係同屋室友?定係同居密友?: (S2)51. 和解失敗

游律師帶住兩個trainee去到代表肖家Soli嘅firm到，準備同對方商討和解之事。係車上，兩名trainee不斷返check資料
 
對方Soli係同某地有密切關係嘅人，係業內並唔太有名，係果種做普通法律顧問嘅蚊型firm，一般普通準備合約、樓契之間嘅事，呢款firm一定冇難度，但係遇上要搵大狀上庭呢d case，可能力有不遞。呢間firm嘅老細就係靠政治關係先可以有多生意，同埋會有人俾少少薄面
 
係firm嘅會議室內，肖氏一家已經心高氣傲咁準備好大戰一場，佢地認定學翹搵律師黎係求和，所以佢地係前一晚開左家庭會議，要求大量賠償
 
「層樓要除佢家姐名，加我地名。賠償50萬俾我地，俾返哂所有傢私錢!」呢個係肖師奶嘅要求
 
「開聯名戶口，將所有錢放哂入去」呢個係肖翠君要求
 




「層樓立即俾我地住係必須啦」佢地胃口愈來愈大
 
佢地好興奮咁等游律師到來，期間仲問幫佢地嘅議員，勝算有幾大
 
「鼎呀鼎，我地贏嘅機會大唔大呀?」
 
「有我地幫妳，實冇問題嘅，我睇過哂妳地俾我嘅資料，如果對方唔肯答應妳地要求，我地可以立即要求展開聆訊。當然，我地仲有政治關係唔弱嘅大狀，所以輸嘅機會好微」
 
聽到阿鼎咁講，肖氏一家嘅貪又再一次發出黎
 




「不枉我地一家都投你地一票」
 
係firm附近嘅starbucks，游律師同兩個師弟準備好哂文件
 
「我可以講定俾你地知，今次對方係好大貪，而且有政治背景，所以成功和解機會係好低」
 
兩名trainee聽到後表現得有點擔心，所以游律師亦安撫一下兩名師弟
 
「唔洗擔心咁多，師傅俾得我地去跟，一定會有佢嘅勝算。而且呢個係學野嘅大好機會，我地一陣開完會後，會直接上Chamber搵大狀」
 




兩名trainee聽到自己師兄咁講後，立即放心得多
 
上到去firm，大家坐低後，未等游律師講野，阿鼎已經唔按行規咁發言，一輪咀講出佢地自己觀點同要求，並用勒令口吻要求立即執行
 
游律師聽到對方要求後，會心微笑一下，轉個身同兩個師弟講
 
「話左架啦」
 
基本上，法律界都冇咩人睇得起阿鼎，佢係有律師資格，不過佢真係市政又唔識、打交通唔掂，打刑事未夠班，咁耐以黎都只係留係政治團體到痴金糠，所以有傳聞，唔好話法學院大學生或者IVE D法律事務HD學生，只要有少少法律常識嘅人，都可以好輕易咁解決阿鼎
 
肖氏一家應該係平時蛇齋糉得多，所以以為阿鼎好有計謀
 
游律師微微一笑「阿….阿鼎，你地嘅要求係完全唔合理」
 
「咩唔合理呀?層樓一開始就係我地嘅，有咩合唔合理?口頭承諾都有法律效力架喎!係你呢D黃綠律師邊夠阿鼎咁專業?」




 
阿鼎聽到肖氏一家咁讚佢，佢自己都飄起左
 
「或者妳地聽一聽我地要求先?」一個trainee講
 
俾錢沖昏頭腦嘅肖氏一家斷估都聽唔入耳，學翹要求好簡單，對方撤控，律師費可以幫佢地俾
 
肖師奶聽到咁樣，冇任何著數後立即拍檯
 
「咩意思呀!層樓又唔賠錢又唔賠呀!?唔得!唔會和解!!!」
 
「肖太，苗生只係唔想透過法庭解決問題。 一旦開庭，損失嘅只會係妳地，何必要搞到咁麻煩?」trainee再想說服肖師奶
 
「唔可以!!!一定要賠錢層樓加名開聯名戶口!!!一樣都唔可以少!!!」
 




游律師聽到後起身，整一整理套西裝
 
「咁冇辦法啦，唯有啟動民事訴訟程序，我所會將資料交俾貴所」