係同屋室友?定係同居密友?: (S2)53. 對方Chamber

黎大狀坐直個人「今次client係我太太同舅仔，所以背境我知道哂，你地而家要做嘅，係同麥大狀商量下，對方嘅論點同證據立場同理據。記住今次係民事訴訟而唔係刑事，兩種打法唔同」
 
「係….明白」
 
兩個Trainee不斷咁提出方案去擊破對方理據，其實對方只有一個論點，就係學翹話信「自己人」
 
肖氏一家嘅論據，就係佢地同學翹關係密切，屬於「自己人」，更甚者因為學翹祖上N代係客家人，同時間肖氏一家都係客家人，所以佢地就認定學翹所講嘅「自己人」一定係講佢地
 
「如何定下『自己人』定義?」游律師開口問trainee





「係師兄….」兩個trainee一早就做好哂功課，所有問題都唔大，當然，幾位前輩老早就諗到呢d方法，當然佢地都想知道trainee嘅想法
 
「以佢地嘅論據，所有野都好牽強，如果真係打嘅話，可能好快就Close case」
 
「再出一封信俾對家睇下佢地撤唔撤?」
 
「我諗唔洗啦，佢地呢家人，唔去到法庭輸一次唔甘心」
 
「會唔會去到Final appeal?」
 




「appeal都未必show佢地，仲話final appeal，有政治背景唔係優勢」
 
兩位大狀講得冇錯，佢地之前都打過幾次政治案，係冇人睇好之下係Court of Final Appeal將政府成功擊敗
 
似乎係高院原訟庭之中，將會有一場一面倒嘅戲碼上演
……………………….
係肖氏一家代表律師嘅陪同下，佢地去到上環一座普通寫字內，同佢地個大狀見面
 
「我睇過哂妳地嘅論據，主要係話被告人曾經應承信任自己人，亦會將佢地嘅名，即係妳地一家人加上樓契中，我有冇理解錯?」
 




「冇呀，咁佢老豆老母唔係到，層樓就係佢個仔架啦，無啦啦又話未承繼遺產又突然話樓契仲有外人名」肖師奶好不滿咁講
 
「理論上呢，佢堂家姐係同佢有血緣關係，都可以叫做自己人。問題係妳地有冇同佢協議過會結婚、同居或者有證據證明妳地已經關係已非一般?」
 
「例如有咩?」肖師奶問
 
「例如….佢定期幫妳地買餸請食飯之類」
 
「唏!咁一定有，佢成日幫我地買餸同請我地食飯!」
 
「至於要求賠償果到呢，妳地失去左咁多，要求50萬唔算過份，我會盡力幫妳地爭取」
 
肖氏一家人聽到大狀咁講後，信心又大左，佢地等左咁耐，又俾人串左咁耐，終於可以贏返哂所有野返黎，佢地開心到一離開寫字樓就想去慶祝
 
「對方有冇要求過和解?」大狀問




 
「佢地就係怕輸先叫律師黎和解，我話左一定唔會架啦!!!」
 
「或者俾我睇睇方案?」
 
「收都冇收，就咁趕走左佢地」
 
「咁樣，我盡量幫妳地爭取最大賠償同利益，但係都要睇下個官點判，而家到上庭嘅日子，妳地就唔好再同對方有任何聯絡，所有野都交俾阿鼎佢地處理。如果有問題呢，妳地可以通過阿鼎搵到我嘅」
 
「下?直接搵你唔得架!?」肖師奶有d唔明
 
「肖太，因為所有大狀都係要經由事務律師事務所聘請，一般要聯絡事務律師，再聯絡我地大狀開會，希望妳明白」
 
「哦，咁好啦」
 




「我相信過兩日對方事務律師就會聯絡我地，到時我就知道佢地會搵邊個大狀幫佢地打呢場官司」
 
「唏!我地仲會輸咩?」
 
「肖太，世上冇一定贏嘅官司，就算好似刑事四大天王咁出色嘅大狀，佢地都會輸官司」