係同屋室友?定係同居密友?: (S3)09. 公開關係

經過兩晚金光噴射飛航旅程，學翹都已經屙清屙淨，再飲返d保礦力後，補充體力
 
佢地上左車後，向bbq場地出發
 
「你係咪已經好返哂?我擔心你一陣又屙」
 
「冇事啦，而家正常返哂」
 
學翹部車徐徐駛到bbq場，原來佢地已經唔係最早果d人，應該係話，佢地係準時，不過係最遲果批人，所以佢地一齊落車果時，已經吸引哂所有人嘅目光
 




「都話佢地兩個會一齊黎架啦」有同事偷笑咁講
 
「咁佢地兩個係一對，又一齊住，一齊黎好奇咩」「仲一齊請左長假添」
有人附和到
 
「但係佢地仲未承認喎」  「你理得人地者，佢地兩個一向低調」
 
「不過係全個部門都知道哂咁解」然後大家哈哈地笑
 
遠處見到同事笑緊嘅學翹，依稀知道佢地講咩




 
「洗唔洗拖住妳入去呀?」「咩喎，又係你話想低調d嘅」不過小祺果刻有點開心
 
「咁遲d先啦」說罷，佢地冇拖手咁一齊行入去
 
小祺坐低係女仔果邊，有少少不滿
 
「做咩呀Suki?男朋友激嬲妳呀?」Connie係小祺身邊問
 
「邊…邊度有呀…」小祺支吾以對




 
「唔洗扮架啦，基本上全部人都知道妳同聰明仔拍拖同居嘅野架啦」
 
Connie咁講後，小祺望住所有女同事，大家都點點頭承認
 
「所以妳唔洗再收收埋埋啦」
 
「妳地…點會知道…」
 
「上次中秋已經好明顯啦，而且妳每日返放工都坐佢車，又一齊食早餐」
 
「仲有一齊買餸」 「所以呢，大家都知架啦，唔洗再收埋」
 
小祺嘟長個咀「唔係我話收埋，係佢好似冇咩意思公開者…」
 




「咁Suki我地問下妳丫，妳地幾時開始同居架?」
 
「呀…..7月果次10號風球，我果日返唔到屋企，然後去左佢到暫住囉」
 
「好浪漫喎，之後就一齊啦?」有女同事追問
 
「唔係呀…係…我俾我屋企發現左…..之後我想做傻事，俾學翹阻止左，之後佢接左我返宿舍同佢做室友….至於拍拖…我地都係上個月左右嘅事…」
 
「咁妳地做室友果時，佢讓間房俾妳瞓呀?」  「係…係呀」
 
「佢對妳真係好好呀」有女同事開始羨慕
 
其時學翹同其他男同事傾完佢部新車，因為學翹唔係揀純電款，而係揀油電混能
 
一眾女同事伸手叫學翹過去，佢自自然然咁坐小祺隔離，當然，兩個人之間係有少少距離




 
「喂呀聰明仔，做咩同Suki坐到咁開呀」
 
「下…有咩問題?」學翹諗唔到其他人會咁講
 
「咁你地兩個都拍拖同居啦，全部人都知，唔洗咁怕羞喎」
 
學翹終於明白，點解d同事會咁講
 
「咁呢到又唔係屋企，公眾地方都係唔好啦，以免俾人話我派狗糧」
 
一d冇拖拍嘅女同事立即用不滿眼神望過去
 
學翹見狀，就將佢同小祺之間嘅距離拉到最近，一於派狗糧俾其他同事
 




小祺見到後，個心立即甜左好多。佢一直以為，係佢自己唔夠靚、冇身材冇長腿，所以學翹先唔打算公開佢地之間嘅事。原來佢只係唔想d單身狗難堪
 
不過今日佢將兩個人之間嘅距離係大家面前拉近，即係代表要公開兩個人之間嘅關係
 
所以小祺都順勢挨個頭去學翹膊頭