係同屋室友?定係同居密友?: (S2)33. 拖手遊園

小祺同學翹手拖手咁行，小祺個心非常甜，佢自己忍唔住，偷偷地笑得好開心。不過佢都係要問下學翹
 
「你做咩拖住我呀?我有話俾你拖，做你女朋友咩?」雖然小祺個口咁講，但係一睇就知道，佢一早批准學翹拖住佢
 
「邊個話同妳拍拖呀?妳話左要嫁俾我架嘛」學翹又拎返呢個原因出黎
 
「咁呀…算啦，俾你拖下啦」
 
「咁多謝呀?」
 




「妳想玩咩先?」
 
「我呀….唔….搭火車先，去坐旋轉木馬」
 
所有女仔都想自己成為公主，有一個白馬王子陪伴住自己。小祺都唔例外，加上自己從小就失去家庭嘅愛，所以表面上佢好獨立，唔需要人地照顧，但其實內心係比其他女仔更加想有人照顧同保護佢，有一個避風港俾自己
 
經過咁多年，而家終於有個男仔係佢身邊保護佢自己，所以自從上次打風留係宿舍期間，學翹對自己細心嘅照顧，已經深深咁刻入自己心中。再加上自己差少少就割脈果時，學翹突然間嘅出現，將自己由邊緣拉返上黎，小祺就認定學翹係可以保護佢一世嘅男仔
 
小祺係旋轉木馬上，露出咁多年都未曾露出嘅笑容，果個笑容，係確實出自佢自己內心
 




學翹陪住小祺玩旋轉木馬，係佢諗唔到嘅事。因為之前拍拖，唔好話旋轉木馬，就連迪士尼同海洋公園都冇咩點去，去都係好快走果種。今日學翹見到小祺玩得好開心，愈來愈覺得眼前呢個女仔好可愛
 
玩完旋轉木馬，佢地立即過隔離玩小熊維尼同埋小飛象。除左咖啡杯之外，小祺玩哂成個幻想世界嘅遊戲，仲有同公仔影相
 
由幻夢世界，佢地一齊行去frozen園區，一齊排隊玩
 
其實今日人數真係唔多，冇旅行團之餘仲冇學校旅行，所以大部份遊戲都唔洗排隊
 
Frozen果個「過山車」佢地同其他人一樣，玩左一次就算。你老闆如果多人果時排左成粒鐘，之後坐得40秒就完，睇下有冇人講粗口?
 




所以玩完果個「過山車」後，佢地去玩埋雪奇之旅。今日園區真係冇咩人，所以佢地可以不停咁玩
 
由11點玩到而家6點半，小祺終於都識叫攰要休息下
 
休息時，有個工作人員行埋佢地身邊「小姐，洗唔洗同男朋友影叔張相留念下呀?」
 
「好呀」學翹好快咁答人，當時小祺個腦仲load緊
 
佢地以一個好親密嘅姿勢影左一張相，拎左張相後，學翹就帶住小祺去俾錢印相，有3R同2R，可以放銀包同相架
 
「妳想食咩??」學翹睇一睇錶
 
「你想幾點返酒店?」
 
「妳想唔想睇埋煙花先?」




 
小祺本來想返酒店大覺瞓，因為佢自己都有d攰，但係一聽到學翹問佢睇唔睇埋煙花果時，佢又變得精神，不過佢對腳又好攰
 
學翹見到小祺思考個樣，都知佢想點
 
佢地去到小鎮大街間餐廳坐低食左晚餐先，期間學翹見到小祺隻腳係到轉，就知道佢對腳好攰
 
由於佢地坐係角落，冇咩人睇到，所以學翹就埋去小祺身邊，幫佢按摩下隻腳
 
「好d未呀妳?」
 
小祺怕怕羞羞咁點一點頭，呢一刻，小祺好想錫過去
 
正當佢想行動時，學翹坐返去自己位，因為佢地開始食野
 




小祺邊食邊諗返起早兩日Rachel講嘅野