係同屋室友?定係同居密友?: (S2)42. 集體留宿

今日係學翹同小祺畢業，黎大狀就請食飯，所以佢地兩部車一齊出去
 
酒樓內，兩個小朋友好開心咁同小祺及學嬛傾計，而學雯就同學翹傾下兩個星期嘅事，佢地都唔知道，苗老太已經係背後做好多野，仲要唔係細野，係大單野
 
「媽咪呀，我地可唔可以去舅父屋企瞓一晚呀?」
 
學雯未回覆對仔女果時，學翹已經早一步搶答
 
「你地黎左，我瞓邊呀?」
 




「我地同姐姐瞓房，舅父你瞓廳」「你地當宿舍好大呀?」
 
「你地聽日唔洗返學校練習咩?」
 
「唔洗啦，剛考完試，下星期先再有課外活動啦，黎啦，俾我地去啦媽咪」
 
學雯望住佢細佬，而學翹就望住小祺
 
「你俾佢地黎住一晚囉」  「你地有冇衫換先?」
 




「有!!!」
 
佢地兩姊弟立即拎出黎俾學翹睇「我地兩個係校隊成員，所以長期有套體育衫、底衫褲同襪係爸爸部車上」
 
既然佢地連換嘅衫都有，學翹都搵唔到理由拒絕，於是同意佢地兩姊弟要求，聽日帶佢地出去玩，晚上返屋企食飯
 
「阿哥，我呢?」學嬛指住自己
 
「妳咪返Hall囉」 「呀…..我同個hallmate講我今晚唔返去呀，我唔想睇真人版4仔呀」
 




「妳真係麻煩」
 
離開酒樓，學雯千叮萬囑「唔好俾麻煩姐姐同舅父呀!聽話呀!」
 
「知道!!」
 
於是小祺同兩個小朋友坐車尾，學嬛坐前邊，五個人一齊返宿舍
 
返職員宿舍前，學翹兜左個妹返hall拎更換嘅衫
 
卓凝同卓賢係車中望出去「嘩!阿姨間宿舍環境咁好嘅，有無敵大海景呀!!!!」
 
「你地屋企咪一樣，個view靚得多啦」
 
「我地睇慣哂啦」




 
「係喎，你地兩個係讀邊間小學呀?」小祺問卓凝
 
「妳呢個問題問得好好!!!!」「我地都好樂意答妳!!!!」
 
「我地係讀般咸道官立小學」
 
小祺聽到佢地兩姊弟讀官立小學，覺得有d出奇，佢以為黎大狀會送對仔女去國際學校讀書
 
「點解你地唔去國際學校讀書嘅?」
 
「媽咪安排我地同普通小朋友咁囉」「有冇上興趣班之類?」
 
「有呀!!我地有學游水同羽毛球」「因為媽咪想我地多做運動，放哂d電佢」
 




「你地好幸福喎，媽咪咁錫你地」「姐姐妳都有舅父錫妳呀」
 
「你兩個咪咁多事呀，一陣返到去唔該立即沖涼，沖完後先玩呀」
 
「知道!!!!」
 
學翹部車好快駛到宿舍，佢地一行五人一齊返到去宿舍
 
「舅父你今晚瞓廳啦!!!」
 
「我呢?」學嬛指住自己
 
「阿姨同舅母陪我地一齊瞓」  「妳地肯定夠位?」
 
「拎走d鯊魚就有架啦，我地知道舅父張床好大，可以瞓幾個人，不過佢用哂d位黎放鯊魚」




 
全部嘩鬼同人沖好涼之後，就拎部遊戲機出黎打，學翹就開機洗衫
 
今日多左三個人，不過衫都唔算多
 
卓凝卓賢兩個玩得好開心，不過再開心，佢地都要瞓覺
 
小祺同學嬛陪佢地兩姊弟一齊瞓，學翹就自己一個人瞓係梳化
 
過左一陣，小祺走出廳，爬上梳化同學翹一齊瞓
 
「妳唔瞓房?」  「想陪下你丫嘛」
 
「咸濕妹」學翹搣一搣小祺塊面
 




「今晚唔想呀，佢地係到」  「咁妳返去瞓房啦」
 
「冇你攬住瞓唔著」
 
學翹攬實小祺，輕吻一個後，兩個人一齊瞓