係同屋室友?定係同居密友?: (S2)54. PG Hall

係實驗室內，郭曉昕對住自己部Macbook係到打緊introduction，雖則話有3-4年時間俾佢打Ph.D嘅論文，但一篇論文至少要50000字以上，仲厚過本字典，所以好多Ph.D學生都會趁早就打定introduction之類
 
係Vincent協助之下，Rachel已經完成左introduction、abstract、methodology、hypothesis之類
 
「連Suki都係到派狗糧俾我」佢係Macbook中同小祺wts
 
Rachel伸一伸懶腰，佢阿哥一家人去左旅行，所以佢費事要姐姐照顧佢，就同阿哥講呢個星期返學校住
 
不過佢又唔想打擾到小祺，一陣佢地恩愛得太大聲，自己又尷尬
 




所以佢係學校唯一一個可以落腳過夜嘅地方，就係實驗室，正如小祺話齋，可以係office瞓，去gym房沖涼，洗衫就儲埋一大堆先洗
 
係佢打喊露果時，一份paper拍去佢頭上
 
「做乜野呀?胡鎮業?」
 
「妳眼瞓呀郭曉昕?」
 
「少少啦，我諗緊去邊到瞓」 「下?妳唔返屋企?」
 




「阿哥一家人去旅行，我又費事煩到姐姐，又唔想咁遠返東涌，咪打算留係學校囉」
 
「一星期喎!!!妳留係到一星期?」
 
「係呀，正如Suki咁講，留係學校過夜冇咩問題嘅」
 
「妳唔去Cleverly宿舍?」
 
「去黎做咩呀?一陣佢地啪啪啪果時我係到做觀眾同旁述咩，唔好做電燈膽啦」
 




Vincent再用paper拍落Rachel個頭到「黎我到啦，反正妳都黎過」
 
「要你瞓地下一星期喎，你冇問題?」 「有咩所謂?」
 
Rachel係master果時都有人追，但係好奇怪，不論有錢仔、富二代佢都睇唔上眼，反而到左Ph.D果時，佢對Vincent有一種特別嘅感覺
 
佢好佩服Vincent嘅堅持，為左自己鍾意做嘅野，一個人由澳門過黎香港讀書。雖然兩個地方之間距離唔遠，但始終係自己一個人離開屋企去第二度生活，真係好少d勇氣都唔得

Rachel拎出Logbook，將今日嘅實驗落log，再整理返呢個實驗嘅data。連續兩次inoculation都有data，Rachel心中大叫好彩
 
執好自己係lab個位後，Vincent同佢兩個人一齊去canteen食飯，然後再返lab坐多陣
 
清理好哂所有野，確保incubator運作正常後，佢地離開研究大樓，一齊行去研究生宿舍
 
「點解你唔搬出去住嘅?你真係24/7係學校架喎」Rachel問Vincent




 
「唔奇呀，好多學生都係咁啦」
 
「係Macau U都係咁呀?」  「都有D外地黎嘅學生，佢地會留係學校囉，妳以為佢地一放學就去賭場咩」
 
「乜唔係架?你係澳門有咩娛樂?」
 
「老老實實，真係冇喎，上下網，睇下書一日」
 
「唔會去珠海呀？」「有時一大班人食飯咪過去囉」
 
「你冇拖拍咩?咁悶?」  「冇呀，遇唔到」
 
Vincent打開宿舍地下大門，帶住Rachel入去。如果係UG Hall，一定會俾實Q問長問短，因為UG Hall係嚴禁屈蛇，屈蛇已經唔俾，更何況係鴛鴦蛇?
 




不過去到PG，學校同舍監都已經完全唔理，更有postdoc係一家人住埋係PG Hall，錢都慳返唔少
 
「叮」，lift門打開，Rachel跟住Vincent去到佢間房。PG Hall同UG Hall最大分別，就係PG Hall每間房都有獨立浴室洗手間，如果要煮野食，就要去每層樓嘅common area，果到係打邊爐勝地，每到節日，總係會有好多人分享食物，令大家唔會覺得獨單