係同屋室友?定係同居密友?: (S2)43. 民事訴訟

學翹部車載住所有人，徐徐向半山出發
 
小祺自出娘胎，只係跟學校去過一兩次半山區。學翹將部車駛入一個私人屋苑內，呢個屋苑雖然同新式屋苑唔同，冇會所，但係明顯地比起新式屋苑實用
 
佢地落車後，一行人行去搭lift，一梯兩伙嘅單位一打開lift門，超級大嘅單位全景走入小祺眼中
 
黎大狀屋企接近3000尺，而且有三房一套再加一間工人房係廚房內，就咁講個廚房，已經大過佢以前間套房
 
「家姐姐夫」小祺非常有禮貌咁行入黎大狀屋企，學雯非常歡迎小祺
 




「佢地返到啦?」黎大狀係書房中叫出黎
 
「係呀!對仔女同埋小祺返到，仲有兩個黎討飯嘅」明顯地，討飯嘅就係學翹學嬛兩兄妹
 
「話你呀!」「話妳呀!」
 
學雯見狀「你地兩位唔好唔誤會，我係話在座兩位，都係討飯」
 
呢個就係佢地三個獨特溝通方式
 




「姐姐，我地帶妳睇下啦」卓凝卓賢拉住小祺去佢地兩個間房
 
兩個人嘅房，包括黎大狀間套房都係望到海景，由房望出去，會望到維港兩岸
 
卓凝間房係粉紅色，完全係一個女仔嘅房間，仲有幾隻佢成日攬住嘅公仔。而卓賢間房就有球拍、好多STEM書，而最令小祺意想不到嘅係，卓賢間房會有好多科學雜誌
 
兩個小朋友都痴實小祺同學嬛，小祺教佢地STEM而學嬛就教兩個外甥英文
 
同一時間，學翹同黎大狀係書房入邊，睇緊信件，係關於上庭嘅事
 




學翹睇住封信，佢心中一早就知係講咩
 
民事訴訟 ：關於物業擁有權
申訴人：肖錢鳳娥、肖翠君
申訴人代表律師：明昆你律師事務所
答辯人：苗學翹、苗學雯
答辯人需於由此函件發出後14個工作天內對申訴人作出指定要求，否則將啟動民事訴訟程序
 
「交俾游律師處理?」學翹問黎大狀
 
「當然啦，我地已經幫你填好哂野，委託佢地間firm負責，佢地都立即搵左我間Chamber」
 
「下一步，應該係出信同對家deal和解?」
 
「exactly!」黎大狀指一指佢自己咁聰明嘅舅仔




 
「不過你都係可以搵定HY，佢地呢家人唔會放棄，太大貪。以我所知，佢地連間公屋都俾人收返」
 
「游律師佢地約左對家律師下星期見面，你去唔去?」
 
「唔去啦」學翹擰一擰頭  「醒目」
 
過左一陣「喂!!!開飯啦!!!!」
 
一聽到開飯，兩個小朋友就拉住小祺出去坐低，將佢地舅父同阿姨完全阻開
 
黎大狀唔係果種專制嘅僱主，佢會叫堆工人姐姐一齊出黎坐係檯到食飯，而且仲要兩個小朋友食好飯後自己收拾檯面
 
黎大狀個工人姐姐煮野食好好食，係一個好盡責任嘅姐姐，所以苗學雯好識做，每月俾$7500姐姐
 




今日工人姐姐知道有客人黎，所以就煮多D飯
 
小祺第一次感到家庭溫暖，佢眼中有少少淚光
 
一向觀人入微嘅黎大狀，好快就估計到小祺身世
 
「小祺妳幾多歲開始自己住?」
 
小祺聽到黎大狀咁問，就望一望學翹，而學翹就耍手擰頭
 
「唔係學翹講嘅，係我自己留意到妳」
 
既然俾黎大狀發現到，小祺都唔打算再收埋
 
「我大約10歲果時去左保良局，然後直到UG畢業先返屋企，之後PG果時再搬去PG宿舍，畢業後先搬去套房」




 
黎大狀聽完後，好快行入房，再拎游律師張咭片俾小祺
 
「學翹已經有游律師聯絡方法，不過我都俾定佢咭片妳」
 
小祺不明所以
 
「妳遲D可能有機會用到」
 
返到宿舍後，小祺坐係梳化上邊諗「點解姐夫會俾游律師咭片我呢?」
 
「即係姐夫預左將來妳同妳父母可能會係庭上相見」
 
「會架咩?」
 




「仲係要去地院，家事法庭」