係同屋室友?定係同居密友?: (S2)60. 被發現

今日學翹同小祺係學翹嘅Studio之中整理緊佢地件畢業袍，今日佢地book左影畢業相
兩個人，係Studio入邊影相影得好甜好開心，唔講嘅話以為佢地兩個係黎影婚紗相，不過都應該差唔多架啦
 
學翹同小祺行九龍灣另一個原因，係今日佢地部新車會送到，可以渣走
 
去到IKEA，小祺撓實學翹，兩小口係到睇下家居野，睇下有咩要買返宿舍
 
然後佢地去到餐廳，學翹食佢最愛嘅豬手，仲有小食拼盤。小祺就食三文魚沙律，即使唔係食大餐，兩個人只要係埋一齊，佢地就非常開心
 
 




當佢地完成左呢一餐瑞典菜後，佢地就離開IKEA，去左運動舖買左對情侶波鞋後，再向掃把佬陳列室出發，渾然不覺，小祺已經俾人盯上左
 
而當佢地離開mega box時，身後多左個年輕男子跟住佢地
 
果名男子偷偷地拎電話出黎錄低學翹同小祺
 
正當佢地等過馬路時，小祺忽然感覺到有人好似跟住自己咁，呢個應該係小祺早年警戒心極高情況下練習返黎嘅技能
 
小祺好快回頭一望，發現冇人係佢地背後
 




「做咩事呀?見到熟人?」學翹問小祺
 
「我好似覺得有人跟住我地」
 
學翹望一望身後，只有一班一齊等過馬路嘅途人
 
「妳放鬆d，唔好咁緊張」學翹安慰小祺
 
「我怕俾屋企人發現，佢地仍然不停查探我而家住邊」
 




學翹好理解點解小祺咁驚，為左安撫小祺，學翹帶佢行到另一邊
 
「咦?做咩行呢邊嘅?」小祺問
 
「妳細佬係唔係高高地，有少少肚腩，有d mk仔feel?」學翹問小祺
 
「咦?你點會知架?」正當小祺想轉身望時，學翹叫停左佢
 
「唔好望，佢而家係我地後邊」「後邊?!」
 
小祺一知道細佬係佢附近時，變得非常恐慌
 
「佢頭先係IKEA餐廳已經跟住我地」
 
「咁點算呀?」「跟我黎」學翹帶住小祺一個轉身就去左後巷，再上樓梯後係工廠飯堂前門離開工廠大廈後，再去掃把佬陳列室




 
當佢地等部車黎果時，學翹同小祺係陳列室內嘅角落位望出去，其時小祺個細佬仲係到左搵右搵
 
「估唔到係呢到見到佢」小祺坐低後講
 
「佢似乎不停搵妳喎」「咪又要問我攞錢」
 
掃把佬sales見到佢地顧客等車時左閃右避，都覺得可能有人會煩到自己顧客，於是sales主動問佢地洗唔洗報警或者叫保安
 
「呀….唔洗啦，我地想係冇咁多人見到嘅地方拎車就可以」
 
不過最冇咩人見到嘅地方就係馬路
 
學翹部新車由試車員駛到陳列室門口，檢查冇問題過後，佢同小祺快步上車
 




首先佢地幫部車加滿油，然後就返學校，去保安部登記新車
 
不過佢地仍然俾人發現左，可幸嘅係，小祺細佬未及睇清楚佢地去邊時，學翹已經用右腳俾油離開左九龍灣
………………………………………………………………………………………………………………..
「咩話!你話你見到家姐呀?」  「係呀，仲同個男仔拖哂手咁」
 
「死女包，怪唔得拉搵唔到佢，原來搬走左同人住」小祺爸爸好嬲咁講
 
「佢好耐都冇拎錢返黎喎，我地要點搵佢?」
 
「佢係邊到出現呀?」 「九龍灣囉，應該係攞車啦」
 
「有車添呀?咁就更加要搵個衰女出黎!咁多錢唔孝敬下屋企點得」
 
「但係我地都唔知佢係邊」「你同我定啦!!佢話已經讀完書啦嘛!!佢似乎再想讀落去!!!我地就去大學搵下佢」




 
小祺個爸爸都唔算蠢得哂
 
「哎呀，個女有男朋友，又有新車，應該好有錢」小祺媽媽加把口講
 
「有錢就更加要俾我地啦!!唔洗佢養我地呀?」
 
「係喎，之前你地咪見到家姐個中學同學嘅，有人話佢想追家姐架喎，而且仲有D錢」
 
「咁就要個女嫁俾同學，拎多D錢返黎，不過睇下而家果個男仔係咩料先啦」
 
「佢渣日本車仔咋，斷估都唔多錢」
 
「唏!有咩用?你家姐個同學就唔同啦，係銀行做，舒舒服服坐寫字樓!你家姐都係唔識揀人架啦，生女真係…冇個有用嘅!!老公都唔識揀!!」
………..




係宿舍之中，小祺仍然好擔心佢屋企會搵到黎大學並且大吵大鬧，因為佢深知道屋企係咩人
 
學翹見到小祺悶悶不樂個樣，都知道小祺心中諗乜野
 
「妳唔好咁擔心呢」  「我係怕佢地走入黎騷擾到其他人，或者令到我地難堪」
 
「咁大學係公眾地方，咩人都可以入黎，冇辦法」
 
「希望佢地唔會黎啦」小祺挨住學翹膊頭
 
「唔好擔心，我地全部人都會好好咁保護妳」
 
當刻小祺知道自己冇揀錯男朋友，學翹的確可以照顧到佢一生一世
……………………………………………………………………………………………………
 
究竟小祺屋企會唔會發現到佢?會對佢做咩行動?
 
肖氏一家嘅如意算盤會點樣?上到庭後嘅大戰又係點?
 
小祺屋企人為左錢會唔會私下將自己個女嫁出去?
 
苗氏一家人又會點樣去保護小祺?
 
請留意第三季發展