係同屋室友?定係同居密友?: (S3)01. 新購文具

小祺坐係電腦前，正在瀏覽緊一D賣文具嘅網店
 
「擦膠….鉛筆….間尺….筆袋」佢自己喃喃自語係到數，又係紙上mark低數目
 
學翹伸個頭去小祺身邊睇下佢做乜
 
「妳做咩大手入文具呀?」「嗯?我打算等d文具到貨後送返保良局俾小朋友」
 
學翹係電腦中見到小祺完全係一批批咁入貨
 




「妳點安排送貨?」「叫人用SF寄去囉，我寄付埋」
 
「點解妳唔SF去我地學校，我再幫妳車返去呢?」
 
「你陪我返去?你唔介意咩?」
 
學翹抱起小祺，將佢放係自己大髀，小祺雙手撓實學翹條頸
 
「有咩好介意?由追妳果日開始我就咩都唔介意啦」
 




「你有追過我咩?」小祺笑住講
 
「果時我唔算追緊妳架?」「邊有追過呀?你係直接叫我黎住」
 
佢地兩個人鼻磨鼻，真係好令人羨慕
 
「今晚唔得呀，親戚未黎完」  「咁咪等下囉，反正每晚都攬住妳瞓」
 
「你呀!咸濕佬」  「妳呀!快D揀好文具先啦」
 




「係喎，仲有咩要買呀?」「原子筆、改錯帶之類囉，仲有螢光筆同memo紙」
 
「呢d….唔知佢地有冇用喎」  「小朋友會長大升中學架嘛，中學生就係用呢d架啦」
 
小祺恍然大悟，於是佢再大手咁入以上嘅文具
 
「以前妳住保良局，洗費俾個俾架?」
 
「社署俾，大約1500一個月」
 
「1500蚊?」  「係呀，夠每日一個午餐同買日用品咋」
 
「咁妳平時都係宿舍唔出街?」 「出街要用錢，所以我揀留係宿舍溫書就算，再唔係就去借書或者上網睇小說」
 
「即係妳完全冇社交咁喎」  「係架，所以我得好少朋友，我被稱為班上嘅幽靈」




 
「乜咁啱呀?我係實驗室嘅幽靈」
 
「喂呀!!!俾錢啦!!!咪係到抽我水啦，都話今日唔得囉」 「摸下都唔得?」
 
小祺將件衫拉返落黎「你次次摸完摸完就黎架啦，今日唔得。過幾日先啦」
 
於是乎佢地兩個乖乖地咁去俾錢，之後就係等兩日後送貨
……
學翹打開後座車門，將一盒盒嘅文具都放係後座，然後放埋買餸車入去後，就載住小祺，向保良局出發
 
行過隧道時，小祺通知保良局，話佢地知自己就返到
 
10分鐘後，學翹車住小祺返到保良局之中
 




打開後座車門，拎出買餸車，將所有野放入去後，就行入宿舍去探小朋友
 
今次係學翹第一次跟小祺返保良局，可以話係跟小祺返外家一般
 
而且有小朋友圍住學翹，當佢動物園嘅動物咁欣賞
 
「呢到d鈿路….全部都係半孤兒?個個都好可愛喎」學翹望住d小朋友時心中暗道
 
五分鐘後，佢俾呢班小朋友玩到懷疑人生
 
「哥哥!!點解你陪小祺姐姐黎架?」  「點….點解呀?」
 
「你係咪同小祺姐姐拍拖呢?」  「呢…呢層….」
 
「黎啦，認左佢啦，你係唔係男仔黎架」




 
「你同過小祺姐姐錫咀未呀?」「有冇一齊瞓晏覺呀?」
 
D細佬問嘅問題愈來愈深入，一時間，學翹唔知點樣去解答呢班小朋友嘅問題
 
學翹覺得，剛剛用可愛黎形容呢班小朋友，係一個錯誤嘅選擇