係同屋室友?定係同居密友?: (S2)50. 準備商討

「豈有此理!!!咁都迫唔到佢!!!而家再加多個鄉下婆出黎阻住哂」肖師奶坐係佢地位於福田鄉下嘅屋內，深深不忿
 
「佢邊度彈個鄉下婆出黎架!!!」肖師奶問佢個女
 
「我點會知呀?」 「妳睇妳丫!人地鄉下婆都爭贏妳呀!」
 
肖翠君坐係一邊悶悶不樂，一向受屋企得寵嘅佢，自從上次搶樓失敗，俾房署收樓要返福田長住後，已經淪為笑柄。一向心高氣傲嘅佢，如今仲俾人爆出爭輸俾個鄉下婆，就令佢更加不滿
 
每一次見到親戚果時都俾人嘲諷「冇咁大個頭就唔好戴咁大頂帽，貪字得個貧呢」
 




「做人老老實實，低調d唔會死嘅，咁高調要排場咪害死自己囉」
 
代表肖家嘅律師來電，話對方律師想再約見而，睇下可唔可以唔上庭解決問題
 
「解決問題?叫佢立即加名，再賠50萬俾我地咁就得」肖師奶又開大個口
 
「妳會唔會太大貪呀?」一直唔出聲嘅肖先生終於開聲
 
「咩大貪呀?佢一定知道會輸，所以先叫律師安排和解，我先唔會咁蠢呀!一定要加名再賠錢，仲有賠哂所有傢私之類俾我地添呀」
 




肖氏一家人，仍然唔知道，學翹係俾緊機會佢地
 
另一方面，距離肖家5分鐘路程嘅村中，村姑一家正為果張過唔到錢嘅支票煩惱
 
「咩話!?過唔到數?點會呀!?」村姑老母好激動咁講
 
「我問過銀行，佢地話張票冇問題，但係俾人取消左」
 
「取消?可以架咩!!搞錯呀!!!!明明乜都傾好哂」
 




「咁佢地話取消，我又控制唔到」
 
「大啦啦30萬呀!!!死啦!我地仲買定好多野添架」
 
大陸人，特別係深圳人，非常鍾意排場，荒死人地唔會羨慕佢地自己咁
 
如今本來應該到手嘅30萬、香港身份證同埋層樓就咁飛走左，村姑一家已經唔可以用失望黎形容
 
「妳又話個香港仔好鍾意妳嘅!」「咁我係有同佢傾過計嘛!!」
 
「妳果d叫傾計咩!?」「咁個阿婆話佢個孫仔怕羞嘛!!」
 
「妳用下腦啦，而家所有野都冇咩啦!!仲要爭人錢!!我唔理呀!!!妳點都要同我嫁去香港呀!」
 
「咁人地都有女朋友!我可以點者」




 
「妳…妳用下個死人腦啦!!!得閒落多d去氹下個阿婆啦!!佢矇下矇下!!」
 
「妳點知一定成功呀?」
 
「上次佢差d即日帶妳去買金啦!!如果唔係佢地個孫女走出黎?層樓已經係我地架啦」
 
同一個地方，唔同村內，同時有兩家人吼住唔屬於佢地嘅野，呢d情況，一直都存在
 
為左保護自已嘅野，苗學翹父母加埋苗學雯個名落黎，真係一d都冇錯
 
係游律師間firm內，佢正為下星期去肖家代表firm到開會做最後準備
 
Firm之中有幾個PCLL trainee係到學野同整理文件，呢個係所有Soli必須經過嘅洗禮。如果係海量文件中幫client搵出暇重要嘅野，去配合client嘅要求，就係一個事務律師嘅工作
 




「師兄，我地個Client會唔會同對家上庭?」
 
游律師除低眼鏡「機會好大，不過我地已經搵定Chamber」
 
「已經搵定…係邊一間Chamber?」
 
「紙巾 Chamber」
 
眾trainee一聽到紙巾Chamber之名，無不兩眼生光
 
「今次代表大狀會係HY MAK，想學野嘅，呢個係一個好機會」
 
一眾trainee立即加緊工作，務求可以係今次case中多學知識
 
「真有衝勁」游律師微笑咁望住呢班trainee