係同屋室友?定係同居密友?: (S2)41. 律師信

學翹接受左博士學位後，一眾親友都離開會場，小祺就係門口等佢
 
殊不知學翹突然間就係小祺身後出現再攬住佢，小祺擰頭望高，同學翹黎左個輕吻
 
「呀!!!!!你地兩個唔好係到派狗糧啦!!!」Rachel係到嚎叫
 
「妳都可以架」 「吼!!!!」Rachel影完幾張相就趕住去狩獵
 
「Vincent有冇問題架?」 「一個係肉食女，一個係草食男，一定會好好睇」
 




「即係點呀?」 「即係Rachel會主動追Vincent囉」
 
「咁我係唔係肉食系呀?」  
 
學翹望住小祺，係佢耳邊講「妳係唔乖果時就真係肉食系啦」
 
「喂!!細聲d啦!!!」小祺面紅紅抗議
 
係佢地打打鬧鬧期間，學雯一家人已經去到佢地背後。卓凝同卓賢走到佢小祺身邊攬實佢
 




「舅母!!!!小祺姐姐妳係唔係成為我地舅母啦?」
 
小祺俾呢兩個小學生突如其來嗡問，立即口啞啞唔識出聲
 
「即係呢….其實….」
 
「姐姐妳同舅父頭先斷正左啦，妳冇得唔認架啦」
 
「斷…..斷正呀?」小祺吞吞吐吐
 




呢個時候，苗學雯去到小祺身邊「妳地兩個頭先咁甜蜜，好難睇唔到喎」
 
「其….其實呢…..我地就….」小祺望住學翹，希望佢可以解圍
 
學翹拉一拉小祺埋佢身邊「係呀家姐，拍拖三星期左右」
 
「但係住埋一齊好耐呢」學嬛係佢阿哥身邊加一句
 
黎大狀一貫食花生嘅笑容望住佢舅仔
 
「呀…..阿哥你而家都派狗糧俾我啦，好彩我冇去你果到住咋」
 
「妳可以黎架，瞓廳囉」
 
「呵!!得啦，有老婆唔要細妹啦」




 
「阿姨呷醋啦」
 
因為小祺同學翹關係曝光，所以學翹今日同黎大狀一樣，淪為配角
 
黎大狀係其他人玩得興高采烈果時，係學翹身邊俾意見
 
「你最好就下兩個星期帶小祺去見阿麻」
 
「姐夫…會唔會太快呀?果陣你都係同家姐訂左婚後先黎我地屋企」
 
「唔快架啦，你知阿麻幾心急架啦」
 
學翹諗起個大陸村姑又一臉無奈
 




「仲有，你家姐尋日收到一封信，係間firm寄黎，應該好快你係舊屋果到都會收到」
 
「咁我大致上都知咩事啦，我交埋俾你地處理?」學翹一早估到姓肖一家人唔會咁易放棄
 
「當然啦，佢地今次又唔知搵D咩firm幫佢地手」
 
「斷估唔會係大firm掛」
 
黎大狀擰擰頭「係d冇咩人知嘅蚊型firm，不過個socli就同d議員有d關連嘅」
 
「要打嘅話，係地院定高院?」
 
「三叔三嬸間屋而家去到9mil，一定係高院，不過睇下佢地入稟果時係咩身份先啦，一陣佢話用屋企人入，就去地院架啦」
 
「屋企人?佢地咩都唔係，我諗去定高院差唔多」




 
「醒目，仲有，要打嘅話我唔可以幫你打，層樓有你家姐名，我會有利益衝突」
 
「姐夫你間Chamber高手如雲，總會有人幫到我地嘅」
 
「果然叻仔，果陣我都叫你去LLB同讀PCLL，你又唔肯
 
「你搵左HY MAK幫我地?」
 
「一早講好哂，老闆話成個Chamber會做我地Consultant，游仔佢地間firm會幫你接左先」
 
有黎大狀呢個姐夫係到，學翹非常放心
 
「拿，姐夫教定你，兩個人最緊要好好溝通，小祺背境我地未清楚，點解拍拖前就同居，呢d問題可以慢慢解釋，但係如果你同佢係認真嘅呢，就要好好對佢」
 




「我明架啦」
 
「仲有，每個月收埋少少錢俾自己，我同你家姐結婚咁耐，每一單case我都報少5%俾佢知」
 
「呢層我知」
 
所以話，律師同大狀係以吸血維生係冇講錯，不過佢地身後嘅女人，先係真正嘅吸血鬼
 
女人，係世界上最恐怖嘅動物