，佢地兩個好乖咁扣上安全帶，再認真睇空姐/空少講解嘅安全措施
 
「goodnight everyone，welcome aboard ，this is your captain，we are going to have about 5.5hours direct flight to Narita  Airport，please enjoy your journey」
 
「cabin crew，please sit，ready to take off」




 
機長將飛機停係跑道，然後加速起飛
 
小祺同學翹第一次旅行即將開始
 
「咚」經過10分鐘左右飛行，飛機去到穩定高度後，空姐/空少開始派餐
 
今晚個飛機餐同平時差唔多，都係意粉同飯之類，當然仲有雪糕等等
 
飛機餐過後，小祺開始有d攰，所以佢較低張椅，合上雙眼