係同屋室友?定係同居密友?: (S2)46. 搶親

「學翹」一把令人好煩厭嘅聲音，又係肖師奶
 
學翹又一次反白眼，呢家人真係唔死心，估唔到寄律師信黎不特止，仲踩到上苗老太壽宴之中
 
小祺第一次見到肖翠君，真係聞名不如見面，事前小祺已經知道呢家人係好貪錢，估唔到真係有樣睇，一睇就知係果種勢利嘅人
 
「果個係阿哥條舊菜，係咪好唔掂呢?果個係佢家姐，比佢個妹更巴辣」學嬛係小祺耳邊講
 
「點呀肖太?律師信我收到架啦，請問有咩事呀?」
 




「大家都係一家人，提咩律師信呀，你乖乖地聽話快D同翠君結婚，咁咪得囉」
 
學翹非常佩服呢家人，佢一定唔知撤控嘅話，係要俾埋對家律師費
 
「我同妳地已經一刀兩斷，唔該妳地唔好再煩我」
 
「你講咩呀?我個妹低聲下氣叫你復合你唔領情呀?」 「係呀，關妳咩事呢?妳顧掂妳自己先啦」
 
肖氏一家對錢嘅慾望係非常大，而且仲成日發夢。以佢地大女肖翠琴為例，讀書唔多，中學未畢業出黎做野就要求人工過萬，而且仲聽D唔知咩人講，走去做直銷，唔係傳銷，佢話係薰香直銷而唔係香薰傳銷，講清楚D，就係亮碧思傳銷
 




仲學人開大單，以為自己可搵到好多下線，令自己「爵位」上升。不過開完大單後，一條水魚都釣唔到，反而令自己孭上一身債，佢地之前住天水圍果時，已經成日有人去追債
 
村姑兩母女見狀，就認定肖氏一家係黎搶樓，所以佢地不甘後人，立即企出黎「保護」佢地嘅野，一時間，大量花生出現，苗老太見狀都坐低，佢萬萬都估唔到自己個孫原來係咁搶手
 
「妳地咩人呀?我地已經同佢地傾好禮金果D架啦，識趣就自己走啦」
 
「咩傾禮金呀?!而家我地係大呀，排隊都唔輪到妳地出聲」
 
「而家妳地有資格出聲咩?我地禮金支票都收左啦，我地而家先係正室呀!!妳地想埋黎分錢?過主啦!!!」
 




「我先係正室呀!!!妳係小三咋!!!我同學翹拍左好耐拖架啦!!!妳問佢啦!!」
 
村姑同老娘一齊望過黎，學翹點頭承認，因為呢個係事實，不過唔係現在式，唔係現在進行式，而係過去式
 
「係呀，我同佢拍過兩年拖呀，不過而家已經係過去式」
 
村姑聽到之下大喜，立即反擊「佢話妳地完左啦!!聽到未呀?」
 
「學翹!!我都冇同你分過手!!!點解咁講呀?」
 
「係囉，咁我封律師信又點解釋呢?」
 
「咁你肯乖乖地，我地咪撤囉」「然後我幫妳地俾埋律師費呀?」
 
肖翠君不語




 
「定係妳地間屋俾人收左，係香港冇地方落腳，所以先返黎求我俾間屋妳地住呀?」
 
肖氏一家面有難色，明顯學翹已經篤中佢地死穴。而家每日佢地都要過關返工返屋企，非常不便
 
「不過妳地都成日返深圳架啦，唔爭左住埋係果到，返黎香港做乜呢?」
 
「但係….」「而且妳地都向高院入稟，所以都係法庭上見啦」
 
「你…你真係咁狠心?」
 
「係我層樓加名，冇家姐同意，咩人都冇可能成功，不論妳地係邊個咩人咩身份」
 
「你真係唔顧兩年感情呀?」「喂大姐，我做左童軍喎，我仲點顧舊情呀?妳咪玩我啦」
 




「但係….」  「我開始左新生活，有人係我身邊陪我架啦，妳唔撤控，我地係呢個故事第三季再見啦」
 
「不過….我地….」「好啦，出去搵霞姨拎飯盒啦，第三季等通知啦」
 
「唔得呀!!!我地要出多D場!!!」
 
「邊個要係我細佬個故事中搶戲爭出場費!?問過我未!?」
 
來者，正正係苗家最高話事人，一個連苗老太都驚嘅人，苗學雯